କନକ ବ୍ୟୁରୋ: ଦୀର୍ଘଦିନର ଅପେକ୍ଷାର ଘଟିଛି ଅନ୍ତ। ରାୟଗଡ଼ାର ମା’ ମଝିଘରିଆଣୀଙ୍କ ମନ୍ଦିରର ନବକଳେବର ନେଇ ସମ୍ପୂର୍ଣ୍ଣ ପ୍ରକଳ୍ପ ରିପୋର୍ଟ ସହ ନକ୍ସା ପ୍ରସ୍ତୁତ ହୋଇଛି। ଯାହାକୁ ନେଇ ରାୟଗଡ଼ାରେ ଖେଳିଯାଇଛି ଖୁସିର ଲହରୀ। 

Advertisment

ରାୟଗଡ଼ାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣିଙ୍କ ମନ୍ଦିରର ଉନ୍ନତିକରଣ ପାଇଁ ସରିଛି ଭୂମି ପୂଜନ। ମା’ଙ୍କ ମନ୍ଦିରଟି ୦.୫ ଏକର ଜମିରେ ନିର୍ମିତ। ମନ୍ଦିର ଚାରିପଟେ ରେଳ ବିଭାଗର ଜମି ଥିବାରୁ ହୋଇପାରୁନଥିଲା ଉନ୍ନତିକରଣ। ୨୦୨୩ରେ ମନ୍ଦିରକୁ ମାଗଣାରେ ଜମି ଦେବାକୁ ଘୋଷଣା କରିଥିଲେ ତତ୍କାଳୀନ ସରକାର। ରେଳ ବିଭାଗର ୬.୩ ଏକର ଜମି ରାଜ୍ୟ ସରକାରଙ୍କ ରାଜସ୍ୱ ବିଭାଗ ଖାତାକୁ ଆସିବା ପରେ ମନ୍ଦିର କର୍ତ୍ତୃପକ୍ଷଙ୍କୁ ମାଗଣାରେ ପ୍ରଦାନ କରାଯାଇଛି। ୧୮ ମାସ ମଧ୍ୟରେ କାମ ସରିବାକୁ ଲକ୍ଷ୍ୟ ରଖିଛନ୍ତି ପୂର୍ତ୍ତ ଓ ଗୃହ ନିର୍ମାଣ ବିଭାଗ।  

୩୬ କୋଟି ଟଙ୍କା ବ୍ୟୟରେ ମନ୍ଦିର ଉନ୍ନତୀକରଣ ଦାୟିତ୍ବ ନେଇଛି ବ୍ରହ୍ମପୁରର କାଶୀ କାଞ୍ଚନ ପ୍ରାଇଭେଟ୍ ଲିମିଟେଡ୍‌। ମନ୍ଦିରର ନକ୍ସା ପ୍ରସ୍ତୁତ ହୋଇଛି।  ମା’ଙ୍କ ନିଜସ୍ୱ ଜମିରେ ନିର୍ମାଣ ହେବ ଭବ୍ୟ ମନ୍ଦିର। ଅବଶିଷ୍ଟ ୬.୩ ଏକର ଜମିରେ ୨ ମହଲା ବିଶିଷ୍ଟ ନୂଆ ଘର କରାଯିବ। ସେଠାରେ ମନ୍ଦିର ଟ୍ରଷ୍ଟ ବୋର୍ଡ ଅଫିସ, ମାନସିକଧାରୀଙ୍କ ମୁଣ୍ଡନ ଗୃହ, ଯାତ୍ରୀନିବାସ, ପାର୍କିଂ, ମାର୍କେଟ କମ୍ପ୍ଲେକ୍ସ, ଅନ୍ନ ପ୍ରସାଦ ସେବନ କେନ୍ଦ୍ର ରହିବ। ସେହିଭଳି ମନ୍ଦିରର ୩ ଦିଗରେ ୩ଟି ମୁଖ୍ୟଦ୍ୱାର ନିର୍ମାଣ ହେବ। ପୁରାତନ ପାଦ ମନ୍ଦିରର ଉନ୍ନତୀକରଣ କରାଯିବ। ଭକ୍ତଙ୍କ ପାଇଁ ଶୌଚାଳୟ, ସ୍ନାନାଗାର କରିବାକୁ ଯୋଜନା ହୋଇଛି।

ମା’ଙ୍କ ମନ୍ଦିର ନବକଳେବର କରାଗଲେ ଏହା ପର୍ଯ୍ୟଟନସ୍ଥଳୀର ମାନ୍ୟତା ପାଇବା ସହ ଅନ୍ୟ ରାଜ୍ୟରୁ ଭକ୍ତଙ୍କ ସୁଅ ଛୁଟିବ ଏଥିରେ ସନ୍ଦେହ ନାହିଁ ।