ବିସିସିଆଇ ଅଧ୍ୟକ୍ଷ ପଦରୁ ରୋଜର ବିନ୍ନିଙ୍କ ଇସ୍ତଫା; ରାଜୀବ ଶୁକ୍ଲା କାର୍ଯ୍ୟକାରୀ ଅଧ୍ୟକ୍ଷ

କନକ ବ୍ୟୁରୋ: ବିସିସିଆଇ ଅଧ୍ୟକ୍ଷ ପଦରୁ ରୋଜର ବିନ୍ନିଙ୍କ ଇସ୍ତଫା । ବୋର୍ଡ ଅଧ୍ୟକ୍ଷ ପଦରୁ ସେ ଇସ୍ତଫା ଦେଇଛନ୍ତି । ତେବେ ନୂଆ ଅଧ୍ୟକ୍ଷ ନିର୍ବାଚନ ପର୍ଯ୍ୟନ୍ତ ବର୍ତ୍ତମାନ ସମୟରେ ରାଜୀବ ଶୁକ୍ଲା ବିସିସଆଇର ଅଧ୍ୟକ୍ଷ ରହିବେ । ଏନେଇ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟ ମୁତାବକ, ବୁଧବାର ଆପେକ୍ସ କାଉନସିଲ୍ ବୈଠକ ବସିଥିଲା । ଯେଉଁଥିରେ ରାଜୀବ ଶୁକ୍ଲା ଅଧ୍ୟକ୍ଷତା କରିଥିଲେ । ତେବେ ଏଥର ଆପେକ୍ସ କାଉନସିଲ୍ ବୈଠକରେ ମୁଖ୍ୟ ପ୍ରସଙ୍ଗ ରହିଥିଲା ବିସିସିଆଇର ପ୍ରାୟୋଜକ । ନୂଆ ବିଲ୍ ପାସ୍ ହେବା ପରେ ଡ୍ରିମ୍ ୧୧ ଏବେ ବିସିସିଆଇ ସହିତ ଚୁକ୍ତି ବାତିଲ କରିଛି । ତେଣୁ ଏଭଳି ସମୟରେ ଏସିଆ କପ୍ ଆରମ୍ଭ ହେଉଥିବାରୁ, ବୋର୍ଡର ଆଗାମୀ ନିଷ୍ପତ୍ତି କଣ ହେବ ସେନେଇ ବୈଠକରେ ଆଲୋଚନା ହୋଇଥିଲା ।

ଅଢ଼େଇ ବର୍ଷ ପାଇଁ ପ୍ରାୟୋଜକ ଖୋଜୁଛି ବୋର୍ଡ

ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ଏହି ମିଟିଂରେ ଚର୍ଚ୍ଚା ହେଇଛି ଯେ ବିସିସିଆଇ ପାଖରେ ମାତ୍ର ଦୁଇ ସପ୍ତାହ ସମୟ ଅଛି । ଏହାରି ଭିତରେ ବୋର୍ଡ ପ୍ରାୟୋଜକ ଖୋଜୁଛି । ହେଲେ ପ୍ରାୟୋଜକ ଖୋଜିବାରେ କିନ୍ତୁ ସମୟ ଲାଗିପାରେ । ତେଣୁ ଏସିଆ କପରେ ଦଳ ବିନା ପ୍ରାୟୋଜକରେ ଖେଳିପାରେ । ତେବେ ଏହାସହ ବୋର୍ଡ ଆଗାମୀ ଅଢ଼େଇ ବର୍ଷ ପାଇଁ ପ୍ରାୟୋଜକ ଖୋଜୁଥିବା ଜଣାପଡ଼ିଛି । କାହିଁକି ନା ଆସନ୍ତା ୨୦୨୭ ଅକ୍ଟୋବର-ନଭେମ୍ବର ମାସରେ ଦିନିକିଆ ବିଶ୍ୱକପ୍ ଖେଳାଯିବାକୁ ଅଛି । ତେଣୁ ଏଥିପାଇଁ ବୋର୍ଡ ଟିମ୍ ଇଣ୍ଡିଆ ପାଇଁ ପ୍ରାୟୋଜକ ଖୋଜୁଛି ।

ଜାଣିରଖିବା ଉଚିତ ଯେ, ନୂଆ ଖେଳ ନୀତି ପାରିତ ହେବା ପରେ ଆସନ୍ତା ମାସରେ ବିସିସିଆଇର ନିର୍ବାଚନ ହୋଇପାରେ । ଯେଉଁଥିରେ କି ବିସିସିଆଇକୁ ନୂଆ ଅଧ୍ୟକ୍ଷ ମିଳିବ । ତେବେ ନୂଆ ଖେଳ ନୀତି ଲାଗୁ ହେବାକୁ ୪ରୁ ୫ ମାସ ସମୟ ଲାଗିପାରେ । ଯାହାର ଅର୍ଥ ଏହା ଯେ, ନୂଆ ଖେଳ ନୀତି କାରଣରୁ ନିର୍ବାଚନକୁ ସ୍ଥଗିତ ରଖାଯିବନି ।