ରାହୁଲଙ୍କ ଦେଶୀ ରାଜନୀତି

କନକ ବ୍ୟୁରୋ : ପାଠକ ବନ୍ଧୁ ସାରା ଦେଶର ନଜର ଏବେ ବିହାର ଉପରେ ରହିଛି । ବିହାର ବିଧାନସଭା ନିର୍ବାଚନ ପାଇଁ ନିର୍ବାଚନ ଆୟୋଗ ତାରିଖ ଘୋଷଣା କରିନାହାନ୍ତି । ହେଲେ ବିହାରର ପରିବେଶ ଏବେ ପୂରା ନିର୍ବାଚନୀ ପରିବେଶ । ଆଉ ଏହି ପରିବେଶକୁ ବେଶ୍ ସରଗରମ କରିଛି ରାହୁଲ ଗାନ୍ଧୀଙ୍କ ନେତୃତ୍ୱରେ ଚାଲିଥିବା ବିରୋଧୀମେଣ୍ଟର ଭୋଟ ଅଧିକାର ଯାତ୍ରା । ଏହି ଯାତ୍ରରେ ଆରଜେଡି, ହିନ୍ଦୁସ୍ତାନ ଆୱାମ ମୋର୍ଚ୍ଚା, ବାମପନ୍ଥୀ ମିଳିତ ଏକତା, କଂଗ୍ରେସ ବିଶେଷ କରି ଭାଗ ନେଇଥିବା ବେଳେ କଂଗ୍ରେସ କିନ୍ତୁ ମେହଫିଲ ଲୁଟୁଛି । ଆଉ ଆଶା ରଖିଛି କି, ୩୫ ବର୍ଷ ପରେ ପୁଣି ବିହାରରେ ରାଜ୍ କରିବ ।

Advertisment

ଯଦି ବିହାରରେ କଂଗ୍ରେସର ସ୍ଥିତିକୁ ଅନୁଧ୍ୟାନ କରାଯିବ ତେବେ ସ୍ୱାଧୀନତା ପରଠାରୁ ଅଶିଦଶକ ପର୍ଯ୍ୟନ୍ତ ବିହାରରେ କଂଗ୍ରେସ କ୍ଷମତାରେ ଥିଲା । ହେଲେ ମଣ୍ଡଳ କମିସନକୁ ନେଇ ରାଜନୀତି ଆର୍ବିଭାବ ହେବା ପରେ କଂଗ୍ରେସ କ୍ଷମତାରୁ ଦୂରେଇ ଗଲା । ଏବେ କଂଗ୍ରେସ ୩୫ ବର୍ଷ ହେବ ବିହାର କ୍ଷମତାର ସ୍ୱାଦ ଚାଖିପାରିନାହିଁ । ହେଲେ ଚଳିତ ନିର୍ବାଚନ ପୂର୍ବରୁ କଂଗ୍ରେସ ରାହୁଲ ଗାନ୍ଧୀଙ୍କ ନେତୃତ୍ୱରେ ବିହାରରେ କର ବା ମର ଭଳି ପ୍ରଚେଷ୍ଠା ଚଳାଇଛି । ଏଥିପାଇଁ ରାହୁଲ ଗାନ୍ଧୀ ବିହାରରେ ଡେରା ପକାଇଛନ୍ତି ।

ଆରଜେଡି ନେତା ତେଜସ୍ୱୀ ଯାଦବଙ୍କ ସହ ରାହୁଲ ଗାନ୍ଧୀ ଭୋଟର ଅଧିକାର ଯାତ୍ରା କ୍ରମରେ ପୂରା ବିହାରର ସଡ଼କରେ ଛାଇ ହୋଇଯାଇଛନ୍ତି । ରାହୁଲ ଗାନ୍ଧୀ ବିହାରରେ ପୂରା ଦେଶୀ ଷ୍ଟାଇଲରେ ରାଜନୀତି ଆରମ୍ଭ କରିଦେଇଛନ୍ତି । ଏହି ଯାତ୍ରା ବେଳେ ରାହୁଲ ଗାନ୍ଧୀ କେବେ ବୁଲେଟ ଚଳାଇ ଭୋଟରଙ୍କୁ ଆକୃଷ୍ଟ କରୁଛନ୍ତି ତ କେତେବେଳେ ମଖାନା କ୍ଷେତରେ ଚାଷୀମାନଙ୍କ ସହ ମିଶି ସେମାନଙ୍କ ସୁବିଧା ଅସୁବିଧା ବାବଦରେ ଆଲୋଚନା କରୁଛନ୍ତି । ଏହାସହ କେବେ ସଭା ମଞ୍ଚରେ ବେକରେ ଗାମୁଛା ପକାଇ ପୂରା ବିହାରୀ ଷ୍ଟାଇଲରେ ଭାଷଣ ଦେଉଛନ୍ତି ।

ବିହାରରେ ରାହୁଲ ଗାନ୍ଧୀ ନିଆରା ଅନ୍ଦାଜ ଓ ଜଣେ ସଫଳ ପୁରୁଷ ଭଳି ଚାହାଣୀରେ ବିହାରବାସୀଙ୍କ ସହ ଯୋଡି ହେବାକୁ ଚେଷ୍ଟା କରୁଛନ୍ତି । ରାହୁଲଙ୍କ ଏଭଳି ଅବତାରରେ ଅନୁପ୍ରାଣିତ ହୋଇ ସୁପ୍ତ ଥିବା କଂଗ୍ରେସ ନେତା ଓ କର୍ମୀମାନଙ୍କ ଭିତରେ ପୁଣି ଆଶା ସଂଚାର ହୋଇଛି । ୧୬ ଦିନର ଭୋଟ ଅଧିକାର ଯାତ୍ରାର ଆଜି ଶେଷ ଦିନ । ହେଲେ ସତରେ କ'ଣ ୩୫ ବଷର ବ୍ୟବଧାନରେ ପୁଣି କଂଗ୍ରେସକୁ ବିହାରରେ କ୍ଷମତା ଦଖଲ କରାଇବାରେ ସଫଳ ହେବ ?

କଂଗ୍ରେସ ନେତା ରାହୁଲ ଗାନ୍ଧୀ ଅଗଷ୍ଟ ୧୭ ତାରିଖରେ ବିହାରର ସାସାରାମରୁ ୧୬ ଦିବସୀୟ ଭୋଟ ଅଧିକାର ଯାତ୍ରା ଆରମ୍ଭ କରିଛନ୍ତି । ଏହି ଯାତ୍ରାର ସମାପନ ଆଜି ପାଟନାରେ ହେବାକୁ ଯାଉଛି । ଏହି ଯାତ୍ରାର ଯେତେ ଆଗକୁ ବଢୁଛି, ଯାତ୍ରାରେ ସାମିଲ ହେବା ଲୋକଙ୍କ ସଂଖ୍ୟା ବଢିବାରେ ଲାଗିଛି । ଏହି ୧୭ ଦିନର ଯାତ୍ରା ଭିତରେ ରାହୁଲ ଗାନ୍ଧୀ ପୂରା ଦେଶୀ ଅନ୍ଦାଜରେ ବିହାରବାସୀଙ୍କ ମନ ଛୁଇଁବାକୁ ଚେଷ୍ଟା କରିଛନ୍ତି ଓ ତାହା ସଫଳ ହେଉଥିବା ଭଳି ଯାତ୍ରାରେ ଲୋକଙ୍କ ଭିଡ଼ ଦେଖି ଅନୁମାନ କରାଯାଉଛି । ସବୁଠାରୁ ବଡ଼ କଥା ହେଉଛି ରାହୁଲ ଗାନ୍ଧୀ ତାଙ୍କ ମଞ୍ଚରେ ଏଭଳି କିଛି ଲୋକଙ୍କୁ ସ୍ଥାନ ଦେଉଛନ୍ତି ଯେଉଁମାନଙ୍କ ନାମ ଭୋଟର ତାଲିକାରୁ କଟିଯାଇଛି ଓ ଅନ୍ୟ କିଛି ଲୋକଙ୍କୁ ନିର୍ବର୍ାଚନ ଆୟୋଗ ମୃତ ବୋଲି ଘୋଷଣା କରିଛନ୍ତି ।

ଏହି ଭୋଟ ଅଧିକାର ଯାତ୍ରାରେ ଉଭୟ ରାହୁଲ ଗାନ୍ଧୀ ଓ ତେଜସ୍ୱୀ ଯାଦବଙ୍କ ଭାଷଣ ଶୁଣିବାକୁ ଆଶାତୀତ ଭିଡ଼ ମହାମେଣ୍ଟ ବିରୋଧୀଙ୍କୁ ଚିନ୍ତାରେ ପକାଇଛି । ଉଭୟ ବିଜେପି ଓ ନିର୍ବାଚନ ଆୟୋଗଙ୍କୁ ସଭା ମଞ୍ଚରୁ ଖୋଲାଖୋଲି ଟାର୍ଗେଟ୍ କରୁଛନ୍ତି । କେବଳ ଟାର୍ଗେଟ୍ ନୁହେଁ ଚେତାବନୀ ମଧ୍ୟ ଦେଉଛନ୍ତି । ତେଜସ୍ୱୀ ଓ ରାହୁଲ ବିଜେପି ଓ ନିର୍ବାଚନ ଆୟୋଗଙ୍କୁ ଟାର୍ଗେଟ୍ କରୁଥିବା ବେଳେ ମହାମେଣ୍ଟର ସହଯୋଗୀ ବାମଦଳର ନେତା ଦୀପଙ୍କର ଭଟ୍ଟାଚାର୍ଯ୍ୟ ବିହାରର ସାଧାରଣ ଲୋକଙ୍କ ସମସ୍ୟା ଓ ଏହାର ସମାଧାନ କରିବାରେ ନୀତିଶ ସରକାର କିଭଳି ବିଫଳ ହୋଇଛନ୍ତି ତାହା ଉଜାଗର କରୁଛନ୍ତି । ଏହାସହ ବିହାରରେ ରାହୁଲ ଗାନ୍ଧୀ ବିଜେପି ବିରୋଧରେ ଯେଉଁ ନାରା ଆରମ୍ଭ କରିଛନ୍ତି ଭୋଟ ଚୋର, ଗଦି ଛାଡ , ଏହି ନାରା ଏବେ ସାରା ଦେଶରେ ବିଜେପି ବିରୋଧୀ ପାର୍ଟିମାନଙ୍କ ସଭାରେ ବେଶ୍ ଜୋରଦାର ଶୁଭୁଛି ।

ରାହୁଲ ଗାନ୍ଧୀଙ୍କ ଏହି ଭୋଟର ଅଧିକାର ଯାତ୍ରା ବିଶେଷ କରି ବିହାରର ଗ୍ରାମୀଣ ଇଲାକାରେ ସ୍ପଷ୍ଟ ଦେଖିବାକୁ ମିଳିଛି । ସାସାରାମରୁ ସିବାନ ଯେଉଁ ରାସ୍ତା ଦେଇ ଏହି ଯାତ୍ରା ଯାଉଛି, ସେଠାରେ ସ୍ଥାନୀୟ ଯୁବକ ଓ ମହିଳାମାନଙ୍କ ଭିଡ଼ କଂଗ୍ରେସକୁ ଶକ୍ତି ଯୋଗାଇଛି ।

ରାହୁଲ ଗାନ୍ଧୀ ଏହି ଯାତ୍ରା କ୍ରମରେ ବିଶେଷ କରି ଦଳିତ, ପଛୁଆବର୍ଗ ଓ ଅଳ୍ପସଂଖ୍ୟକ ଭୋଟରଙ୍କୁ ଆକୃଷ୍ଟ କରିଛି । ମତାଦତା ସୂଚୀରୁ ନିର୍ବାଚନ ଆୟୋଗ ଯେଉଁ ୬୫ ଲକ୍ଷ ଭୋଟରଙ୍କ ନାମ କାଟିଛନ୍ତି, ତାକୁ ନେଇ ରାହୁଲ ଗାନ୍ଧୀ ଅଭିଯୋଗ କରିଛନ୍ତି କି, ବିଶେଷ କରି ଗରିବ ଓ ଦଳିତ ଲୋକଙ୍କ ଭୋଟ ଅଧିକାର ଛଡ଼ାଇନେବାକୁ ବିଜେପି ପରାମର୍ଶରେ ନିର୍ବାଚନ ଆୟୋଗ ଏହି ଷଡଯନ୍ତ୍ର କରିଛନ୍ତି ।

ସେପଟେ ରାହୁଲ ଗାନ୍ଧୀଙ୍କ ଏହି ଲୋକପ୍ରିୟତା ଦେଖି ଏନଡିଏ ମେଣ୍ଟ ଚିନ୍ତାରେ ପଡ଼ିଛି । ରାଜନୈତିକ ବିଶ୍ଳେଷକଙ୍କ ମତରେ ବିହାରରେ ନୀତିଶଙ୍କ ଲୋକପ୍ରିୟତା କମିବାରେ ଲାଗିଛି । ଯାହା ବିଜେପି ପାଇଁ କଣ୍ଟା, କାରଣ ବିଜେପି ଆରମ୍ଭରୁ ନୀତିଶଙ୍କ ନେତୃ୍ତ୍ୱରେ ନିର୍ବାଚନ ଲଢିବ ବୋଲି ଘୋଷଣା କରିଛି । ଏହାସହ ଜେଡିୟୁ ନେତାମାନେ ଏବେ ମନବାନ୍ଧି ବସିଛନ୍ତି ଯଦି ବିହାରରେ ଏନଡିଏକୁ ବହୁମତ ମିଳେ ତେବେ ନୀତିଶ କୁମ।।ର ପୁଣି ମୁଖ୍ୟମନ୍ତ୍ରୀ ହେବେ । ହେଲେ ବିହାର ବିଜେପି ଭିତରେ ନୀତଶ ମୁଖ୍ୟମନ୍ତ୍ରୀ ହୁଅନ୍ତୁ ଏହାକୁ ନେଇ ବିବାଦ ରହିଛି । ତଥାପି ଏନଡିଏ ରାହୁଲଙ୍କୁ ଟକ୍କର ଦେବାକୁ ନୀତିଶ କୁମାର ଓ ନରେନ୍ଦ୍ର ମୋଦୀଙ୍କ ବିକାଶ ମଡେଲକୁ ଆଗକୁ ଆଣୁଛି । ଏହାସହ ବିଜେପିର ମୂଳ ମୁଦ୍ଦା ହିନ୍ଦୁତ୍ୱ କାର୍ଡକୁ ପ୍ରିୟଙ୍କା ଚୋରାଇ ନେଇଛନ୍ତି । ଭୋଟ ଅଧିକାର ଯାତ୍ରାରେ ପ୍ରିୟଙ୍କା ଗାନ୍ଧୀ ଯୋଗ ଦେବା ଅବସରରେ ଜାନକୀ ମନ୍ଦିରରେ ପୂଜାର୍ଚ୍ଚନା କରିଥିଲେ । ଯାହାକି ବିଜେପିତର ହିନ୍ଦୁତ୍ୱ କାର୍ଡକୁ ପାଣିରେ ମିଶାଇ ଦେବ ବୋଲି ଅନୁମାନ କରାଯାଉଛି ।

ବିହାରରେ କଂଗ୍ରେସର ଇତିହାସ କଥା ଯଦି ଆଲୋଚନା କରାଯାଏ ୧୯୯୦ ପର୍ଯ୍ୟନ୍ତ ବିହାରରେ କଂଗ୍ରେସର ରାଜ ଥିଲା । ହେଲେ ମଣ୍ଡଳ କମିସନ ରାଜନୀତି ଆରମ୍ଭ ହେବା ପରେ ଧିରେ ଧିରେ ବିହାରରେ କଂଗ୍ରେସ ଦୁର୍ବଳ ହେବାରେ ଲାଗିଲା ଓ ଛବି ମଳିନ ପଡିଗଲା । ଯଦି ଆମେ ପୂର୍ବ ୩ ଟି ବିଧାନସଭା ନିର୍ବାଚନକୁ ହିସାବକୁ ନେବା ତେବେ କଂଗ୍ରେସ ଗତ ୨୦ ବର୍ଷ ଭିତରେ ବିହାର ନିର୍ବାଚନରେ ୧୦ ପ୍ରତିଶତ ଭୋଟ ହାତେଇବାରେ ସଫଳ ହୋଇନାହିଁ । ୨୦୧୦ ବିଧାନସଭା ନିର୍ବାଚନରେ କଂଗ୍ରେସକୁ ମାତ୍ର ୪ ଟି ଆସନ ମିଳିଥିଲା ଓ ଭୋଟ ପ୍ରତିଶତ ୮.୩୭ ଥିଲା । ୨୦୧୫ ମସିହା ବିଧାନସଭା ନିର୍ବାଚନରେ କଂଗ୍ରେସ ୪୧ ଟି ଆସନରେ ଲଢି ୨୭ ଟି ଆସନ ଜିତିଥିଲା ମାତ୍ର ଭୋଟ ପ୍ରତିଶତ ୨୦୧୦ ତୁଳନାରେ କମି ୬.୬୬ ରେ ଅଟକି ଯାଇଥିଲା । ୨୦୨୦ ବିଧାନସଭା ନିର୍ବାଚନରେ କଂଗ୍ରେସକୁ ୧୯ ଆସନ ମିଳିବା ସହ ଭୋଟ ପ୍ରତିଶତ ବୃଦ୍ଧି ପାଇଁ ୯.୪୮ ରେ ପହଂଚିଥିଲା ।

ରାହୁଲ ଗାନ୍ଧୀ ବିହାର କଂଗ୍ରେସ ଶକ୍ତିକୁ ୨୦୨୪ ସାଧରଣ ନିର୍ବାଚନ ପରେ ଚିହ୍ନଟ କରିଥିଲେ । ଯେତେବେଳେ ୨୦୨୪ ଲୋକସଭା ନିର୍ବାଚନରେ କଂଗ୍ରେସ ବିହାରରେ ୩ଟି ଆସନ ଜିତିବାରେ ସଫଳ ହୋଇଥିଲା ସେତେବେଳେ ରାହୁଲ ଗାନ୍ଧୀ ବିହାରକୁ ନେଇ ରାଜନୈତିକ କସରତ ଆରମ୍ଭ କରିଦେଇଥିଲେ । ଏହି କ୍ରମରେ ସେ କ୍ରମାଗତ ଭାବେ ବିହାର ଗସ୍ତ ଆରମ୍ଭ କରିଥିଲେ । ରାହୁଲ ଗାନ୍ଧୀ ଆରଜେଡି ସହ ମେଣ୍ଟକୁ ବଳବତ୍ତର ରଖି ବିହାରରେ କଂଗ୍ରେସକୁ ଆତ୍ମନିର୍ଭର କରିବାକୁ ପ୍ରୟାସ ଆରମ୍ଭ କରିଦେଇଥିଲେ ।

ବିହାର ନିର୍ବାଚନକୁ ଆଖିରେ ରଖି ରାହୁଲ ଗାନ୍ଧୀଙ୍କ ଯୋଜନାର ପ୍ରଥମ ପଦକ୍ଷେପ ଥିଲା କି, ସେ ବିହାରର ପ୍ରଦେଶ ଅଧ୍ୟକ୍ଷ ବଦଳାଇ ଦେଇଥିଲେ । ଭୂମିହାର ସମାଜରୁ ଆସିଥିବା ଅଖିଳେଶ ପ୍ରସାଦଙ୍କ ସ୍ଥାନରେ ଦଳିତ ସମାଜରୁ ଆସୁଥିବା ରାଜେଶ ରାମଙ୍କୁ ଦାୟିତ୍ୱ ଦେଇଥିଲେ । ଏହାସହ ରାହୁଲ ଗାନ୍ଧୀଙ୍କ ନିକଟତର କୃଷ୍ଣା ଅଲ୍ଲାବରୁଙ୍କୁ ବିହାରର ପ୍ରଭାରୀ ଭାବେ ନିଯୁକ୍ତ କରାଯାଇଥିଲା । ଏଭଳି ରଣନୀତି ପ୍ରସ୍ତୁତ କରି ରାହୁଲ ଗାନ୍ଧୀ ବିହାର ନିର୍ବାଚନକୁ ଓହ୍ଲାଇଛନ୍ତି ।

ରାହୁଲ ଗାନ୍ଧୀଙ୍କ ଭାରତ ଯୋଡ଼ ଯାତ୍ରା ପରେ ଭୋଟ ଅଧିକାର ଯାତ୍ରାକୁ ନେଇ ବିହାର ନେତା ଓ କାର୍ଯ୍ୟକର୍ତ୍ତା ଉତ୍ସାହିତ ଅଛନ୍ତି ଓ ସଭାରେ ଭିଡ଼ ବି ବଢିବାରେ ଲାଗିଛି । ହେଲେ ଏହାର ପ୍ରଭାବ ନିର୍ବାଚନରେ କିଭଳି ପଡ଼ିବ ? ସତରେ କ'ଣ କଂଗ୍ରେସ ୩୫ ବର୍ଷ ପରେ ପୁଣି ବିହାରରେ କ୍ଷମତା ଦଖଲ କରିବ ? ନିର୍ବାଚନ ଫଳାଫଳ ଆସିବା ପରେ ଏହା ସ୍ପଷ୍ଟ ହେବ । ହେଲେ ଭୋଟ ଅଧିକାର ଯାତ୍ରା କରି ରାହୁଲ ବିହାର ରାଜନୀତିକୁ ପୂରା ହଲଚଲ କରିଦେଇଛନ୍ତି ଓ ବିଜେପି ଓ ଜେଡିୟୁକୁ ବ୍ୟାକଫୁଟକୁ ନେଇ ଯାଇଛନ୍ତି ଏଥିରେ ସନ୍ଦେହ ନାହିଁ ।