କନକ ବ୍ୟୁରୋ: ସମାଜବାଦୀ ପାର୍ଟି ସାଂସଦ ଡିମ୍ପଲ ଯାଦବଙ୍କ ବିରୋଧରେ ଜଣେ ମୁସଲମାନ ଧର୍ମଗୁରୁଙ୍କ ଅପମାନଜନକ ମନ୍ତବ୍ୟକୁ ନେଇ ବିବାଦ ଉପୁଜିଛି । ଏହା ବିରୋଧରେ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍‌ଡିଏ)ର ସାଂସଦମାନେ ସଂସଦ ପରିସରରେ ବିକ୍ଷୋଭ ପ୍ରଦର୍ଶନ କରିବା ସହ ତାଙ୍କ ଦଳ(ଏସ୍‌ପି) ଓ ବିରୋଧୀଙ୍କ ‘ନିରବତା’ ଉପରେ ପ୍ରଶ୍ନ ଉଠାଇଥିଲେ । ଉତ୍ତରପ୍ରଦେଶରେ ଏହାକୁ ନେଇ ଏକ ଏଫ୍ଆଇଆର୍ ରୁଜୁ କରାଯାଇଛି । ତେବେ ମଣିପୁର ହିଂସା ଭଳି ଘଟଣାରେ ସମାନ ଦୃଢ଼ତା ପ୍ରଦର୍ଶନ କରାଗଲେ ଏନ୍‌ଡିଏର ଆକ୍ରୋଶ ଅଧିକ ଅର୍ଥପୂର୍ଣ୍ଣ ହେବ ବୋଲି ଡିମ୍ପଲ ଯାଦବ କହିଛନ୍ତି ।

Advertisment

ଏକ ମସଜିଦରେ ହୋଇଥିବା ଏକ ସଭାରେ ଶାଢ଼ି ପିନ୍ଧିଥିବାରୁ ଡିମ୍ପଲ ଯାଦବଙ୍କୁ ନେଇ ମୌଲାନା ସାଜିଦ ରସିଦ ବିବାଦୀୟ ମନ୍ତବ୍ୟ ଦେଇଥିବା ଜଣାପଡ଼ିଛି । ସେ ତାଙ୍କୁ ଅନ୍ୟ ଜଣେ ମହିଳା ଏସ୍‌ପି ସାଂସଦ ଇକ୍ରା ହାସନଙ୍କ ସହ ତୁଳନା କରିଥିଲେ, ଯିଏ କି ତାଙ୍କ ମୁଣ୍ଡକୁ ହିଜାବ ଦ୍ୱାରା ଘୋଡ଼ାଇ ଥିଲେ । ଏକ ଟିଭି ବିତର୍କ ସମୟରେ ଦିଆଯାଇଥିବା ଏହି ମନ୍ତବ୍ୟକୁ ଭାରତୀୟ ଜନତା ପାର୍ଟିର ବାଂସୁରୀ ସ୍ୱରାଜ ଓ କଂଗ୍ରେସର ରେଣୁକା ଚୌଧୁରୀଙ୍କ ସମେତ ମହିଳା ସାଂସଦମାନେ ସୋସିଆଲ ମିଡିଆରେ ବ୍ୟାପକ ନିନ୍ଦା କରିଥିଲେ । ଶାସକ ଏନ୍‌ଡିଏ ସାଂସଦମାନେ, ବିଶେଷକରି ମହିଳା ସଦସ୍ୟମାନେ ସଂସଦ ଭବନ ପରିସରରେ ମକର ଦ୍ୱାର ନିକଟରେ ବିକ୍ଷୋଭ ପ୍ରଦର୍ଶନ କରି ‘ନାରୀ ଶକ୍ତି କା ଅପମାନ, ନହି ସହେଗା ହିନ୍ଦୁସ୍ତାନ’ ଭଳି ସ୍ଲୋଗାନ ଦେଇଥିଲେ । 

ଡିମ୍ପଲ ଯାଦବଙ୍କ ସ୍ୱାମୀ ସପା ନେତା ଅଖିଳେଶ ଯାଦବ ଏବଂ ବ୍ୟାପକ ବିରୋଧୀଙ୍କ ନିରବତାକୁ ନେଇ ପ୍ରଶ୍ନ ଉଠାଇ ବାଂସୁରୀ ଏହି ମନ୍ତବ୍ୟକୁ ଅତ୍ୟନ୍ତ ଲଜ୍ଜାଜନକ ଓ ଅଗ୍ରହଣୀୟ ବୋଲି କହିଛନ୍ତି । ମହିଳାଙ୍କ ସମ୍ମାନ ଅପେକ୍ଷା ବିରୋଧୀ ‘ତୁଷ୍ଟୀକରଣ ରାଜନୀତି’କୁ ପ୍ରାଥମିକତା ଦେଉଛନ୍ତି ବୋଲି ସେ ଅଭିଯୋଗ କରିବା ସହ ଡିମ୍ପଲ ଯାଦବଙ୍କ ସମେତ ପ୍ରତ୍ୟେକ ମହିଳାଙ୍କ ପାଇଁ ଏନ୍‌ଡିଏ ସ୍ୱର ଉତ୍ତୋଳନ ଜାରି ରଖିବ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି । ଜନତା ଦଳ ୟୁନାଇଟେଡ୍ ସାଂସଦ ଲଭଲି ଆନନ୍ଦ ମୌଲାନାଙ୍କୁ କ୍ଷମା ମାଗିବାକୁ ଦାବି କରିଛନ୍ତି । ସେ ସପା ମୁଖ୍ୟ ଅଖିଳେଶ ଯାଦବଙ୍କୁ ତାଙ୍କ ପତ୍ନୀ ଡିମ୍ପଲ ଯାଦବଙ୍କ ସହ ଠିଆ ହେବାକୁ କହିଛନ୍ତି । ଅନ୍ୟପକ୍ଷରେ ଲକ୍ଷ୍ନୌରେ ସ୍ଥାନୀୟ ବାସିନ୍ଦା ପ୍ରବେଶ ଯାଦବଙ୍କ ଅଭିଯୋଗ କ୍ରମେ ରବିବାର ସନ୍ଧ୍ୟାରେ ବିଭୂତିଖଣ୍ଡ ଥାନାରେ ଏତଲା ରୁଜୁ ହୋଇଛି ।