IND vs AUS Semi-final: ମ୍ୟାଚ୍‌ ପୂର୍ବରୁ ପିଚ୍‌ରେ ବଡ଼ ପରିବର୍ତ୍ତନ ! ବଢ଼ିବ କି ଟିମ୍‌ ଇଣ୍ଡିଆର ସମସ୍ୟା ?

କନକ ବ୍ୟୁରୋ: ଆଉ ଅଳ୍ପ ସମୟ ମଧ୍ୟରେ ଚାମ୍ପିୟନ୍ସ ଟ୍ରଫିର ପ୍ରଥମ ସେମିଫାଇନାଲ ଖେଳାଯିବ । ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଉଭୟ ଦଳ ମୁହାଁମୁହିଁ ହେବେ । ମ୍ୟାଚ୍ ଭାରତୀୟ ସମୟ ଅନୁସାରେ ଅପରାହ୍ନ ୨.୩୦ରେ ଆରମ୍ଭ ହେବ ।  ଆଜି ଦୁବାଇରେ ପିଚ୍ କିପରି ରହିବ ? ବ୍ୟାଟରମାନେ ସହଜରେ ସ୍କୋର କରିବେ ନା ବୋଲରମାନେ ବିପର୍ୟ୍ୟୟ ଘଟାଇବେ ? ଏହା ସହିତ, ଭାରତ-ଅଷ୍ଟ୍ରେଲିଆ ସେମିଫାଇନାଲ ଦୁବାଇ ଷ୍ଟାଡିୟମର କେଉଁ ପିଚ୍‌ରେ ଖେଳାଯିବ । ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁସାରେ, ଭାରତ-ଅଷ୍ଟ୍ରେଲିଆ ସେମିଫାଇନାଲ ଏକ ନୂତନ ପିଚ୍‌ରେ ଖେଳାଯିବ । ଏହିପରି ଭାବରେ ଷ୍ଟାଡିୟମରେ ସମାନ ରହିବ କିନ୍ତୁ ପିଚ୍ ଭିନ୍ନ ହୋଇପାରେ । ତେବେ ଟସ୍‌ ପରେ ହିଁ ଭାରତ କେଉଁ ପିଚ୍‌ରେ ଖେଳୁଛି ତାହା ସ୍ପଷ୍ଟ ହେବ ।  

ଏଭଳି ଆଲୋଚନା ଏଥିପାଇଁ ହେଉଛି, ଏହା ପୂର୍ବରୁ ଭାରତୀୟ ଦଳ ବାଂଲାଦେଶ ଏବଂ ପାକିସ୍ତାନ ବିପକ୍ଷରେ ଭିନ୍ନ ଭିନ୍ନ ପିଚରେ ଖେଳିଥିଲା । କିନ୍ତୁ ଯଦି ଭାରତ-ଅଷ୍ଟ୍ରେଲିଆ ସେମିଫାଇନାଲ ଏକ ନୂତନ ପିଚ୍‌ରେ ହୁଏ, ତେବେ ସ୍ଥିତି କେତେ ପରିବର୍ତ୍ତନ ହୋଇପାରେ ? କ୍ରିକେଟ ବିଶେଷଜ୍ଞମାନେ କହିଛନ୍ତି ଯେ, ଯଦି ମ୍ୟାଚ୍ ନୂତନ ପିଚ୍‌ରେ ଖେଳାଯାଏ, ତେବେ ପିଚ୍‌ର ବ୍ୟବହାର ଭିନ୍ନ ରହିବ ।  ଏହି ପିଚ୍ ବାଂଲାଦେଶ, ପାକିସ୍ତାନ ଏବଂ ନ୍ୟୁଜିଲ୍ୟାଣ୍ଡ ବିପକ୍ଷରେ ଯେପରି ଖେଳିଥିଲା, ସେପରି ଆଉ କେବେ ଖେଳାଇ ନପାରେ । ଯାହା ଉଭୟ ଦଳ ପାଇଁ ଚିନ୍ତାର କାରଣ ପାଲଟି ପାରେ ।  ବର୍ତ୍ତମାନ, ଏମିରେଟ୍ସ କ୍ରିକେଟ୍ ବୋର୍ଡ ICCର ତତ୍ତ୍ୱାବଧାନରେ ଏକ ନୂତନ ପିଚ୍ ପ୍ରସ୍ତୁତ କରିବାରେ ବ୍ୟସ୍ତ ଥିଲା ବୋଲି ରିପୋର୍ଟ ଆସିଥିଲା । ଦୁବାଇ ଷ୍ଟାଡିୟମରେ ଅଷ୍ଟ୍ରେଲିଆର ମାଥ୍ୟୁ ସାଣ୍ଡ୍ରି କ୍ୟୁରେଟର ଭୂମିକା ନିର୍ବାହ କରିଥିଲେ । 

 ପୂର୍ବ ପିଚ୍‌କୁ ଦୃଷ୍ଟିରେ ରଖି ଟିମ୍ ଇଣ୍ଡିଆ ନ୍ୟୁଜିଲ୍ୟାଣ୍ଡ ବିପକ୍ଷରେ ୪ ଜଣ ସ୍ପିନରଙ୍କୁ ଖେଳାଇଥିଲା । ସେହି ମ୍ୟାଚ୍‌ରେ ବରୁଣ ଚକ୍ରବର୍ତ୍ତୀ, କୂଳଦୀପ ଯାଦବ, ରବିନ୍ଦ୍ର ଜାଡେଜା ଏବଂ ବରୁଣ ଚକ୍ରବର୍ତ୍ତୀ ଚୂଡ଼ାନ୍ତ  ଏକାଦଶର ଅଂଶ ଥିଲେ । ଯଦି ଏକ ନୂତନ ପିଚ୍ରେ ଖେଳ ହୁଏ , ତେବେ ସ୍ପିନରମାନଙ୍କ ପାଇଁ ବଲକୁ ସ୍ପିନ୍‌ କରାଇବା ସହଜ ହେବ ନାହିଁ । ଏପରି ପରିସ୍ଥିତିରେ, ଏହା ଭାରତୀୟ ଦଳ ପାଇଁ ଏକ ବଡ଼ ବିପର୍ଯ୍ୟୟର କାରଣ ହୋଇପାରେ ।  କାରଣ ସ୍ପିନ୍ ବୋଲିଂ ଭାରତୀୟ ଦଳର ଶକ୍ତିଶାଳୀ ବିଭାଗ ରହି ଆସିଛି । ଭାରତୀୟ ସ୍ପିନର ବରୁଣ ଚକ୍ରବର୍ତ୍ତୀ ନ୍ୟୁଜିଲାଣ୍ଡ ବିପକ୍ଷରେ ୫ ୱିକେଟ୍ ନେଇଥିଲେ । ଯଦି ପିଚ୍‌ର ପ୍ରକୃତିରେ ପରିବର୍ତ୍ତନ ହୁଏ, ତେବେ ବରୁଣ ଚକ୍ରବର୍ତ୍ତୀଙ୍କ ସହିତ ଅନ୍ୟ ଭାରତୀୟ ସ୍ପିନରମାନଙ୍କ ପାଇଁ ସମସ୍ୟା ସୃଷ୍ଟି ହୋଇପାରେ ।