କନକ ବ୍ୟୁରୋ : ସରକାରୀ ନିୟମ ଅନୁସାରେ ପ୍ରତ୍ୟେକ ଦିନ ମେଡିକାଲର ବିଶେଷଜ୍ଞ ବିଭାଗ ଖୋଲା ରହିବା କଥା । ହେଲେ ସରକାରୀ ଛୁଟି, ରବିବାର ଓ ପ୍ରତ୍ୟେକ ସପ୍ତାହର ଦ୍ୱିତୀୟ ଶନିବାର ଓ ଚତୁର୍ଥ ଶନିବାର ବିଶେଷଜ୍ଞ ବର୍ହି ବିଭାଗ ବନ୍ଦ ରହୁଛି । ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ରୋଗୀ । ଖାଲି ସେତିକି ନୁହେଁ ବରଂ ପୁରୀ ଜିଲ୍ଲାରେ ଥିବା ସିଏଚ୍‌ସି ଓ ପିଏଚ୍‌ସି ଗୁଡ଼ିକ ମଧ୍ୟ ଅକାମୀ ହୋଇପଡ଼ିଛି । ପ୍ରାୟ ସମୟ ମେଡିକାଲ ବନ୍ଦ ରହୁଛି, ଫଳରେ ରୋଗୀ ଫେରୁଛନ୍ତି । 

Advertisment

ସାତଶଙ୍ଖ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର । ଭୁବନେଶ୍ୱର-ପୁରୀ ଜାତୀୟ ରାଜପଥ କଡ଼ରେ ଥିବା ଏହି ସ୍ୱାସ୍ଥ୍ୟକେନ୍ଦ୍ର ଉପରେ ପିପିଲି, ଡେଲାଙ୍ଗ, ସତ୍ୟବାଦୀ ବ୍ଲକ ଲୋକେ ନିର୍ଭରଶୀଳ । କିନ୍ତୁ ଅନେକ ସମୟରେ ଡାକ୍ତରଖାନାଟି ବନ୍ଦ ରହୁଥିବାରୁ କ୍ଷୋଭ ପ୍ରକାଶ କରିଛନ୍ତି ରୋଗୀ । ସେହିପରି ନିମାପଡ଼ା ଅଞ୍ଚଳର ବଳଙ୍ଗା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ମଧ୍ୟ ଅବ୍ୟବସ୍ଥା ଘେରରେ । ଅସ୍ତରଙ୍ଗରେ ସ୍ୱାସ୍ଥ୍ୟ ସେବା ଦିନକୁ ବିଗିଡ଼ିବାରେ ଲାଗିଛି । ବ୍ଲକର ୨ଟି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଛାଡ଼ିଦେଲେ ଅନ୍ୟ ସବୁ ଆୟୁଷ୍ମାନ ଆରୋଗ୍ୟ ମନ୍ଦିର ଦିନକୁ ଓଳିଏ ଖୋଲୁଛି । ଫଳରେ ରୋଗୀ କଟକ, ଭୁବନେଶ୍ବର ଯିବାକୁ ବାଧ୍ୟ ହେଉଛନ୍ତି I 

ସରକାରୀ ଛୁଟି ହେଉ କି ରବିବାର । ସକାଳ ୯ଟାରୁ ଦିନ ଗୋଟାଏ ଏବଂ ଦିନ ୨ଟାରୁ ସନ୍ଧ୍ୟା ୫ଟା ଯାଏଁ ଖୋଲା ରଖିବାକୁ ନିର୍ଦ୍ଦେଶ ରହିଛି । କର୍ମଚାରୀ ଓ ଡାକ୍ତର ଉପସ୍ଥିତ ରହିବେ । ହେଲେ ପୁରୀ ମୁଖ୍ୟ ଚିକିତ୍ସାଳୟରେ ମନ ଇଚ୍ଛା ବିଭାଗ ବନ୍ଦ କରିଦେଉଛନ୍ତି ବାବୁ । ସରକାରୀ ଛୁଟି, ମାସର ଦ୍ୱିତୀୟ ଶନିବାର ଓ ଚତୁର୍ଥ ଶନିବାର ଓ ପ୍ରତ୍ୟେକ ରବିବାର ବିଶେଷଜ୍ଞ ରହୁନାହାନ୍ତି । ଫଳରେ ଦୂରଦୂରାନ୍ତରୁ ଆସିଥିବା ରୋଗୀ ହଇରାଣ ହେଉଛନ୍ତି । ଆଉ ଯେଉଁ ବିଭାଗ ଖୋଲା ରହୁଛି, ସେଥିରେ ବିଶେଷଜ୍ଞମାନେ ରହୁନାହାନ୍ତି କେବଳ ଏସ୍‌ଆର ଓ ଜେଆର ରହୁଛନ୍ତି । କିଏ କେତେବେଳେ ଆସୁଛନ୍ତି କେତେବେଳେ ଯାଉଛନ୍ତି ତା’ର କୌଣସି ହିସାବ ନାହିଁ । ମିଳିଥିବା ସୂଚନା ଅନୁସାରେ ପୁରୀରେ ଥିବା ୪ଟି ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଅପରାହ୍ନରେ ବନ୍ଦ ରହୁଛି । 

ପୁରୀ ଜିଲ୍ଲାରେ ମୋଟ ୪୪ଟି ପିଏଚ୍‌ସି ଏବଂ ୧୬ଟି ସିଏଚ୍‌ସି ରହିଛି । ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର କେତେବେଳେ ଖୋଲୁଛି ତ କେତେବେଳେ ବନ୍ଦ । କେଉଁଠି ଡାକ୍ତର ନାହାଁନ୍ତି ତ କେଉଁଠି ନାହିଁ ଆବଶ୍ୟକୀୟ ଉପକରଣ । ଏଠି ପ୍ରଶ୍ନ ଉଠୁଛି, ସ୍ୱାସ୍ଥ୍ୟସେବାରେ ଏ ଅବହେଳା କାହିଁକି ? ଏହାର ସମୀକ୍ଷା କରାଯାଉନାହିଁ କାହିଁକି ? ନା ଜାଣିଶୁଣି ସରକାରଙ୍କୁ ବଦନାମ୍‌ କରିବାକୁ ଚେଷ୍ଟା କରୁଛନ୍ତି ବାବୁମାନେ ! ଏତେ ସବୁ ପ୍ରଶ୍ନ ଭିତରେ ଦେଖାଯାଉ, କେବେ ଏହାର ସମାଧାନ ହେଉଛି ।