ନିର୍ବାଚନ କମିସନ କରୁଛନ୍ତି ଭୋଟ ଚୋରି, ଯିଏ ବି ସାମିଲ ଅଛନ୍ତି ଅବସର ନେଇଥିଲେ ବି ଛଡ଼ାଯିବନି : ରାହୁଲ ଗାନ୍ଧୀ

କନକ ବ୍ୟୁରୋ : କଂଗ୍ରେସର ବରିଷ୍ଠ ନେତା ତଥା ଲୋକସଭାରେ ବିରୋଧୀଦଳ ନେତା ରାହୁଲ ଗାନ୍ଧୀ ଶୁକ୍ରବାର ଦିନ ନିର୍ବାଚନ ଆୟୋଗଙ୍କ ଉପରେ ବଡ଼ ଅଭିଯୋଗ ଆଣିଛନ୍ତି । ୨୦୧୪ ପରେ ଦେଶରେ ଭୋଟ ଚୋରି ହେଉଛି ଓ ଏହି ଚୋରି ପଛରେ ନିର୍ବାଚନ ଆୟୋଗଙ୍କ ହାତ ରହିଛି । ସେ ନେଇ ଆମ ପାଖରେ ମଜବୁତ ପ୍ରମାଣ ରହିଛି । 

ସେ କହିଛନ୍ତି ଭୋଟ ଚୋରିରେ ନିର୍ବାଚନ ଆୟୋଗଙ୍କର ପୂରା ସମର୍ଥନ ରହିଛି ଓ ଏନେଇ ଆମ ପାଖରେ ପ୍ରମାଣ ବି ରହିଛି । ଏହାକୁ ଖୁବଶୀଘ୍ର ଲୋକଙ୍କ ପାଖରେ ପହଂଚାଯିବ ଓ ଲୋକେ ବୁଝିଯିବେ ଯେ ସେମାନଙ୍କ ଭୋଟକୁ କିଭଳି ନିର୍ବାଚନ କମିସନର ଚୋରି କରୁଛନ୍ତି । ନିର୍ବାଚନ କମିସନର ବିଜେପି ପାଇଁ ଭୋଟ ଚୋରି କରୁଛି, ଏହା ଧିରେ ଧିରେ ସ୍ପଷ୍ଟ ହେବାରେ ଲାଗିଛି ବୋଲି ସେ କହିଛନ୍ତି । 

ରାହୁଲ ଗାନ୍ଧୀ କହିଛନ୍ତି କି, ଏନେଇ ପ୍ରଥମେ ସନ୍ଦେହ ମଧ୍ୟପ୍ରଦେଶ ବିଧାନସଭା ନିର୍ବାଚନରେ ହୋଇଥିଲା, ଏହାପରେ ଲୋକସଭା ନିର୍ବାଚନ ବେଳେ ମଧ୍ୟ ସନ୍ଦେହ ହୋଇଥିଲା । ହେଲେ ମହାରାଷ୍ଟ୍ର ବିଧାନସଭା ନିର୍ବାଚନ ପରେ ଏହି ସନ୍ଦେହ ସତ୍ୟରେ ପ୍ରମାଣିତ ହୋଇଛି । ମହାରାଷ୍ଟ୍ର ନିର୍ବାଚନର ୬ ମାସ ପୂର୍ବରୁ ଭୋଟର ତାଲିକାରେ ୧ କୋଟି ନୂଆ ଭୋଟର ଯୋଡା ଯାଇଥିଲା । ଏନେଇ ଅଭିଯୋଗ କରିବା ପରେ ମଧ୍ୟ ନିର୍ବାଚନ ଆୟୋଗ ଆମକୁ ତଥ୍ୟ ଦେଇନଥିଲେ । ଆମେ ଆମ ତରଫରୁ ତଦନ୍ତ କରି ନିଷ୍କର୍ସରେ ପହଂଚିଛୁ । ତଦନ୍ତରୁ ଯାହା ମିଳିଛି ତାହା ଆଟମ୍ ବମ୍, ଏହା ଯେତେବେଳେ ଫାଟିବ ସେତେବେଳେ ହିନ୍ଦୁସ୍ଥାନର ନିର୍ବାଚନ କମିସନରଙ୍କୁ ଆଉ କେଉଁଠି ବି ଦେଖିବାକୁ ମିଳିବ ନାହିଁ । 

ନିର୍ବାଚନ ଆୟୋଗଙ୍କୁ ସିଧାସଳଖ ଚେତାବନୀ ଦେଇଛନ୍ତି ରାହୁଲ ଗାନ୍ଧୀ । ସେ କହିଛନ୍ତି କି ନିର୍ବାଚନ ଆୟୋଗରେ ବସି ଯେଉଁମାନେ ଏଭଳି କାମ କରୁଛନ୍ତି ତଳ ଠାରୁ ଉପର ପର୍ଯ୍ୟନ୍ତ କାହାରିକୁ ଛଡାଯିବନି । ଏହି କାମ ଦେଶଦ୍ରୋହ କି ରାଜଦ୍ରୋହ ଠାରୁ କମ୍ ନୁହେଁ । ଆପଣ ଯେଉଁଠି ବି ଥାନ୍ତୁ, ଚାକିରିରେ ଥାନ୍ତୁ କି ଅବସର ନେଇଥାନ୍ତୁ, ସମସ୍ତଙ୍କୁ ଖୋଜି ଖୋଜି ବାହାର କରାଯିବ, କର୍ଣ୍ଣାଟକରେ ଏହାର ଖୁଲାସା କରାଯିବ । 

ରାହୁଲ କହିଛନ୍ତି, ମହାରାଷ୍ଟ୍ର ନିର୍ବାଚନରେ ବିରୋଧୀଦଳ ସହ ଧୋକ୍କା ହୋଇଥିଲା । ଆମେ ନିର୍ବାଚନ ଆୟୋଗଙ୍କୁ ପ୍ରଶ୍ନ ପଚାରିଥିଲୁ କି, ଭୋଟର ତାଲିକା ସାର୍ବଜନୀନ କରିବାକୁ ହେଲେ ନିର୍ବାଚନ କମିସନ ଆମକୁ ଭୋଟର ତାଲିକା ଦେଲେ ନାହିଁ । ଆମେ ଭୋଟିଂର ଭିଡିଓଗ୍ରାଫି ମାଗିବାରୁ ଭିଡିଓଗ୍ରାଫି ଆଇନର ପରିବର୍ତ୍ତନ କରାଯାଇଥିଲା । ସେହିଭଳି କର୍ଣ୍ଣାଟକରେ ମଧ୍ୟ ନିର୍ବାଚନ କମିସନର ଦୁର୍ନୀତି କରିଛନ୍ତି । ଯାହାର ପ୍ରମାଣ ବ୍ଲାକ ଆଣ୍ଡ ହ୍ୱାଇଟରେ ଖୁବଶୀଘ୍ର ଖୁଲାସା କରାଯିବ ।