ରାପିଡୋ କରିବ ଫୁଡ୍ ଡେଲିଭରି: ସ୍ୱିଗି, ଜୋମାଟୋକୁ ଦେବ ଟକ୍କର

କନକ ବ୍ୟୁରୋ: ବାଇକ୍ ଟ୍ୟାକ୍ସି ପାଇଁ ପ୍ରସିଦ୍ଧ କମ୍ପାନି ରାପିଡୋ ଏବେ ସ୍ୱିଗି ଏବଂ ଜୋମାଟୋ ସହିତ ପ୍ରତିଯୋଗିତା କରିବା ପାଇଁ ଫୁଡ୍ ଡେଲିଭରି ଫିଲ୍ଡରେ ପ୍ରବେଶ କରିଛି । କମ୍ପାନି ନିଜସ୍ୱ ଖାଦ୍ୟ ବିତରଣ ସେବାର ପରୀକ୍ଷଣ ଆରମ୍ଭ କରିଛି, ବର୍ତ୍ତମାନ ଏହି ସେବା ଟ୍ରାଏଲ୍ ପର୍ଯ୍ୟାୟରେ ଅଛି ଏବଂ କେବଳ କିଛି ମନୋନୀତ ଅଞ୍ଚଳରେ ଆରମ୍ଭ କରାଯାଇଛି । ରାପିଡୋର ଏହି ସେବାର ନାଁ ଓନଲ୍ଲି । ତେବେ ଆସନ୍ତୁ ଜାଣିବା ରାପିଡୋ କେଉଁ ଅଞ୍ଚଳରେ କେବେ ଫୁଡ୍ ଡେଲିଭରି ସେବା ଆରମ୍ଭ କରିବ । 

ରିପୋର୍ଟ ଅନୁଯାୟୀ, ଓନଲି କମ୍ପାନୀ ଆପଣଙ୍କୁ ସ୍ୱିଗି ଏବଂ ଜୋମାଟୋ ତୁଳନାରେ ପ୍ରାୟ 15 ପ୍ରତିଶତ କମ୍ ମୂଲ୍ୟରେ ଖାଦ୍ୟ ଯୋଗାଇବ । ଏହା ସମ୍ଭବ କାରଣ ଏହା ଏହାର ପ୍ରତିଯୋଗୀମାନଙ୍କ ପରି ରେଷ୍ଟୁରାଣ୍ଟଗୁଡ଼ିକରୁ 30 ପ୍ରତିଶତ ପର୍ଯ୍ୟନ୍ତ କମିସନ ନେଇନାହିଁ । ଏହା ବଦଳରେ, ଏହା ପ୍ରତି ଅର୍ଡର ପାଇଁ ଏକ ସ୍ଥିର ଶୁଳ୍କ ମଡେଲରେ କାମ କରିବ ।

ରାପିଡୋ ଡେଲିଭରି ଜୋନ୍ ସୀମିତ ରଖିବ ଯାହାର ଦୁଇଟି ଲାଭ ହେବ, ପ୍ରଥମ ଲାଭ ଇନ୍ଧନ ଖର୍ଚ୍ଚ ଏବଂ ବ୍ୟବହାର ହ୍ରାସ ପାଇବ ଏବଂ ଦ୍ୱିତୀୟ ଲାଭ ହେବ ଯେ ରେଷ୍ଟୁରାଣ୍ଟରୁ ଗ୍ରାହକଙ୍କ ପାଖରେ ଖାଦ୍ୟ ଶୀଘ୍ର ପହଞ୍ଚିବ । ରିପୋର୍ଟରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ମେନୁ ଏପରି ଭାବରେ ପ୍ରସ୍ତୁତ କରାଯିବ ଯାହା ଦ୍ଵାରା ରେଷ୍ଟୁରାଣ୍ଟର ମାର୍ଜିନକୁ ପ୍ରଭାବିତ ନକରି ଗ୍ରାହକମାନଙ୍କୁ ସର୍ବାଧିକ ଲାଭ ଦିଆଯାଇପାରିବ । ରାପିଡୋର ଏହି ଉଦ୍ଦେଶ୍ୟ ସହିତ, ଏହା ମନେ ହେଉଛି ଯେ ରାପିଡୋର ଏହି ନୂତନ ସେବା ଶସ୍ତା ହାରରେ ଖାଦ୍ୟ ଯୋଗାଇ ସ୍ୱିଗି ଏବଂ ଜୋମାଟୋ ପାଇଁ ସମସ୍ୟା ସୃଷ୍ଟି କରିପାରେ ।

ପ୍ରତିଷ୍ଠାତା ଏବଂ ମୁଖ୍ୟ କାର୍ଯ୍ୟନିର୍ବାହୀ ଅରବିନ୍ଦ ସାଙ୍କା କହିଛନ୍ତି ଯେ ବେଙ୍ଗାଲୁରୁର ବାଇରାସାଣ୍ଡ୍ରା, ମାଡିୱାଲା ଲେଆଉଟ୍, ଟାଭାରେକେରେ, କୋରାମଙ୍ଗଲା ଏବଂ ହୋସୁର ସରଜାପୁରା ରୋଡ୍ ଅଞ୍ଚଳରେ ଓନଲ୍ଲି ସେବା ଆରମ୍ଭ କରାଯାଇଛି । ରାପିଡୋ ଏହାର ସମ୍ପୂର୍ଣ୍ଣ ମାଲିକାନା ଥିବା ସହାୟକ କମ୍ପାନି Ctrlx ଟେକ୍ନୋଲୋଜି ମାଧ୍ୟମରେ ଓନଲି ଆରମ୍ଭ କରିଛି ।

ରାପିଡୋ ୨୦୧୫ ମସିହାରେ ବାଇକ୍ ଟ୍ୟାକ୍ସି ସହିତ ଆରମ୍ଭ କରିଥିଲା, ତା’ପରେ ଅଟୋ ରିକ୍ସା, ପାର୍ସଲ ଡେଲିଭରି, ତୃତୀୟ-ପକ୍ଷ ଲଜିଷ୍ଟିକ୍ସ ଏବଂ ବର୍ତ୍ତମାନ କ୍ୟାବ୍ ସେବା ପର୍ଯ୍ୟନ୍ତ ବିସ୍ତାରିତ ହୋଇଥିଲା । ଏହାସହ ରାପିଡୋ ବ୍ୟାଟେରୀ-ସ୍ୱାପିଂ ଇଲେକ୍ଟ୍ରିକ୍ ଦୁଇଚକିଆ ଯାନ ପାଇଁ ତାଇୱାନର ଗୋଗୋରୋ କମ୍ପାନି ସହିତ ମଧ୍ୟ ହାତ ମିଳାଇଛି । ଏହାପରେ ରାପିଡୋ ବର୍ତ୍ତମାନ ଫୁଡ୍ ଡେଲିଭରି ଫିଲ୍ଡରେ ପାଦ ଥାପିଛି । ଦେବେ ଦେଖିବା ବାକି ରହିଲା ରାପିଡୋ ସ୍ବିଗି ଜୋମାଟୋ ଭଳି ଗ୍ରାହକଙ୍କ ବିଶ୍ୱାସ ଜିତିପାରୁଛି ନା ନାହିଁ ।