ମେଡିକାଲ ଭିତରେ ଲହଡ଼ି ଭାଙ୍ଗୁଛି ବର୍ଷା ପାଣି ; ବାରଣ୍ଡାରେ ଚାଲିଛି ରୋଗୀସେବା

କନକ ବ୍ୟୁରୋ :  ସ୍ୱାଭିମାନ ଅଞ୍ଚଳରେ ବିପର୍ଯ୍ୟସ୍ତ ସ୍ବାସ୍ଥ୍ୟ ସେବା । ବର୍ଷା ହେଲେ ଡାକ୍ତରଖାନା ଭିତରେ ପାହାଡ଼ିଆ ପାଣି ପଶି ଆସୁଛି । ଏପରି ସ୍ଥିତିରେ ରୋଗୀଙ୍କୁ ସ୍ବାସ୍ଥ୍ୟ ସେବା ଯୋଗାଇବା ଏକପ୍ରକାର ଅସମ୍ଭବ ହୋଇପଡ଼ୁଛି । ପ୍ରତି ବର୍ଷ ଏ ସମସ୍ୟା ଉପୁଜୁଥିଲେ ମଧ୍ୟ ସମସ୍ୟାର ସମାଧାନ ଦିଗରେ ଧ୍ୟାନ ଦିଆଯାଉନଥିବା ଅଭିଯୋଗ ହୋଇଛି ।

ଗୋଟିଏରେ ଡାକ୍ତରଖାନା ଭିତରେ ପାଣି ଲହଡ଼ି ଭାଙ୍ଗୁଛି । ଅନ୍ୟଟିରେ ପାଣି ଛାଡ଼ିବା ପରେ କାଦୁଅ ପଚପଚ ପରିବେଶ । ଏ ଆଜିର ନୁହେଁ, ପ୍ରତି ବର୍ଷାଦିନେ ଏମିତି ସ୍ଥିତି ଉପୁଜେ । ରୋଗୀ ସେବା ଦୂରରେ ଥାଉ, ଆସବାବପତ୍ର ରକ୍ଷା କରିବା ଡାକ୍ତରଖାନା କର୍ତ୍ତୃପକ୍ଷଙ୍କ ପାଇଁ ବିରାଟ ଚ୍ୟାଲେଞ୍ଜ୍‌ ପାଲଟେ । ଡାକ୍ତରଖାନାରେ କାଦୁଅ ପାଣି ପ୍ରବାହିତ ହେଉଥିବାରୁ ବାରଣ୍ଡାରେ ରୋଗୀସେବା ଚାଲିଛି । ମେଡିକାଲର ସରଞ୍ଜାମ ସବୁ ନଷ୍ଟ ହୋଇଯାଇଛି । 

ଚିତ୍ରକୋଣ୍ଡା ବୁଡ଼ି ଅଞ୍ଚଳର ଯୋଡ଼ାଆମ୍ବ, ପଣସପୁଟ, ଗାଜୁଲମାମୁଡ଼ି, ଅଣ୍ଡରାପାଲି, ଯନ୍ତ୍ରୀ ଭଳି ୫ଟି ପଞ୍ଚାୟତର ଲୋକ ଏହି ଡାକ୍ତରଖାନା ଉପରେ ନିର୍ଭର କରନ୍ତି । ସ୍ବେଚ୍ଛାସେବୀ ସଂସ୍ଥା ଦ୍ବାରା ପରିଚାଳିତ ଏହି ଡାକ୍ତରଖାନାଟି ଆୟୁଷ ଡାକ୍ତରଙ୍କ ଭରସାରେ ଚାଲିଛି । ଆରୋଗ୍ୟ ମନ୍ଦିର ପରିସର ବାହାରେ ନାଳ ଓ ଗାର୍ଡ ୱାଲ୍ ନିର୍ମାଣ କାମ ଆରମ୍ଭ ହୋଇଥିବା ସହ ନୂତନ କୋଠା ଲାଗି ସରକାରଙ୍କୁ ପ୍ରସ୍ତାବ ଦେବା କଥା କହିଛନ୍ତି ସିଡିଏମ୍‌ଓ । ମାଲକାନଗିରି ସ୍ୱାଭିମାନ ଅଞ୍ଚଳର ବିକାଶ ଲାଗି ସରକାରଙ୍କ ସ୍ୱତନ୍ତ୍ର ଫୋକସ ରହିଥିବା କଥା ବାରମ୍ବାର କୁହାଯାଏ । ହେଲେ ଏଠାକାର ସ୍ୱାସ୍ଥ୍ୟସେବା ହିଁ ବିକାଶର ଅସଲ ଚିତ୍ର ବୟାନ କରୁଛି ।