ଆସୁଛି ରଜ: ଏବେଠୁ ଜମିଲାଣି ସଜବାଜ

କନକ ବ୍ୟୁରୋ: ଓଡିଶାର ଗଣ ପର୍ବ ରଜ । ପ୍ରତିବର୍ଷ ଓଡ଼ିଶାର ଘରେଘରେ ପାଳନ ହୁଏ ରଜ । ଦୋଳି ଲାଗେ, ଘରେ ପିଠା ପଣା ହୁଏ । ଝିଅ ମାନେ ନୂଆ ପୋଷାକ ପିନ୍ଧିଥାନ୍ତି । ଆଉ ବେଶ ଆନନ୍ଦ ଉଲ୍ଲାସର ସହ ରଜ ପର୍ବକୁ ପାଳନ କରାଯାଇଥାଏ । ରଜ ଆସିବାକୁ ଆଉ କିଛି ଦିନ ଥିବା ସବୁଠି ଆରମ୍ଭ ହେଲାଣି ରଜ ପ୍ରସ୍ତୁତି । 

ଦିନ କେଇଟା ପରେ ରଜ । ଚାଲିଲାଣି ସଜବାଜ । ଚଳଚଂଚଳ ପୁରପଲ୍ଲୀ । ଏଠି ତ ୨ ମାସ ପୂର୍ବରୁ ହୁଏ ରଜ ପ୍ରସ୍ତୁତି । ସ୍ବତନ୍ତ୍ର ଆଖଡ଼ା ଘରେ ଚାଲିଛି ପ୍ରସ୍ତୁତି । ଗାଁ ରଜ କମିଟି ଦ୍ବାରା ରଜ ମହୋତ୍ସବ ପାଇଁ ପିଲାଙ୍କୁ ନାଚ, ଗୀତର ପ୍ରଶିକ୍ଷଣ ଦିଆଯାଉଛି । ଛୋଟରୁ ବଡ଼, ପୁଅ-ଝିଅ ସମସ୍ତେ ନାଚରେ ଭାଗ ନେଇଥାନ୍ତି । ନାଚ-ଗୀତ ସହ ଦୋଳି ଓ ବିଭିନ୍ନ ଖେଳରେ ଜମେ ରଜ ମଉଜ । 

୧୫ ବର୍ଷ ହେବ ରଜପର୍ବକୁ ନିଆରା ଢଙ୍ଗରେ ପାଳନ କରୁଛନ୍ତି କଟକ ଜିଲ୍ଲା ନିଶ୍ଚିତକୋଇଲି ବ୍ଲକ ଗୋପପୁରବାସୀ । ଗାଁର ୫୦ରୁ ୬୦ ପିଲା ଦୈନିକ ୩ରୁ ୪ ଘଣ୍ଟା ନାଚ ସହିତ ବିଭିନ୍ନ ପ୍ରକାର ଖେଳ ଅଭ୍ୟାସ କରିଥାନ୍ତି । ନିଜ ଗାଁରେ ରଜ ପର୍ବକୁ ଏତେ ସୁନ୍ଦର ଭାବେ ପାଳନ କରାଯାଉଥିବାରୁ ସମସ୍ତେ ବେଶ ଖୁସି ଅନୁଭବ କରନ୍ତି । 

ପ୍ରତିବର୍ଷ ପରି ଚଳିତ ବର୍ଷ ରଜ ମହୋତ୍ସବକୁ ସୁରୁଖୁରୁରେ ଶେଷ କରିବାକୁ ଗାଁ ରଜ କମିଟି ତରଫରୁ ସମସ୍ତ ବ୍ୟବସ୍ଥା କରାଯାଇଛି ।