ସଫଳ ହେବେ ତ ଠାକରେ ବ୍ରଦର୍ସ ?

କନକ ବ୍ୟୁରୋ : ମହାରାଷ୍ଟ୍ର ରାଜନୀତିରେ ୨୦ ବର୍ଷ ତଳେ ପରସ୍ପର ଠାରୁ ଅଲଗା ହୋଇଯାଇଥିବା ଦୁଇ ଭାଇ ଆଜି ଗୋଟିଏ ମଞ୍ଚରେ ଏକାଠି ହୋଇଛନ୍ତି । ମହାରାଷ୍ଟ୍ର ନବନିର୍ମାଣ ସେନାର ମୁଖ୍ୟ ରାଜ୍ ଠାକରେ ଓ ଶିବସେନା (ଉଦ୍ଧବ ଗୋଷ୍ଠୀ) ନେତା ଉଦ୍ଧବ ଠାକରେ ଆଜି ମହାରାଷ୍ଟ୍ରର ତ୍ରିଭାଷୀ ମୁଦ୍ଦାକୁ ନେଇ ଗୋଟିଏ ମଞ୍ଚରେ ଏକାଠି ଦେଖିବାକୁ ମିଳିବେ । ଏହାକୁ ନେଇ ମହାରାଷ୍ଟ୍ରରେ ଅନେକ ରାଜନୈତିକ ସମୀକରଣ ଦେଖିବାକୁ ମିଳିବ ବୋଲି ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି ।

Advertisment

ମହାରାଷ୍ଟ୍ରରେ ତ୍ରିଭାଷା ସୂତ୍ର ଲାଗୁ କରିବାକୁ ନେଇ ସରକାର ଆଣିଥିବା ପ୍ରସ୍ତାବକୁ ରାଜ ଠାକରେ ଓ ଉଦ୍ଧବ ଠାକରେ କଡ଼ା ବିରୋଧ କରିଛନ୍ତି । ଏହାକୁ ନଜରରେ ରଖି ମହାରାଷ୍ଟ୍ର ସରକାର ଗୋଟିଏ ପାଦ ପଛକୁ ଫେରି ଏହି ଆଇନକୁ କିଛିଦିନ ପାଇଁ ସ୍ଥଗିତ ରଖିଛନ୍ତି । ଏହି ଅବସରରେ ଏହା ମରାଠୀମାନଙ୍କ ବିଜୟ ବୋଲି କହି ଏକ ଉତ୍ସବର ଆୟୋଜନ କରାଯାଇଛି । ଏହି ଉତ୍ସବରେ ଗୋଟିଏ ମଞ୍ଚରେ ଉଦ୍ଧବ ଠାକରେ ଓ ରାଜ୍ ଠାକରେ ଏକାଠି ହେବେ ।

୨୦ ବର୍ଷ ଭିତରେ ଉଭୟ ରାଜ ଠାକରେ ଓ ଉଦ୍ଧବ ଠାକରେ ରାଜନୈତିକ ଭାବେ ଅନେକ ଉତ୍ଥାନ ପତନ ଦେଖିଛନ୍ତି । ଏବେ ଆଗାମୀ ଦିନରେ ହେବାକୁ ଥିବା ମହାନଗରପାଳିକା ନିର୍ବାଚନର ଫଳାଫଳ ଉଭୟ ଭାଇଙ୍କ ରାଜନୈତିକ ଭବିଷ୍ୟତ ନିର୍ଣ୍ଣୟ କରିବ । ଏହାକୁ ନେଇ ବିରୋଧୀ କହିଛନ୍ତି କି, ଏହି ମେଳି ମରାଠୀମାନଙ୍କ ସ୍ୱାର୍ଥ ପାଇଁ ନୁହେଁ ବରଂ ମହାନଗରପାଳିକା ନିର୍ବାଚନ ପାଇଁ ।

ଏବେ ଆସନ୍ତୁ ଜାଣିବା ୨୦ ବର୍ଷ ଭିତରେ କେବେ କେବେ ଏକାଠି ହୋଇଛନ୍ତି ଦୁଇଭାଇ

୨୦୧୨ ଜୁଲାଇ ୧୭ ତାରିଖରେ ଉଦ୍ଧବ ଠାକରେ ଛାତିରେ ଯନ୍ତ୍ରଣା ଅନୁଭବ କରିବାରୁ ଲୀଲାବତି ହସ୍ପିଟାଲରେ ଭର୍ତ୍ତି ହୋଇଥିଲେ ଓ ରାଜ୍ ଠାକରେ ତାଙ୍କୁ ଦେଖିବାକୁ ଯାଇଥିଲେ
୨୦୧୫ ଜାନୁଆରି୧୦ ତାରିଖରେ ଜାହାଙ୍ଗୀର ଆର୍ଟ ଗ୍ୟାଲେରିରେ ଉଦ୍ଧବ ଠାକରେଙ୍କ ଫଟୋ ପ୍ରଦର୍ଶନୀ ଦେଖିବାକୁ ଯାଇଥିଲେ ରାଜ୍ ଠାକରେ
୨୦୧୫ ଡିସେମ୍ବର ୧୨ ତାରିଖରେ ଶରଦ ପାୱାରଙ୍କ ଅମୃତମହୋତ୍ସବ ଜନ୍ମଦିନରେ ଉଭୟ ଏକାଠି ହୋଇଥିଲେ
୨୦୧୯ ଜାନୁଆରି ୨୭ ତାରିଖରେ ରାଜ ଠାକରେଙ୍କ ପୁଅ ଅମିତ ଠାକରେଙ୍କ ବାହାଘରକୁ ଆସିଥିଲେ ଉଦ୍ଧବ ଠାକରେ
୨୦୧୯ ନଭେମ୍ବର ୨୮ ତାରିଖରେ ଉଦ୍ଧବ ଠାକରେଙ୍କ ମୁଖ୍ୟମନ୍ତ୍ରୀ ପଦ ପାଇଁ ଶପଥ ନେବା ବେଳେ ରାଜ ଠାକରେ ଉପସ୍ଥିତ ଥିଲେ
୨୦୨୧ ଜାନୁଆରି ୨୩ ତାରିଖରେ ବାଲା ସାହେବଙ୍କ ପୁଣ୍ୟକୃତ୍ତି ପ୍ରତିମା ଅନାବରଣ ବେଳେ ଉଭୟ ଏକାଠି ହୋଇଥିଲେ ।
୨୦୨୪ ଡିସେମ୍ବର ୨୨ ତାରିଖରେ ରାଜ୍ ଠାକରେଙ୍କ ଭଉଣୀ ଜୟବନ୍ତୀ ଠାକରେଙ୍କ ପୁଅ ବାହାଘରରେ ଉଭୟ ଏକାଠି ହୋଇଥିଲେ ।

ବାସ୍ତବରେ ୨୦୧୪ ଓ ୨୦୧୭ ମସିହାରେ ଶିବସେନା ଓ ମହାରାଷ୍ଟ୍ର ନବନିର୍ମାଣ ସେନା ଏକାଠି ହେବେ ବୋଲି ଚର୍ଚ୍ଚା ଜୋର ଧରିଥିଲା । ହେଲେ କିଏ କାହାକୁ ସମର୍ଥନ ଦେବେ ତାହା ସ୍ଥିର ହୋଇପାରି ନଥିଲା । ହେଲେ ଏବେ ରାଜନୈତିକ ପରିସ୍ଥିତି ଦୁଇଭାଇଙ୍କୁ ଏକାଠି କରିଥିବାରୁ ଏହା ମହାରାଷ୍ଟ୍ର ରାଜନୀତିକୁ କିଭଳି ପ୍ରଭାବିତ କରିବ ତାହା ଉପରେ ସମସ୍ତଙ୍କ ନଜର