ମୋଦୀ ହିଁ ରହିବେ ପ୍ରଧାନମନ୍ତ୍ରୀ! ମୋଦୀଙ୍କ ଅବସର ଚର୍ଚ୍ଚାରେ ମୋହନଙ୍କ ପୂର୍ଣ୍ଣଚ୍ଛେଦ!

କନକ ବ୍ୟୁରୋ: ଆସନ୍ତା ସେପ୍ଟେମ୍ବର ୧୭ରେ ପ୍ରଧାନମନ୍ତ୍ରୀ ମୋଦୀଙ୍କୁ ପୁରୁଛି ୭୫ ବର୍ଷ । ଆଉ ୭୫ ବର୍ଷ ପରେ ସେ ଅବସର ନେଇପାରନ୍ତି ବୋଲି ଅନେକ ସମୟରେ ଚର୍ଚ୍ଚା ହୁଏ । ତେଣୁ ମୋଦୀ ଅବସର ହେଲେ, କିଏ ପ୍ରଧାନମନ୍ତ୍ରୀ ହେବ, କିଏ ବିଜେପିର ନେତୃତ୍ୱ ନେବ ତାହା ସବୁଠୁ ବଡ଼ ପ୍ରଶ୍ନ । ହେଲେ ଏହାରି ଭିତରେ ଆରଏସଏସ୍ ମୁଖ୍ୟ ମୋହନ ଭାଗବତ ଦେଇଛନ୍ତି ବଡ଼ ଇସାରା । ମୋଦୀଙ୍କୁ ସେପ୍ଟେମ୍ବର ୧୭ ତାରିଖରେ ୭୫ ବର୍ଷ ପୂରିଲେ ବି ସେ ଅବସର ନେବେନି ବୋଲି ପରୋକ୍ଷରେ ଇସାରା ଦେଇଛନ୍ତି ସଂଘର ମୁଖ୍ୟ ମୋହନ ଭାଗବତ ।

ରାଷ୍ଟ୍ରୀୟ ସଂୟସେବକ ସଂଘର ୧୦୦ ବର୍ଷ ପାଳନ ଅବସରରେ ମୋହନ ଭାଗବତ କହିଛନ୍ତି, ମୁଁ କାହାକୁ ବି ୭୫ ବର୍ଷରେ ଅବସର ହେବାକୁ କହିନି । ସଂଘରେ ଜଣେ ସ୍ୱଂୟସେବକ ଭାବେ କିଛି ଦାୟିତ୍ୱ ଦିଆଯାଏ । ଆମେ ଚାହୁଁ କିମ୍ବା ନ ଚାହୁଁ, ସେ ଦାୟିତ୍ୱ କିନ୍ତୁ ଆମକୁ କରିବାକୁ ପଡ଼ିବ । ତେଣୁ ଏପରି ପରିସ୍ଥିତିରେ ସଂଘ ଯଦି ୮୦ ବର୍ଷରେ ମୋତେ ଶାଖାକୁ ଯିବାକୁ କୁହେ, ତେବେ ମୁଁ ମଧ୍ୟ ଶାଖାକୁ ଯାଇ ଶାଖା ଚଲାଇବି ବୋଲି କହିଛନ୍ତି ମୋହନ ଭାଗବତ । ଏହାସହ ସେ କଦାପି ୭୫ ବର୍ଷ ହେଇଥିବା କାରଣରୁ ଅବସର ହେବେନି ବୋଲି କହିଛନ୍ତି ।

ମୋହନ ଭାଗବତଙ୍କ ଏହି ବୟାନକୁ ପ୍ରଧାନମନ୍ତ୍ରୀ ମୋଦୀଙ୍କ ସହ ଯୋଡ଼ି ଦେଖାଯାଉଛି । ବିଜେପିରେ ମୋଦୀ ଯୁଗ ଆରମ୍ଭ ହେବା ପରେ, ୭୫ ବର୍ଷର ଏହି ଅଲିଖିତ ନିୟମରେ ବଡ଼ ବଡ଼ ନେତାଙ୍କୁ ଦାୟିତ୍ୱରୁ ହଟାଇ ଦିଆଯାଇଥିଲା । ଯାହା ଭିତରେ ଲାଲକୃଷ୍ଣ ଆଡଭାନୀଙ୍କ ଭଳି ନେତା ମଧ୍ୟ ଥିଲେ । ଏହାପରେ ଏବେ ଯେତେବେଳେ ପ୍ରଧାନମନ୍ତ୍ରୀ ମୋଦୀଙ୍କୁ ୭୫ ବର୍ଷ ପୂରିବାକୁ ଯାଉଛି, ସେତେବେଳେ ସେ ମଧ୍ୟ ଅବସର ହେଇପାରନ୍ତି ବୋଲି ଚର୍ଚ୍ଚା ହେଉଛି । ହେଲେ ତା ଭିତରେ କିନ୍ତୁ ମୋହନ ଭାଗବତଙ୍କ ଏହି ବୟାନ ଖୁବ ଜୋରରେ ଭାଇରାଲ୍ ହେବାରେ ଲାଗିଛି ।

ଗତକାଲି ଇଣ୍ଡିଆ ଟୁଡେ ସି ଭୋଟର ସର୍ଭେରେ ମଧ୍ୟ ଗୋଟିଏ ରିପୋର୍ଟ ସାମ୍ନାକୁ ଆସିଛି । ଯେଉଁଥିରେ ମୋଦୀଙ୍କ ପରେ ସବୁଠୁ ଅଧିକ ଲୋକ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ପ୍ରଧାନମନ୍ତ୍ରୀ ଭାବରେ ଦେଖିବାକୁ ଚାହୁଁଛନ୍ତି । ଏହାସହ ୟୁପିର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ମଧ୍ୟ ଅନେକ ଲୋକ ଦେଶର ପ୍ରଧାନମନ୍ତ୍ରୀ ଭାବେ ଦେଖିବାକୁ ଚାହୁଁଛନ୍ତି ବୋଲି ରିପୋର୍ଟ ପ୍ରକାଶ ପାଇଛି ।