କନକ ବ୍ୟୁରୋ : ରାଜସ୍ଥାନରୁ ଏକ ହାଇଟେକ୍ ଲୁଟ୍ ର ମାମଲା ସାମ୍ନାକୁ ଆସିଛି। ଗୁଗୁଲ ମ୍ୟାପକୁ ବ୍ୟବହାର କରି ୨୫ଲକ୍ଷ ଟଙ୍କା ଓ ସୁନାଗହଣା ଲୁଟିନେଇଛନ୍ତି ଲୁଟେରା। ଚୋରି କରିବା ପାଇଁ ଦିଲ୍ଲୀରୁ ଜୟପୁର ଆସିଥିଲେ ଚୋର। ଏବେ ଉତ୍ତର ପ୍ରଦେଶରୁ ଦୁଇଜଣ ଲୁଟେରାଙ୍କୁ ଗିରଫ କରିଛି ଦିଲ୍ଲୀ ଓ ରାଜସ୍ଥାନର ମିଳିତ ଟିମ୍ । ଘଟଣାଟି ଜାନୁଆରୀ ୨୮ ତାରିଖ ସନ୍ଧ୍ୟାରେ ଜୟପୁରର ସି-ସ୍କିମ୍ ଅଞ୍ଚଳର ଭାଗୀରଥ କଲୋନିରେ ଘଟିଥିଲା। ଅଳଙ୍କାର ବ୍ୟବସାୟୀ ରଚନା ସବିଖି ତାଙ୍କ ପରିବାର ସହିତ ସେହି ଦିନ ତିନି ଘଣ୍ଟା ପାଇଁ ବାହାରକୁ ଯାଇଥିଲେ। ଅଭିଯୁକ୍ତ ଘର ଖାଲି ଦେଖି ଏହି ଅପରାଧ ଘଟାଇଥିଲେ। ପୁଲିସର ସୂଚନା ଅନୁଯାୟୀ, ପାଞ୍ଚ ଜଣ କୁଖ୍ୟାତ ଚୋର ଏହି ଘଟଣା ଘଟାଇଥିଲେ। ସେମାନେ ଲକ୍ଷ ଲକ୍ଷ ଟଙ୍କାର ଅଳଙ୍କାର ଓ ୨୫ ଲକ୍ଷ ନଗଦ ଟଙ୍କା ନେଇ ଫେରାର ହୋଇଯାଇଥିଲେ ।

Advertisment

ଗୁଗୁଲ୍ ମ୍ୟାପ୍ ବ୍ୟବହାର କରି ଲୁଟ୍

ପୁଲିସର କହିବା ଅନୁସାରେ, ଦିଲ୍ଲୀରୁ ଏକ କାରରେ ଆସିଥିବା ପାଞ୍ଚ ଜଣ ଲୁଟେରା ଗୁଗୁଲ୍ ମ୍ୟାପ୍ ବ୍ୟବହାର କରି ସହରର ପ୍ରସିଦ୍ଧ ଅଞ୍ଚଳଗୁଡ଼ିକ ଖୋଜିଥିଲେ ଏବଂ ତା’ପରେ ବନ୍ଦ ଘରଗୁଡ଼ିକୁ ରେକି କରିବା ପରେ ଚୋରି କରିଥିଲେ। ଚୋରମାନେ ଘରେ ଲାଗିଥିବା ସିସିଟିଭି କ୍ୟାମେରା ମଧ୍ୟ ଭାଙ୍ଗି ଦେଇଥିଲେ। ସେମାନେ ତିନି ଘଣ୍ଟା ଧରି ଘରେ ରହି ଆଲମାରୀରେ ରଖାଯାଇଥିବା ୨୫ ଲକ୍ଷ ନଗଦ ଟଙ୍କା ଓ ଲକ୍ଷାଧିକ ଟଙ୍କାର ସୁନାଗହଣା ନେଇ ଚମ୍ପଟ ମାରିଥିଲେ ।

ଅଧିକ ପଢ଼ନ୍ତୁ---ଜେନେରାଲ ନରୱାଣେ ଆତ୍ମଜୀବନୀ ବିବାଦ: ପେଙ୍ଗୁଇନ୍‌ ଇଣ୍ଡିଆକୁ ଦିଲ୍ଲୀ ପୁଲିସର ନୋଟିସ୍‌

ଚୋରକୁ ଧରାଇଦେଲା ସିସିଟିଭି

ପୁଲିସ ସୂଚନା ଅନୁଯାୟୀ, ଅପରାଧୀଙ୍କୁ ଧରିବା ପାଇଁ ନିକଟରେ ଲାଗିଥିବା ପ୍ରାୟ ୫୦୦ ସିସି କ୍ୟାମେରାର ଫୁଟେଜ୍ ସ୍କାନ କରାଯାଇଥିଲା ଏବଂ ଏକ ସନ୍ଦିଗ୍ଧ କାର ଚିହ୍ନଟ କରାଯାଇଥିଲା। କାରର ନମ୍ବର ଟ୍ରାକ୍ କରିବାରୁ ଜଣାପଡିଥିଲା ଯେ କାରର ନମ୍ବର ପ୍ଲେଟ୍ ଜାନୁଆରୀ ୧୧ ତାରିଖରେ ଦିଲ୍ଲୀରୁ ଚୋରି ହୋଇଥିଲା। ପରବର୍ତ୍ତୀ ସମୟରେ, ଜୟପୁର ପୁଲିସ, ନିରୀକ୍ଷଣ ଓ ଦିଲ୍ଲୀ ପୁଲିସର ସହାୟତାରେ ଦୁଇ ଅଭିଯୁକ୍ତଙ୍କୁ ଖୋଜି ବାହାର କରାଯାଇଥିଲା। ଗିରଫ ଅଭିଯୁକ୍ତ, ୨୫ ବର୍ଷୀୟ ଶାନ ମହମ୍ମଦ ଓରଫ ଶାନୁ ଓ ଉତ୍ତରପ୍ରଦେଶର ବିଜନୌରର ଚାନ୍ଦପୁରର ବାସିନ୍ଦା ଶକିଲ ଅହମ୍ମଦ। ଅନ୍ୟ ତିନି ଜଣ ଅପରାଧୀ ଏବେ ବି ଫେରାର ଅଛନ୍ତି, ସେମାନଙ୍କୁ ଖୋଜା ଚାଲିଛି ।