ଅଗଷ୍ଟ ୯ରେ ରାକ୍ଷୀ ପୂର୍ଣ୍ଣିମା, ଜାଣନ୍ତୁ ସକାଳ କେତେଟାରୁ ଆରମ୍ଭ ହେଉଛି ଶୁଭ ମୁହୂର୍ତ୍ତ

କନକ ବ୍ୟୁରୋ:  ଭାଇ ଓ ଭଉଣୀଙ୍କ ପବିତ୍ର ସମ୍ପର୍କର ପର୍ବ ହେଉଛି ରାକ୍ଷୀ ପୂର୍ଣ୍ଣିମା । ଯାହାକୁ ରକ୍ଷା ବନ୍ଧନ ମଧ୍ୟ କୁହାଯାଏ । ହିନ୍ଦୁ ପଞ୍ଚାଙ୍ଗ ଅନୁଯାୟୀ, ଏହି ପର୍ବ ପ୍ରତିବର୍ଷ ଶ୍ରାବଣ ମାସର ପୂର୍ଣ୍ଣିମା ତିଥିରେ ପାଳନ କରାଯାଏ । ୨୦୨୫ ମସିହାରେ ରାକ୍ଷୀ ବନ୍ଧନ ପର୍ବର ତାରିଖ, ଶୁଭ ମୁହୂର୍ତ୍ତ, ଭଦ୍ରା କାଳ ଏବଂ ରାହୁ କାଳକୁ ନେଇ ସମ୍ପୂର୍ଣ୍ଣ ବିବରଣୀ ଜାଣନ୍ତୁ  । ରକ୍ଷା ବନ୍ଧନ ଅଗଷ୍ଟ ୯ ତାରିଖ, ଶନିବାର ଦିନ ପାଳନ କରାଯିବ ।  ପୂର୍ଣ୍ଣିମା ତିଥି ଅଗଷ୍ଟ ୮ ତାରିଖ (ଶୁକ୍ରବାର) ଅପରାହ୍ନ ୨ଟା ୧୨ ମିନିଟରୁ ଆରମ୍ଭ ହୋଇ ଅଗଷ୍ଟ ୯ ତାରିଖ (ଶନିବାର) ଦିନ ଅପରାହ୍ନ ୧ଟା ୨୪ ମିନିଟରେ ସମାପ୍ତ ହେବ । ହିନ୍ଦୁ ଧର୍ମରେ ଉଦୟା ତିଥିକୁ ଗୁରୁତ୍ୱ ଦିଆଯାଉଥିବାରୁ ଅଗଷ୍ଟ ୯ ତାରିଖରେ ହିଁ ଏହି ପର୍ବ ପାଳନ କରାଯିବ ।  

ରାକ୍ଷୀ ବାନ୍ଧିବାର ଶୁଭ ମୁହୂର୍ତ୍ତ
 ରାକ୍ଷୀ ବାନ୍ଧିବା ପାଇଁ ଏକ ଦୀର୍ଘ ଶୁଭ ସମୟ ରହିଛି । ଭଉଣୀମାନେ ନିଜ ଭାଇମାନଙ୍କୁ ରାକ୍ଷୀ ବାନ୍ଧିବା ପାଇଁ ଶୁଭ ମୁହୂର୍ତ୍ତଗୁଡ଼ିକ ହେଲା:
ପ୍ରାତଃକାଳୀନ ମୁହୂର୍ତ୍ତ: ସକାଳ ୫ଟା ୪୭ ମିନିଟରୁ ଅପରାହ୍ନ ୧ଟା ୨୪ ମିନିଟ୍ ପର୍ଯ୍ୟନ୍ତ ।  ଏହି ସମୟ ପ୍ରାୟ ୭ ଘଣ୍ଟା ୩୭ ମିନିଟ୍ ଧରି ରହିବ ।  
ଅପରାହ୍ନ ମୁହୂର୍ତ୍ତ  : ଶାସ୍ତ୍ର ଅନୁଯାୟୀ, ଅପରାହ୍ଣ ସମୟ ରାକ୍ଷୀ ବାନ୍ଧିବା ପାଇଁ ସର୍ବୋତ୍ତମ ବୋଲି ବିବେଚନା କରାଯାଏ । ଅପରାହ୍ଣ ମୁହୂର୍ତ୍ତ ଦିନ ୧ଟା ୪୧ ମିନିଟରୁ ୨ଟା ୫୪ ମିନିଟ୍ ପର୍ଯ୍ୟନ୍ତ ରହିବ ।

ପ୍ରଦୋଷ କାଳ: ଯଦି କୌଣସି କାରଣବଶତଃ ଦିନରେ ରାକ୍ଷୀ ବାନ୍ଧିବା ସମ୍ଭବ ନ ହୁଏ, ତେବେ ସନ୍ଧ୍ୟାରେ ପ୍ରଦୋଷ କାଳରେ ମଧ୍ୟ ରାକ୍ଷୀ ବନ୍ଧାଯାଇ ପାରିବ ।