୧୪ ଦିନ, ୨୪ ଜିଲ୍ଲା, ୫୦ ବିଧାନସଭା ନିର୍ବାଚନମଣ୍ଡଳୀ… ଭୋଟ୍ ଅଧିକାର ଯାତ୍ରାରୁ ମହାମେଣ୍ଟକୁ କେତେ ଫାଇଦା?

କନକ ବ୍ୟୁରୋ: ବିହାରର ଆରାରେ ପହଞ୍ଚିସାରିଛି ରାହୁଲଙ୍କ ଭୋଟ୍ ଅଧିକାର ଯାତ୍ରା । ରବିବାର ଅର୍ଥାତ ଅଗଷ୍ଟ ୩୧ ତାରିଖରେ ବିଶ୍ରାମ କରିବା ନେଇ ଧାର୍ଯ୍ୟ କରାଯାଇଛି । ଆଉ ଏହାପରେ ସେପ୍ଟେମ୍ବର ୧ ତାରିଖରେ ଭୋଟର ଅଧିକାର ଯାତ୍ରା ପୁଣିଥରେ ଆରମ୍ଭ ହେବା ସହିତ ପାଟଣାରେ ଏହାର ଶେଷ ଦିନ ଲେଖାଯିବ । ତେବେ ଶନିବାର ଆାରାରେ ବିରୋଧୀ ମେଣ୍ଟ ଶକ୍ତି ପ୍ରଦର୍ଶନ କରିଛନ୍ତି । ଯେଉଁଥିରେ କି ତେଜସ୍ୱୀ ଯାଦବଙ୍କ ସହିତ କଂଗ୍ରେସ ନେତା ରାହୁଲ ଗାନ୍ଧୀ ଏବଂ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ଏକାଠି ମଞ୍ଚ ଉପରେ ନଜର ଆସିଛନ୍ତି ।

ତେବେ ବିରୋଧୀ ମୋଦୀ ସରକାର ଉପରେ ଗମ୍ଭୀର ଅଭିଯୋଗ ଲଗାଇବା ସହିତ ଭୋଟ୍ ଚୋରି ହେବା ନେଇ ଅଭିଯୋଗ କରିଛନ୍ତି । ଅଖିଳେଶ ଯାଦବ କହିଛନ୍ତି, ଅବଧର ଲୋକ ଯେମିତି ବିଜେପିକୁ ହଟାଇଲେ, ମଗଧର ଲୋକ ମଧ୍ୟ ବିଜେପିକୁ ସେମିତି ହଟାଇବେ । 

ଜାଣିରଖିବା ଉଚିତ ଯେ,  ଅଗଷ୍ଟ ୧୭ ତାରିଖରେ ସାସାରାମରୁ ଏହି ଯାତ୍ରା ଆରମ୍ଭ ହୋଇଥିଲା । ଯାହାକି ୧୪ ଦିନରେ ୧୩ ହଜାର କିଲୋମିଟର ଯାତ୍ରା କରିବା ନେଇ ଧାର୍ୟ୍ୟ କରାଯାଇଥିଲା । ତେବେ ଏହି ଯାତ୍ରା ବିହାରର ୨୪ ଜିଲ୍ଲାକୁ ଛୁଇଁବା ସହିତ ୫୦ ବିଧାନସଭା କ୍ଷେତ୍ରକୁ ମଧ୍ୟ ଛୁଇଁଥିଲା । ତେବେ ଏହି ୧୪ ଦିନରେ ରାହୁଲ ଗାନ୍ଧୀ ବିଜେପି ଏବଂ ପ୍ରଧାନମନ୍ତ୍ରୀ ମୋଦୀଙ୍କୁ ଲଗାତାର ଶବ୍ଦର ତୀରରେ ଆକ୍ରମଣ କରୁଥିବା ଦେଖିବାକୁ ମିଳିଥିଲା । ଏମିତି କି ଆରାରେ ରାହୁଲ ଗାନ୍ଧୀଙ୍କୁ ବିଜେପି କାର୍ଯ୍ୟକର୍ତ୍ତାମାନେ ଯେଉଁଭଳି ଭାବେ ବିରୋଧ କଲେ, ଏଥିରେ ସ୍ପଷ୍ଟ ପ୍ରମାଣିତ ହେଉଛି ଯେ, ସରକାରୀ ଦଳ ମଧ୍ୟ ରାହୁଲଙ୍କ ଏହି ଯାତ୍ରାକୁ ନେଇ କେତେ ଚିନ୍ତିତ ଅଛି ।

ତେଜସ୍ୱୀ ନିଜକୁ ଘୋଷଣା କଲେ ମୁଖ୍ୟମନ୍ତ୍ରୀ

ଆରାରେ ତେଜସ୍ୱୀ ଯାଦବ ନିଜକୁ ମହାମେଣ୍ଟର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ନିଜକୁ ନିଜେ ଘୋଷଣା କରିବା ମଧ୍ୟ ଚର୍ଚ୍ଚା ସୃଷ୍ଟି କରିଛି । ଏହି କାର୍ଯ୍ୟକ୍ରମରେ ରାହୁଲ ଗାନ୍ଧୀଙ୍କ ସହିତ ଅଖିଳେଶ ଯାଦବ ମଧ୍ୟ ଉପସ୍ଥିତ ଥିଲେ । ଆଉ ଏପରି ସମୟରେ ତେଜସ୍ୱୀ ନିଜକୁ ନିଜେ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରିବା ବିହାର ରାଜନୀତିକୁ ସରଗରମ କରିଛି । ଏପଟେ ବିହାରର ମନ୍ତ୍ରୀ ଥିବା ନୀରଜ କୁମାର ବବଲୁ କହିଛନ୍ତି, ରାହୁଲ ଆଉ ତେଜସ୍ୱୀ ବିହାରରେ ଅରାଜକତା ସୃଷ୍ଟି କରିବାକୁ ଚାହୁଛନ୍ତି । ସେମାନେ ଜାଣିସାରିଲେଣି ଲୋକଙ୍କ ମତ ତାଙ୍କ ସପକ୍ଷରେ ନାହିଁ । ନିର୍ବାଚନରେ ମଧ୍ୟ ଏହାର ପ୍ରତିଫଳନ ଦେଖିବାକୁ ମିଳିବ । ତେଣୁ ସେମାନେ ଜାଣିଶୁଣି ଭ୍ରମ ଖେଳାଇବାକୁ ଚାହୁଛନ୍ତି ବୋଲି ସେ କହିଛନ୍ତି ।

ଯାତ୍ରାରୁ କଣ ସନ୍ଦେଶ?

ଇଣ୍ଡି ମେଣ୍ଟ ବିହାରର ଏହି ଭୋଟ୍ ଅଧିକାର ଯାତ୍ରାରୁ ସତ୍ତା ପକ୍ଷକୁ ଏକାଧିକ ମେସେଜ୍ ଦେବାକୁ ଚାହିଁଛି । ଏହି ଯାତ୍ରାରେ ତେଜସ୍ୱୀଙ୍କ ସହ ରାହୁଲ, ଅଖିଳେଶ ଏକାଠି ନଜର ଆସିଛନ୍ତି । ତେଣୁ କେଉଁଠି ନା କେଉଁଠି ବିରୋଧୀ ମେଣ୍ଟ ଏକାଠି ଥିବା ନେଇ ପ୍ରମାଣ ଦେଇଛି ଇଣ୍ଡି ମେଣ୍ଟ । ଏହାସହ ପଛୁଆ, ଦଳିତ ଏବଂ ଅଳ୍ପସଂଖ୍ୟକଙ୍କୁ ଏଥର ନିର୍ବାଚନରେ ଫୋକସ୍ କରାଯାଉଥିବା ନେଇ ମଧ୍ୟ ଇସାରା ଦିଆଯାଇଛି । ଯାହାକି ବିହାର ରାଜନୀତିର ସମୀକରଣକୁ ନୂଆ ଦିଗ ଦେଇପାରେ । 

ଯାତ୍ରା ସଫଳ ନା ବିଫଳ?

ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ରାହୁଲ ଗାନ୍ଧୀଙ୍କ ଏହି ଭୋଟ୍ ଅଧିକାର ଯାତ୍ରା କେତେ ସଫଳ ହେଇଛି? ଆପଣମାନେ ଜାଣିଛନ୍ତି ଯେ, ଏହି ଯାତ୍ରା ବିହାରର ପାଖାପାଖି  ୫୦ଟି ନିର୍ବାଚନମଣ୍ଡଳୀକୁ ଛୁଇଁଛି । ତେଣୁ ଆଗାମୀ ଦିନରେ ଯଦି ଏହି ସବୁ ଅଞ୍ଚଳରେ ଇଣ୍ଡି ମେଣ୍ଟର ଭୋଟ୍ ପ୍ରତିଶତ ବୃଦ୍ଧି ପାଉଛି, ତେବେ ଏହି ଯାତ୍ରା ସଫଳ ହେଇଛି ବୋଲି କୁହାଯାଇପାରିବ । ଅନ୍ୟପଟେ ଭୋଟ୍ ଚୋରି ପ୍ରସଙ୍ଗକୁ ବିରୋଧୀମାନେ ଯେଉଁଭଳି ଭାବେ ସାମ୍ନାକୁ ଆଣିଛନ୍ତି, ତାହାର କେତେ ଫାଇଦା ମହାମେଣ୍ଟକୁ ମିଳୁଛି ତାହା ସବୁଠୁ ଗୁରୁତ୍ୱପୂର୍ଣ୍ଣ ।