ଦିଲ୍ଲୀକୁ ମିଳିବ ପ୍ରଦୂଷଣ-ଟ୍ରାଫିକ୍ ଜାମ୍‌ରୁ ମୁକ୍ତି ; ୯ଟି ବଡ଼ ପ୍ରକଳ୍ପକୁ ମିଳିଲା ମଞ୍ଜୁରୀ

କନକ ବ୍ୟୁରୋ : ରାଜଧାନୀ ଦିଲ୍ଲୀବାସୀଙ୍କ ପାଇଁ ଏକ ବଡ଼ ଆଶ୍ୱସ୍ତିକର ଖବର । ଦିଲ୍ଲୀକୁ ଟ୍ରାଫିକ ଜାମ୍ ଏବଂ ପ୍ରଦୂଷଣ ମୁକ୍ତ କରିବା ପାଇଁ କେନ୍ଦ୍ର ସରକାର ପ୍ରାୟ ୨୪,୦୦୦ କୋଟି ଟଙ୍କାର ୯ଟି ବୃହତ୍ତ ଭିତ୍ତିଭୂମି ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି । ଏହି ପ୍ରକଳ୍ପଗୁଡ଼ିକ ୨୦୨୭ ସୁଦ୍ଧା ସମ୍ପୂର୍ଣ୍ଣ ହେବାର ଲକ୍ଷ୍ୟ ରଖାଯାଇଛି, ଯାହା ଦିଲ୍ଲୀ-ଏନସିଆରରେ ଯାତାୟାତକୁ ସହଜ କରିବା ସହ ପ୍ରଦୂଷଣ ସ୍ତରକୁ ମଧ୍ୟ ହ୍ରାସ କରିବ । ଏହି ମେଗା ଯୋଜନାରେ ମେଟ୍ରୋ ସମ୍ପ୍ରସାରଣ, ଟନେଲ୍, ଫ୍ଲାଏଓଭର ଏବଂ ନୂତନ ସଡ଼କ ନିର୍ମାଣ ପ୍ରକଳ୍ପ ଆଦି ସାମିଲ ରହିଛି ।

ମୁଖ୍ୟ ପ୍ରକଳ୍ପଗୁଡ଼ିକ:

• ପିଙ୍କ୍ ଲାଇନ୍ ମେଟ୍ରୋ ସମ୍ପ୍ରସାରଣ: ଏକ ବଡ଼ ପଦକ୍ଷେପ ସ୍ୱରୂପ, ପିଙ୍କ୍ ଲାଇନ୍ ମେଟ୍ରୋକୁ ମଜଲିସ୍ ପାର୍କରୁ ମୌଜପୁର ପର୍ଯ୍ୟନ୍ତ ୧୨.୩ କିଲୋମିଟର ସମ୍ପ୍ରସାରଣ କରାଯିବ । ଏହାଦ୍ୱାରା ଦିଲ୍ଲୀର ପ୍ରଥମ ମେଟ୍ରୋ ରିଙ୍ଗ୍ ରୋଡ୍ ସମ୍ପୂର୍ଣ୍ଣ ହେବ । ଯାହା ଲକ୍ଷ ଲକ୍ଷ ଯାତ୍ରୀଙ୍କୁ ସହରର ବିଭିନ୍ନ ପ୍ରାନ୍ତକୁ ସହଜରେ ଯାତାୟତ କକିବାରେ ସାହାଯ୍ୟ କରିବ ।

• ଏମ୍ସରୁ ମହିପାଲପୁର ଏଲିଭେଟେଡ୍ କରିଡର : ଦକ୍ଷିଣ ଦିଲ୍ଲୀରେ ଟ୍ରାଫିକ୍‌ ସମସ୍ୟା ଦୂର କରିବା ପାଇଁ ଏମ୍ସରୁ ମହିପାଲପୁର ବାଇପାସ୍ ପର୍ଯ୍ୟନ୍ତ ଏକ ନୂତନ ଏଲିଭେଟେଡ୍ କରିଡର ନିର୍ମାଣ କରାଯିବ । ଏହା ବିମାନବନ୍ଦରକୁ ଯାଉଥିବା ଯାତ୍ରୀଙ୍କ ପାଇଁ ଯାତ୍ରା ସମୟକୁ ଯଥେଷ୍ଟ କମ୍ କରିବ ।

• ଶିବ ମୂର୍ତ୍ତିରୁ ବସନ୍ତ କୁଞ୍ଜ ଟନେଲ୍: ୫ କିଲୋମିଟର ଲମ୍ବର ଏକ ଟନେଲ୍ ଶିବ ମୂର୍ତ୍ତିରୁ ବସନ୍ତ କୁଞ୍ଜକୁ ସଂଯୋଗ କରିବ । ଯାହାର ଲକ୍ଷ୍ୟ ଜାତୀୟ ରାଜପଥ ୪୮ରେ ଗାଡ଼ି ଚଳାଚଳକୁ ସୁଗମ କରିବ । 

• ବାହ୍ୟ ଦିଲ୍ଲୀର ବିକାଶ: ବାହ୍ୟ ଦିଲ୍ଲୀର ଟ୍ରାଫିକ୍ ସମସ୍ୟାକୁ ଦୃଷ୍ଟିରେ ରଖି ଅର୍ବାନ ଏକ୍ସଟେନସନ୍ ରୋଡ୍-୨ ଏବଂ ଗୁରୁଗ୍ରାମ-ଜୟପୁର ରାଜପଥରେ ନୂଆ ଫ୍ଲାଏଓଭର ଓ ଅଣ୍ଡରପାସ୍ ନିର୍ମାଣ କରାଯିବ । ଏହା ସହିତ ରୋହିଣୀ, ନରେଲା ଏବଂ ବାୱାନାକୁ ସଂଯୋଗ କରିବା ପାଇଁ ନୂଆ ସଡ଼କ ମଧ୍ୟ ନିର୍ମାଣ କରିବାର ପ୍ରକଳ୍ପରେ ରହିଛି ।

• ନୂଆଦିଲ୍ଲୀ ରେଳ ଷ୍ଟେସନର ପୁନଃବିକାଶ: ଯାତ୍ରୀଙ୍କ ସୁବିଧା ବଢ଼ାଇବା ସହିତ ଷ୍ଟେସନ ବାହାରେ ଗାଡ଼ି ଚଳାଚଳକୁ ସୁବ୍ୟବସ୍ଥିତ କରିବା ପାଇଁ ନୂଆଦିଲ୍ଲୀ ରେଳ ଷ୍ଟେସନର ପୁନଃବିକାଶ କରାଯିବ ।

ଏହି ସମସ୍ତ ପ୍ରକଳ୍ପ କାର୍ଯ୍ୟକାରୀ ହେଲେ ଦିଲ୍ଲୀର ଟ୍ରାଫିକ୍ ମାନଚିତ୍ର ବଦଳିଯିବ ବୋଲି ଆଶା କରାଯାଉଛି । ଗାଡ଼ି ଚଳାଚଳ ସହଜ ହେବା ଦ୍ୱାରା ଇନ୍ଧନ ବଞ୍ଚିବ ଏବଂ ଏହା ସିଧାସଳଖ ବାୟୁ ପ୍ରଦୂଷଣ ହ୍ରାସ କରିବାରେ ସହାୟକ ହେବ ।