କନକ ବ୍ୟୁରୋ : ସଂସଦରେ ଲଗାତର ଦୁଇଦିନ ଧରି ଅପରେସନ୍ ସିନ୍ଦୂର ଉପରେ ଚର୍ଚ୍ଚା ହେଉଛି । ଅପରେସନ୍ ସିନ୍ଦୂର ବେଳେ ଯୁଦ୍ଧ ବିରତି ଘୋଷଣା କରି ସରକାର ଭୁଲ କରିଛନ୍ତି ବୋଲି କହିଛନ୍ତି ବିରୋଧୀଦଳ ନେତା ରାହୁଲ ଗାନ୍ଧୀ । ରାହୁଲ କହିଛନ୍ତି, ପହଲଗାମ ଆକ୍ରମଣରେ ନୃଶଂସତାର ସବୁ ସୀମା ଟପିଯାଇଥିଲେ ଆତଙ୍କବାଦୀ । ଏହା ଆତଙ୍କୀଙ୍କ କ୍ରୂରତାପୂର୍ଣ୍ଣ ଆକ୍ରମଣ ଥିଲା । ଏହାସହ ଆକ୍ରମଣ ପଛରେ ପାକିସ୍ତାନର ସମ୍ପୂର୍ଣ୍ଣ ହାତ ଥିବା କଥା ରାହୁଲ କହିଛନ୍ତି । ଏହାସହ ସେ ଶାସକ ଦଳର ୧୯୭୧ ମସିହା ବୟାନ ଉପରେ କଡ଼ା ଜବାବ ଦେଇଛନ୍ତି ରାହୁଲ ଗାନ୍ଧୀ । ସେ କହିଛନ୍ତି କି, ୧୯୭୧ ବେଳେ ସରକାରଙ୍କର ଦୃଢ ରାଜନୈତିକ ଇଚ୍ଛାଶକ୍ତି ଥିଲା । ସେତେବେଳେ କଂଗ୍ରେସ ସରକାର ଆମେରିକାର ଚାପକୁ ଶୁଣିନଥିଲା । ସରକାର ଶାମ ମାନିକଙ୍କୁ ପୂର୍ଣ୍ଣ କ୍ଷମତା ଦେଇଥିଲା । ଯୁଦ୍ଧ ବେଳେ ସରକାର ସେନାକୁ ପୂର୍ଣ୍ଣ କ୍ଷମତା ଦେବାର ଆବଶ୍ୟକତା ରହିଛି  । ହେଲେ ଆମ ପାଖରେ ସମସ୍ତ ସୁଯୋଗ ଥାଇ ବି ଅପରେସନ୍ ସିନ୍ଦୂର ବେଳେ ଭାରତ ସରକାର ମାତ୍ର ୩୦ ମିନିଟ୍ ଯୁଦ୍ଧ ପରେ ଆତ୍ମସମର୍ପଣ କରିଥିଲେ । ସରକାରଙ୍କ ଲଢିବାର ଇଚ୍ଛାଶକ୍ତି କମ୍ ଥିବା କଥା ରାହୁଲ ଗାନ୍ଧୀ ସଂସଦରେ କହିଛନ୍ତି । ଯାହା ଭାରତ ସରକାରଙ୍କ ବଡ଼ ଭୁଲ ବୋଲି ରାହୁଲ ଗାନ୍ଧୀ କହିଥିଲେ । ଏହାସହ ସରକାରଙ୍କ ଭୁଲ ନିଷ୍ପତ୍ତି କାରଣରୁ ଦେଶର ଅନେକ ବିମାନ କ୍ଷତି ହୋଇଛି । ଆତ୍ମସମର୍ପଣ କରିବା ସରକାରଙ୍କ ନିଷ୍ପତ୍ତି ଥିଲା, ଏଥିରେ ସେନାର କିଛି ଭୁଲ ନଥିବା କଥା ରାହୁଲ ଗାନ୍ଧୀ କହିଛନ୍ତି । ଯେତେବେଳେ ଯୁଦ୍ଧ କରିବାକୁ ଆମ ପାଇଲଟମାନେ ପୂର୍ଣ୍ଣ ପ୍ରସ୍ତୁତ ହୋଇସାରିଥିଲେ ସେତେବେଳେ ସରକାର ସେମାନଙ୍କୁ ଅଟକାଇଦେଇଥିଲା ।

Advertisment

କେବଳ ସେତିକି ନୁହେଁ ଯୁଦ୍ଧ ବିରତି ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତା ପ୍ରସଙ୍ଗ ମଧ୍ୟ ରାହୁଲ ଗାନ୍ଧୀ ଉଠାଇଛନ୍ତି । ଟ୍ରମ୍ପ୍ ୨୯ ଥର ଯୁଦ୍ଧ ବିରତି କରାଇଥିବା କହିଲେଣି, ହେଲେ ଭାରତ ସରକାରଙ୍କ ତରଫରୁ ଏନେଇ କୌଣସି ପ୍ରତିଉତ୍ତର ଦିଆଯାଉନାହିଁ । ଟ୍ରମ୍ପଙ୍କ ଦାବିକୁ ପ୍ରଧାନମନ୍ତ୍ରୀ ସଂସଦରେ ମିଥ୍ୟା ବୋଲି କୁହନ୍ତୁ । ଅନ୍ୟପଟେ ପାକିସ୍ତାନ ସେନା ମୁଖ୍ୟ ଜେନରାଲ ମୁନିର ଏହି ଆତଙ୍କବାଦୀ ଆକ୍ରମଣ ପଛର ମୁଖ୍ୟ ଖଳନାୟକ ବୋଲି ରାହୁଲ ଗାନ୍ଧୀ କହିଛନ୍ତି ।