ଭୋଟ୍ ଚୋରି ପ୍ରସଙ୍ଗ; ବିରୋଧୀଙ୍କୁ କଲା ଏକାଠି

କନକ ବ୍ୟୁରୋ: ଭୋଟ୍ ଚୋରି ପ୍ରସଙ୍ଗ ବିରୋଧୀଙ୍କୁ କଲା ଏକାଠି । ଲୋକସଭାରେ ବିରୋଧୀ ଦଳ ନେତା ଥିବା ରାହୁଲ ଗାନ୍ଧୀଙ୍କ ନେତୃତ୍ୱରେ ସୋମବାର ବିରୋଧୀ ଦଳର ନେତାମାନେ ରାଜଧାନୀ ଦିଲ୍ଲୀରେ ଶକ୍ତି ପ୍ରଦର୍ଶନ କରିଛନ୍ତି । ଖାସ୍ କରି ବିହାରରେ ଏସଆଇଆର୍ ଏବଂ ଭୋଟ୍ ଚୋରି ପ୍ରସଙ୍ଗକୁ ନେଇ ଲୋକସଭା ଏବଂ ରାଜ୍ୟସଭା ସାଂସଦଙ୍କ ସହ ନିର୍ବାଚନ ଆୟୋଗଙ୍କ କାର୍ଯ୍ୟାଳୟ ପର୍ଯ୍ୟନ୍ତ ପଦଯାତ୍ରା ବାହାର କରିଥିଲେ ବିରୋଧୀ ।

ଏହି ପଦଯାତ୍ରାରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ସହିତ ଅଖିଳେଶ ଯାଦବ, ଏନସିପି ନେତା ଶରତ ପାଓ୍ୱାରା, ଟିଏମସି ସାଂସଦ ଅଭିଷେକ ବାନାର୍ଜୀଙ୍କ ସହିତ ତମାମ ବିରୋଧୀ ଦଳର ନେତା ସାମିଲ ହୋଇଥିଲେ । ତେବେ ଯେତେବେଳେ ବିରୋଧୀ ଦଳର ନେତା ପଦଯାତ୍ରାରେ ଆଗକୁ ବଢୁଥିଲେ, ସେତେବେଳେ ପୁଲିସ୍ ସେମାନଙ୍କୁ ଅଟକାଇବାକୁ ଉଦ୍ୟମ କରିଥିଲା । ଆଉ ଏହାପରେ ଅଖିଳେଶ ଯାଦବ ବ୍ୟାରିକେଡ୍ ଡେଇଁ ପଡ଼ିଥିଲେ । ଯାହାର ଭିଡିଓ ସୋସିଆଲ୍ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି ।

ରାହୁଲଙ୍କ ଭୋଟ୍ ଚୋରି ପ୍ରସଙ୍ଗ, ବଢ଼ିଲା ରାଜନୀତି

ରାହୁଲ ଗାନ୍ଧୀ ଭୋଟ୍ ଚୋରି ପ୍ରସଙ୍ଗ ଉଠାଇବା ପରେ, ଏହାକୁ ନେଇ ରାଜନୀତି ବେଶ୍ ସରଗରମ ହୋଇଛି । ନିର୍ବାଚନ ଆୟୋଗଙ୍କ ଉପରେ ଗୋଟିଏ ପରେ ଗୋଟିଏ ପ୍ରଶ୍ନ ଚିହ୍ନ ଲଗାଇ ଚାଲିଛନ୍ତି ରାହୁଲ । ଏମିତି କି ଏହାକୁ ନେଇ ସେ ଗୋଟିଏ ଓ୍ୱେବପେଜ୍ ମଧ୍ୟ ଆରମ୍ଭ କରିଛନ୍ତି । ଯେଉଁଥିରେ ସେ ଲୋକଙ୍କ ସମର୍ଥନ ମଧ୍ୟ ମାଗିଛନ୍ତି । 

ବିରୋଧୀ ହେଲେ ଏକାଠି

କଂଗ୍ରେସ ନେତା ରାହୁଲ ଗାନ୍ଧୀ ଏହି ପ୍ରସଙ୍ଗରେ ସଡ଼କରୁ ସଂସଦ ପର୍ଯ୍ୟନ୍ତ ନିଜର ମୋର୍ଚ୍ଚା ଖୋଲିଦେଇଛନ୍ତି । ଗତ ଅଗଷ୍ଟ ମାସ ୭ ତାରିଖରେ ଇଣ୍ଡିଆ ବ୍ଲକର ନେତାଙ୍କୁ ନେଇ ରାହୁଲ ଏକ ଡିନର୍ ଆୟୋଜନ କରିଥିଲେ । ଯେଉଁଥିରେ ୫୦ରୁ ଅଧିକ ବିରୋଧୀ କ୍ୟାମ୍ପର ନେତା ସାମିଲ ହୋଇଥିଲେ । ଆଉ ଏବେ ରାହୁଲଙ୍କ ନେତୃତ୍ୱରେ ବିରୋଧୀମାନେ ଏକାଠି ନଜର ଆସିଛନ୍ତି ।

ରାଜନୈତିକ ପଣ୍ଡିତଙ୍କ କହିବା ଅନୁସାରେ, ଭୋଟ୍ ଚୋରି ପ୍ରସଙ୍ଗ ବିରୋଧୀମାନଙ୍କୁ ଏକାଠି କରିପାରିଛି । ଅଖିଳେଶ ଯାଦବ, ତେଜସ୍ୱୀ ଯାଦବଙ୍କ ଭଳି ନେତା ଏବେ ରାହୁଲଙ୍କ ସହ ସ୍ୱର ମିଳାଇଛନ୍ତି । ଏହାବାଦ୍ ଶରତ ପାଓ୍ୱାର, ଟିଏମସିର ନେତା ଅଭିଷେକ ବାନାର୍ଜୀ ମଧ୍ୟ ଏହି ପ୍ରସଙ୍ଗରେ ରାହୁଲଙ୍କ ସହ କାନ୍ଧ ମିଳାଇଛନ୍ତି । ଯାହାକି ବିରୋଧୀଙ୍କୁ ଏକ ନୂଆ ବଳ ଦେଇପାରିବ ।