BSFକୁ ବଡ଼ ସଫଳତା : ସୀମାରେ ପାକିସ୍ତାନୀ ଡ୍ରୋନ୍ ସହ ବହୁ ପରିମାଣର ହେରୋଇନ୍ , ପିସ୍ତଲ ଜବତ

କନକ ବ୍ୟୁରୋ: ଭାରତ-ପାକିସ୍ଥାନ ସୀମାରେ ପୁଣିଥରେ ପାକିସ୍ତାନର ଏକ ବଡ଼ ଧରଣର ଷଡ଼ଯନ୍ତ୍ରକୁ ପଣ୍ଡ କରିଦେଇଛି ବିଏସ୍‌ଏଫ୍‌ । ପଞ୍ଜାବର ତରନ ତାରନ ଏବଂ ଫିରୋଜପୁର ଜିଲ୍ଲାରେ BSF ଯବାନମାନେ ଗତ ୨୪ ଘଣ୍ଟା ମଧ୍ୟରେ ୬ଟି ପାକିସ୍ତାନୀ ଡ୍ରୋନ୍‌କୁ ଠାବ କରି ଖସାଇ ଦେଇଛନ୍ତି । ଏହା ସହିତ ଏକ କିଲୋଗ୍ରାମରୁ ଅଧିକ ହେରୋଇନ୍ ଏବଂ ତିନୋଟି ପିସ୍ତଲ ମଧ୍ୟ ଜବତ କରାଯାଇଛି ।

BSF ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗୁଇନ୍ଦା ସୂଚନା ଆଧାରରେ ଯବାନମାନେ ସୀମାନ୍ତ ଅଞ୍ଚଳରେ ସତର୍କ ନଜର ରଖିଥିଲେ । ଏହି ସମୟରେ ପାକିସ୍ଥାନ ପଟୁ ଭାରତୀୟ ସୀମାକୁ ପ୍ରବେଶ କରୁଥିବା ଏହି ଡ୍ରୋନ୍‌ଗୁଡ଼ିକୁ ଠାବ କରାଯାଇଥିଲା । BSFର ଏହି ସଫଳତା ପାକିସ୍ତାନର ନିଶା କାରବାର ଏବଂ ଆତଙ୍କବାଦୀ କାର୍ଯ୍ୟକଳାପକୁ ଏକ ବଡ଼ ଝଟକା ଦେଇଛି । ସୀମା ପାରରୁ ଡ୍ରୋନ୍ ମାଧ୍ୟମରେ ଅସ୍ତ୍ରଶସ୍ତ୍ର ଏବଂ ନିଶାଦ୍ରବ୍ୟ ପଠାଇବା ପାକିସ୍ତାନୀ ସ୍ମଗଲରଙ୍କ ପାଇଁ ଏକ ସାଧାରଣ ଉପାୟ ପାଲଟିଛି । କିନ୍ତୁ BSF ଯବାନଙ୍କ ତତ୍ପରତା ଯୋଗୁଁ ସେମାନଙ୍କର ଅଧିକାଂଶ ପ୍ରୟାସ ବିଫଳ ହେଉଛି । ଘଟଣା ପରେ ସମ୍ପୃକ୍ତ ଅଞ୍ଚଳରେ BSF ପକ୍ଷରୁ ସର୍ଚ୍ଚ ଅପରେସନକୁ ଆହୁରି ଜୋରଦାର କରାଯାଇଛି ।