କନକ ବ୍ୟୁରୋ : ବିହାର ରାଜନୀତି ସର୍ବଦା ଉତଥାନ-ପତନ ଦେଇ ଗତି କରୁଛି । ମେଣ୍ଟରେ ସାମିଲ ଦଳମାନଙ୍କ ଭିତରେ ମତଭେଦ ଓ ରଣନୀତି ନେଇ ବୁଝାମଣା ଦୈନିକ ନୂଆ କାହାଣୀ ସୃଷ୍ଟି କରୁଛି । ମେଣ୍ଟ ଭିତରେ ମତଭେଦ ଦୁଇ ଗୋଷ୍ଠୀ ମଧ୍ୟରେ ରହିଛି । ସେ ଏନଡିଏ ମେଣ୍ଟ କୁହନ୍ତୁ କି ଇଣ୍ଡିଆ ବ୍ଲକ । ଏବେ ଆମେ ଆଲୋଚନା କରିବା କେବଳ ବିହାରରେ ମହାମେଣ୍ଟକୁ ନେଇ । ବିହାରରେ ନିର୍ବାଚନ ତାରିଖ ଘୋଷଣା ପୂର୍ବରୁ ମହାମେଣ୍ଟର ସହଯୋଗୀଦଳମାନଙ୍କ ମଧ୍ୟରେ ଥିବା ମତଭେଦ ଦୂର କରିବାକୁ ଜୋରଦାର ପ୍ରୟାସ କରାଯାଇଛି । ଏହି କ୍ରମରେ ରାହୁଲ ଗାନ୍ଧୀ ଏକ ମାଷ୍ଟର ଷ୍ଟ୍ରୋକ୍ ଖେଳିଛନ୍ତି । ଭୋଟର ଅଧିକାର ଯାତ୍ରା କ୍ରମରେ ସେ ବିରୋଧୀ ମେଣ୍ଟକୁ ମଜବୁତ କରିଛନ୍ତି । ଏହା ଦ୍ୱାରା ବିହାର ବିରୋଧୀ ଦଳର ମୁଖ୍ୟମନ୍ତ୍ରୀ ଚେହେରା ତେଜସ୍ୱୀ ଯାଦବଙ୍କ ପାଇଁ ନିର୍ବର୍ାଚନୀ ମଇଦାନ ମଜବୁତ ହୋଇଛି । ଫଳରେ ତେଜସ୍ୱୀ ଯାଦବ ମେଣ୍ଟର ଅନ୍ୟସହଯୋଗୀ ଦଳ ନେତାମାନଙ୍କ ସହ ତେଜସ୍ୱୀ ସହଜ ଅନୁଭବ କରୁଛନ୍ତି । ବିଶେଷ କରି ପୂର୍ଣ୍ଣିଆର ନିର୍ଦ୍ଦଳୀୟ ସାଂସଦ ପପୁ ଯାଦବ ଓ ପୂର୍ବ ସିପିଆଇ ନେତା ତଥା ଏବେ କଂଗ୍ରେସର ପ୍ରବକ୍ତା ଥିବା ଡ. କହ୍ନେୟା କୁମାର ସହ ତେଜସ୍ୱୀଙ୍କର ଥିବା ପୂୁରୁଣା ମତଭେଦ ଦୂର ହୋଇଛି । 

Advertisment

ରାହୁଲ ଗାନ୍ଧୀଙ୍କ ଭୋଟ ଅଧିକାର ଯାତ୍ରା ରାଜନୈତିକ ମହଲରେ ହଲଚଲ ସୃଷ୍ଟି କରିଛି । ଅନେକ ରାଜନୈତିକ ବିଶ୍ଳେଷକ ଏହାକୁ ନିର୍ବାଚନୀ ରଣନୀତି ବୋଲି କହିଛନ୍ତି । ବିହାରରେ ନାଗରିକତା ପୁନଃ ନିରୀକ୍ଷଣ ପ୍ରକ୍ରିୟାକୁ ନେଇ ନିର୍ବାଚନ ଆୟୋଗଙ୍କ ଉପରେ ବିରୋଧୀ ଭୋଟ ଚୋରିର  ଅଭିଯୋଗ ଆଣିଛନ୍ତି । ମହାମେଣ୍ଟ ଏହାକୁ ଲୋକତନ୍ତ୍ରର ହତ୍ୟା ବୋଲି କହି ବିହାରରେ ଭୋଟ ଅଧିକାର ଯାତ୍ରା ଆରମ୍ଭ କରିଛି । ଏହି ଯାତ୍ରା ଅଗଷ୍ଟ ୧୭ ତାରିଖରୁ ବିହାର ସାସାରାମରୁ ଆରମ୍ଭ ହୋଇ ସେପ୍ଟେମ୍ବର ପହିଲାରେ ପାଟନା ରୋଡ ମାର୍ଚ୍ଚରେ ସମାପ୍ତ ହେବାକୁ ଯାଉଛି । ପାଖାପାଖି ୧୩ ଶହ କିଲୋମିଟରର ଏହି ଯାତ୍ରା ବିହାରର ୨୦ ଟି ଜିଲ୍ଲାକୁ ଛୁଇଁବ । ଲୋକସଭାର ବିରୋଧୀଦଳ ନେତା ରାହୁଲ ଗାନ୍ଧୀ ଏହାର ନେତୃତ୍ୱ ନେଉଛନ୍ତି । ତାଙ୍କ କାନ୍ଧରେ କାନ୍ଧ ମିଳାଇ ଆରଜେଡି ନେତା ତେଜସ୍ୱୀ ଯାଦବ, ସିପିଆଇ (ଲିବରେସନ) ନେତା ଦୀପଙ୍କର ଭଟ୍ଟାଚାର୍ଯ୍ୟ ଭୋଟର ଅଧିକାର ଯାତ୍ରାରେ ସାମିଲ ହୋଇଛନ୍ତି । ଏହି ଯାତ୍ରାର ମୁଖ୍ୟ ଉର୍ଦ୍ଦେଶ୍ୟ ହେଉଛି ଭୋଟର ତାଲିକାରେ କଥିତ ହେରାଫେରିକୁ ଲୋକମାନଙ୍କ ସାମ୍ନାରେ ଉଜାଗର କରିବା ।

ରାହୁଲ ଗାନ୍ଧୀ ଅରରିୟାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହିଥିଲେ କି ନିର୍ବାଚନ ଆୟୋଗଙ୍କ ମୁଖ୍ୟ କାମ ହେଉଛି ସଠିକ୍ ଭୋଟର ତାଲିକା ଜାରି କରିବା । ମାତ୍ର ମହାରାଷ୍ଟ୍ର, ହରିଆଣା ଓ କର୍ଣ୍ଣାଟକରେ ନିର୍ବାଚନ ଆୟୋଗ ନକଲି ଭୋଟର ତାଲିକା ପ୍ରସ୍ତୁତ କରି ବିଜେପିକୁ ଜିତାଇଛନ୍ତି । ଏହି କ୍ରମରେ ଏବେ ବିହାରରେ ଭୋଟ ଚୋରି କରିବାକୁ ଏସିଆଇଆର ମାଧ୍ୟମରେ ନିର୍ବାଚନ ଆୟୋଗ ଚେଷ୍ଟା ଚଳାଇଛନ୍ତି । ଏହି କାରଣରୁ ଆମ ସହ ଏବେ ଦୈନିକ ଲକ୍ଷ ଲକ୍ଷ ଲୋକ ଯୋଡ଼ି ହେଉଛନ୍ତି । ଏହି ସମ୍ମଳନୀରେ ତେଜସ୍ୱୀ କହିଥିଲେ କି, ଏହା ବିହାରବାସୀଙ୍କ ପାଇଁ ଅସ୍ତିତ୍ୱର ଲଢ଼େଇ । ନିର୍ବାଚନ ଆୟୋଗଙ୍କ ମାଧ୍ୟମରେ ବିଜେପି କେବଳ ଲୋକଙ୍କ ଭୋଟଦାନ ଅଧିକାର ଛଡ଼ାଇ ନେବାକୁ ଚେଷ୍ଟା କରୁନି ବରଂ ଲୋକଙ୍କ ଅସ୍ତିତ୍ୱ ଛଡ଼ାଇନେବାକୁ ଷଡଯନ୍ତ୍ର କରୁଛି । 

ଏହି ଯାତ୍ରା ଏବେ ବିରୋଧୀ ମେଣ୍ଟକୁ ମଜବୁତ କରିବାରେ ଲାଗିଛି । ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ, ତାମିଲନାଡୁ ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା, କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ଭଳି ନେତା ଏହି ଯାତ୍ରାରେ ସାମିଲ ହୋଇଛନ୍ତି । ଏହି ଯାତ୍ରାରେ ପ୍ରିୟଙ୍କା ଗାନ୍ଧୀ ମଧ୍ୟ ସାମିଲ ହୋଇଛନ୍ତି । ସବୁଠାରୁ ବଡ଼ କଥା ହେଉଛି ପୂର୍ଣ୍ଣିୟା ସାଂସଦ ପପୁ ଯାଦବ ଓ କହ୍ନେୟା କୁମାରଙ୍କ ସାମିଲ ହେବା । କାରଣ ଏହି ଦୁଇ ନେତାଙ୍କ ସହ ଆରଜେଡିର ସଂପର୍କ ସାପ ଓ ନେଉଳ ଭଳି ରହିଥିଲା । 

ପୂର୍ଣ୍ଣିୟାରୁ ନିଦ୍ଦଳୀୟ ସାଂସଦ ରାଜେଶ ରଂଜନ ଓରଫ ପପୁ ଯାଦବ ବିହାର ରାଜନୀତିରେ ଜଣେ ପ୍ରଭାବଶାଳୀ ନେତା । ସେ କଂଗ୍ରେସର ସମର୍ଥକ, ହେଲେ ଆରଜେଡି ସହ ତାଙ୍କର ପୁରୁଣା ଶତ୍ରୁତା ରହିଛି । ୨୦୨୪ ସାଧାରଣ ନିର୍ବାଚନରେ ପୂର୍ଣ୍ଣିୟା ଆସନରୁ ତାଙ୍କୁ ଟିକେଟ୍ ଦେବାକୁ ଆରଜେଡି ମନା କରିଦେଇଥିଲା । ଏହାକୁ ନେଇ ପପୁ ଯାଦବ ଅସନ୍ତୁଷ ଥିଲେ । ସେ ତେଜସ୍ୱୀଙ୍କୁ ଅନୁଭବହୀନ ଓ ପରିବାରବାଦର ପ୍ରତୀକ ବୋଲି କହିଥିଲେ । ଏହା ବ୍ୟତିତ ଜୁଲାଇ ୨୦୨୫ ରେ ବିହାର ବନ୍ଦ ବେଳେ ତେଜସ୍ୱୀ ଓ ରାହୁଲ ଯେଉଁ ଖୋଲା ଜିପରେ ଯାଉଥିଲେ ସେଥିରେ ପପୁ ଯାଦବ ଚଢିବାକୁ ଯାଉଥିବା ବେଳେ ତାଙ୍କୁ ଅନୁମତି ମିଳିନଥିଲା । ଏହାକୁ ନେଇ ପପୁ ଅସନ୍ତୁଷ ପ୍ରକାଶ କରିଥିଲେ ବି ରାହୁଲ ଗାନ୍ଧୀ ହସ ହସ ମୁହଁରେ ପପୁଙ୍କୁ ହାତ ହଲାଇ ସ୍ୱାଗତ କରିଥିଲେ । ହେଲେ ଭୋଟର ଅଧିକାର ଯାତ୍ରା ବେଳେ ସବୁ ବଦଳିଗଲା । ୨୦୨୫  ଅଗଷ୍ଟ ୨୪ ତାରିଖରେ ଅରରିୟାରେ ପପୁ ଯାଦବ ତେଜସ୍ୱୀଙ୍କ ଗାଡିରେ ଆସୁଥିବାର ଦେଖିବାକୁ ମିଳିଥିଲା । ଏହାସହ ସଭା ମଂଚରେ ସେ ତେଜସ୍ୱୀଙ୍କୁ ପ୍ରଶଂସାରେ ପୋତି ପକାଇଥିଲେ । ଏହି ଦୃଶ୍ୟ ବିହାର ରାଜନୀତିରେ ଏକ ଐତିହାସିକ ଦୃଶ୍ୟ ଥିଲା । କାରଣ ପରସ୍ପର ଉପରେ ଆରୋପ-ପ୍ରତ୍ୟାରୋପ ଲଗାଉଥିବା ନେତା ଗୋଟିଏ ମଂଚରେ ଠିଆ ହୋଇଥିଲେ । ଏହାକୁ ରାହୁଲ ଗାନ୍ଧୀଙ୍କ ମାଷ୍ଟର ଷ୍ଟ୍ରୋକ୍ ବୋଲି ଧରିନିଆଯିବ । ମହାମେଣ୍ଟର ସହଯୋଗୀଦଳ ନେତାଙ୍କ ମଧ୍ୟରେ ମନୋମାଳିନ୍ୟ ଦୂର ହେବାରୁ ମହାମେଣ୍ଟ ପାଇଁ ପଛୁଆବର୍ଗର ଭୋଟ ବ୍ୟାଙ୍କ ମଜବୁତ ହେଉଥିବା କୁହାଯାଉଛି ।  

ଜେଏନୟୁ ଛାତ୍ର ସଂଘର ପୂର୍ବତନ ଅଧ୍ୟକ୍ଷ କହ୍ନେୟା କୁମାର ଏବେ କଂଗ୍ରେସର ଜଣେ ଚର୍ଚ୍ଚିତ ଯୁବ ନେତା । ବିହାରର ଯୁବ ଗୋଷ୍ଠୀ ମଧ୍ୟରେ ସେ ବେଶ୍ ଲୋକପ୍ରିୟ । ହେଲେ ଆରଜେଡି ସହ ତାଙ୍କର ସମ୍ପର୍କ ଅହିନକୁଳ । ଜୁଲାଇ ୨୦୨୫ ରେ ବିହାର ବନ୍ଦ ଡାକରା ବେଳେ ପପୁ ଯାଦବଙ୍କ ଭଳି କହ୍ନେୟା କୁମାରଙ୍କୁ ମଧ୍ୟ ରାହୁଲ ଗାନ୍ଧୀ ଓ ତେଜସ୍ୱୀ ଯାଦବ ଯାଉଥିବା ଗାଡ଼ିରେ ଚଢିବାକୁ ସୁଯୋଗ ଦିଆଯାଇନଥିଲା । ଏହାର କାରଣ ଭାବେ କୁହାଯାଉଥିଲା କି କହ୍ନେୟାଙ୍କ ବଢୁଥିବା ଲୋକପ୍ରିୟତାକୁ ତେଜସ୍ୱୀ ସହ୍ୟ କରିପାରୁନାହାନ୍ତି । ଏହାପରେ ରାହୁଲ ଗାନ୍ଧୀ କହ୍ନେୟାକୁମାରଙ୍କୁ ଗୁରୁତ୍ୱ ଦେଇ ମୁଙ୍ଗେର ଓ ଭାଗଲପୁରରେ ଆୟୋଜିତ ସଭାରେ ମଂଚରେ ବସାଇଥିଲେ । ଏହି କ୍ରମରେ ତେଜସ୍ୱୀ ମଧ୍ୟ କହ୍ନେୟାକୁ ସମ୍ମାନ ଦେଇଥିଲେ । ଏହି ପରିବର୍ତ୍ତନକୁ ମଧ୍ୟ ରାହୁଲଙ୍କ ରଣନୀତି ବୋଲି ଗଣନା କରାଯାଉଛି । 

ପପୁ ଯାଦବ ଓ କହ୍ନେୟାକୁମାରଙ୍କୁ ନେଇ ତେଜସ୍ୱୀ ଓ ଲାଲୁ କେବେ ସହଜ ଅନୁଭବ କରୁନଥିଲେ । କହ୍ନେୟାକୁମାର ଲାଲୁଙ୍କ ଇଚ୍ଛା ବିରୋଧରେ ଯାଇ ବେଗୁସରାଇ ସଂସଦୀୟ କ୍ଷେତ୍ରରୁ ୨୦୧୯ ରେ ନିର୍ବାଚନ ଲଢିଥିଲେ । ଏହାସହ ୨୦୨୪ ଲୋକସଭା ନିର୍ବାଚନ ବେଳେ ତେଜସ୍ୱୀ ପପୁ ଯାଦବଙ୍କୁ ଶତ୍ରୁ ବୋଲି କହିଥିଲେ । ପପୁଙ୍କୁ ହରାଇବାକୁ ତେଜସ୍ୱୀ କହିଥିଲେ କି, ଭୋଟର ମାନେ ଏନଡିଏକୁ ଭୋଟ ଦିଅ ହେଲେ ପପୁଙ୍କୁ ଦିଅନାହିଁ । ପପୁ ଯାଦବ ବି ସୁଯୋଗ ପାଇବା କ୍ଷଣି ତେଜସ୍ୱୀଙ୍କ ବିରୋଧରେ ବିଷ ଉଦଗାର କରୁଥିଲେ । ରାହୁଲଙ୍କ ଭୋଟ ଅଧିକାର ଯାତ୍ରା ନିର୍ବାଚନ ଆୟୋଗଙ୍କ ଉପରେ କେତେ ପ୍ରଭାବ ପକାଇବ ତାହା ଜଣାନାହିଁ, ହେଲେ ବିରୋଧୀମେଣ୍ଟରେ ଥିବା ମନୋମାଳିନ୍ୟକୁ ଦୂର କରିବାରେ ସଫଳ ହୋଇଛି ।