ବୁଲା କୁକୁରଙ୍କୁ ନେଇ ଏମିତି କହିଲେ ରାହୁଲ ଗାନ୍ଧୀ ; କହିଲେ, ଜନ କଲ୍ୟାଣ ସହିତ ପଶୁ କଲ୍ୟାଣ ମଧ୍ୟ ବୁଝିବା ଉଚିତ...

କନକ ବ୍ୟୁରୋ: ବୁଲା କୁକୁରଙ୍କୁ ନେଇ ସୁପ୍ରିମକୋର୍ଟ ସୋମବାର କଡା ନିର୍ଦ୍ଦେଶ ଜାରି କରିଥିଲେ । ତୁରନ୍ତ ଦିଲ୍ଲୀ-ଏନସିଆରରୁ ଏହି ବୁଲା କୁକୁରଙ୍କୁ ଧରି ସେମାନଙ୍କର ବନ୍ଧ୍ୟାକରଣ କରିବାକୁ ନିର୍ଦ୍ଦେଶ ଦେଇଥିଲେ ଦେଶର ସର୍ବୋଚ୍ଚ ଅଦାଲତ । ଏହାସହ ଏହି ବୁଲା କୁକୁରଙ୍କୁ ଆଶ୍ରୟସ୍ଥଳୀରେ ମଧ୍ୟ ରଖିବାକୁ କହିଥିଲେ ସୁପ୍ରିମକୋର୍ଟ । ଆଉ ଏବେ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ ।

କଂଗ୍ରେସ ନେତା ତଥା ଲୋକସଭାରେ ବିରୋଧୀ ଦଳର ନେତା ଥିବା ରାହୁଲ ଗାନ୍ଧୀ ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶକୁ ମାନବ ଏବଂ ବିଜ୍ଞାନ ଆଧାରିତ ପୁରୁଣା ନିୟମକୁ ହଟେଇବା ଭଳି କହିଛନ୍ତି । ଏହାସହ କଥା କହିପାରୁନଥିବା ଏହି ଜୀବମାନଙ୍କୁ ନେଇ କୌଣସି ସମସ୍ୟା ନାହିଁ, ଯାହାକୁ କି ହଟାଇ ଦିଆଯିବ ବୋଲି ରାହୁଲ କହିଛନ୍ତି । 
ଏହାସହ ସେ ଆହୁରି ମଧ୍ୟ କହିଛନ୍ତି ଯେ, ଆଶ୍ରୟସ୍ଥଳୀ, ବନ୍ଧ୍ୟାକରଣ, ଭ୍ୟାକ୍ସିନେସନ୍ ଆଉ କମ୍ୟୁନିଟି କେୟାର ଭଳି କଥା ହିଁ ସଡ଼କକୁ ସୁରକ୍ଷିତ ରଖିପାରିବ । ଆଉ ତା ବି ବିନା କୌଣସି ଜୀବ ଉପରେ କ୍ରୁରତା ନ କରି । ହେଲେ ପୂରାପୂରି ଭାବେ ଏହି କୁକୁରମାନଙ୍କୁ ହଟାଇ ଦେବା ନିଷ୍ପତ୍ତି ଠିକ୍ ନୁହେଁ ବୋଲି ରାହୁଲ କହିଛନ୍ତି । ଆମେ ଜନ ସୁରକ୍ଷା ସହିତ ପଶୁ କଲ୍ୟାଣ କଥା ମଧ୍ୟ ଏକାସାଙ୍ଗରେ ଚିନ୍ତା କରିବା ଉଚିତ ବୋଲି ସେ କହିଛନ୍ତି ।

ଜାଣିରଖିବା ଉଚିତ ଯେ, ସୁପ୍ରିମକୋର୍ଟ ସୋମବାର ବୁଲା କୁକୁରାଙ୍କ ଆତଙ୍କଙ୍କୁ ନଜରରେ ରଖି ଏକ ନିର୍ଦ୍ଦେଶ ଦେଇଥିଲେ । ଆଠ ସପ୍ତାହ ଭିତରେ ବୁଲା କୁକୁରଙ୍କୁ ଆଶ୍ରୟସ୍ଥଳୀରେ ରଖିବା ସହିତ ୬ ସପ୍ତାହ ଭିତରେ କୁକୁରଙ୍କୁ ଧରି ସେମାନଙ୍କର ବନ୍ଧ୍ୟାକରଣ କରିବାକୁ ନିର୍ଦ୍ଦେଶ ଦେଇତିଲେ ସର୍ବୋଚ୍ଚ ଅଦାଲତ । ଯାହା ପରେ ଏହି କଥା ଏବେ ଚର୍ଚ୍ଚା ସୃଷ୍ଟି କରିଛି ।