ଜଳ ଯୋଗାଣ ପ୍ରକଳ୍ପ ନାଁରେ ଖୋର୍ଦ୍ଧାରେ ମହା କେଳେଙ୍କାରୀ । ଅଧାରେ ଅଟକିଛି ପାନୀୟ ଜଳ ପ୍ରକଳ୍ପ, ଭାଙ୍ଗି ଗଲାଣି ଷ୍ଟାଣ୍ଡ ପୋଷ୍ଟ । ପାଣିରେ ପଡିଲା ୨୫୪ କୋଟି ଟଙ୍କା

କନକ ବ୍ୟୁରୋ : ପ୍ରତି ଘରକୁ ବିଶୁଦ୍ଧ ପାଣି ଯୋଗାଇବା ପାଇଁ ସରକାର ବିଭିନ୍ନ ଅଞ୍ଚଳରେ ମେଗାୱାଟର ପ୍ରୋଜେକ୍ଟ ନିର୍ମାଣ କରିଥିଲେ। ଯେଉଁଥିରେ ମହନଦୀରୁ ହାଇ ପ୍ରେସର ପମ୍ପ ସାହାଯ୍ୟରେ ପାଣି ଉଠାଯାଇ ତାକୁ ବିଶୁଦ୍ଧ କରାଯାଇ ଗାଁ ଗାଁ ତଥା ପ୍ରତ୍ୟେକ ଘରକୁ ଛଡ଼ାଯିବ । ଲୋକେ ପାଇବେ ବିଷୁଦ୍ଧ ଜଳ । ତେବେ ବିଶୁଦ୍ଧ ଜଳ ଦେବାକୁ କହି ଜଳକା କରୁଛି ଜଳସେଚନ ବିଭାଗ । 

ଖୋର୍ଦ୍ଧା ଜିଲା ବେଗୁନିଆ ବୋଲଗଡ଼କୁ ଘରେ ଘରେ ପାଣି ଯୋଗାଇବା ପାଇଁ ବୋଲଗଡ଼ ବ୍ଲକ ସାନ ନୟାପଲ୍ଲୀରେ ଜଳଯୋଗାଣ ପ୍ରକଳ୍ପର ନିର୍ମାଣ ଚାଲିଛି । ପାଖାପାଖି ୭ ଏକର ପରିଧି ମଧ୍ୟରେ ନିର୍ମାଣ କରାଯାଇଥିଲା ଏହି ପ୍ରକଳ୍ପ । ଏହି ପ୍ରକଳ୍ପ ପାଇଁ ୨୫୪ କୋଟି ଟଙ୍କାର ଅଟକଳ ଅନୁମୋଦନ ହୋଇଥିଲା । ଔଗଉ କମ୍ପାନୀ ଏହି କାମର ଦାୟିତ୍ବ ମଧ୍ୟ ନେଇଥିଲା ।  ବଡ଼ କନଷ୍ଟ୍ରକ୍ସନ, ମେସିନ, ଜଳ ବିଶୋଧନାଗାର ପାଇଁ ବ୍ୟବସ୍ଥା, ଜଳ ସଂରକ୍ଷଣ ପାଇଁ ସ୍ଥାନ ଆଦି ଏହି ପରିଧି ଭିତରେ ନିର୍ମାଣ ହୋଇଛି । ସେହିପରି ଗାଁ ଗାଁରେ ରାସ୍ତା, ସାହି ମଝି, ସବୁ ଖୋଳା ହୋଇ ପାଇପ ବି ବସି ସାରିଛି । ଘରକୁ ଟ୍ୟାପ ସଂଯୋଗ ପାଇଁ ଠିକାଦାର ମାନେ ଦୁଆରେ ଦୁଆରେ ପିଣ୍ଡି କରି ଯାଇଛନ୍ତି । ହେଲେ ପାଣିର ଦେଖା ଦର୍ଶନ ନାହିଁ ।

ପାଇପ ଜଳ ଯୋଗାଣ ପାଇଁକୋଟି କୋଟି ଟଙ୍କା ଖର୍ଚ ହୋଇଛି । ମହାନଦୀର ବୈଦେଶ୍ୱର ଠାରୁ ପାଣି ଆସିବା ପାଇଁ ମହାନଦୀର କୁଳରେ ହାଇ ପ୍ରେସର ପମ୍ପ ଲାଗି ସେଠିବି ନିର୍ମାଣ ହୋଇଛି । ହେଲେ କେବେ ଉଠିବ ପାଣି  ତା ଉପରେ ପ୍ରଶ୍ନ ବାଛି ସୃଷ୍ଟି ରହିଛି । 

ମେଗା ପ୍ରୋଜେକ୍ଟ ପାଇଁ ଏବେ ବିଭିନ୍ନ ଗାଁରେ ଦେଖିବାକୁ ମିଳିଛି ସମସ୍ୟା । ପେଟି ଠିକାଦାରମାନେ ଘର ଘରକୁ ପାଇପ ମାଧ୍ୟମରେ ପାଣି ଯୋଗାଇବା ପାଇଁ ରାସ୍ତା ଖୋଳି ଦେଇଥିବାରୁ ଅବସ୍ଥା ଆହୁରି ଖରାପ ହୋଇଛି । ଏଥିସହ କେଉଁଠି ଟ୍ୟାପ ଭାଙ୍ଗିଗଲାଣି ତ ପୁଣି କେଉଁଠି ସମ୍ପୂର୍ଣ୍ଣ ଖୁଣ୍ଟି ଉପୁଡି ପଡ଼ିଲାଣି । ଯାହା ଫଳରେ ହୀନସ୍ତା ଭୋଗୁଛନ୍ତି ସାଧାରଣ ଜନତା ।