ହାରିବା ପରେ ଆପରେ ହଲଚଲ; କେଜ୍ରିୱାଲଙ୍କ ବୈଠକରେ ପଞ୍ଜାବ ବିଧାୟକ

କନକ ବ୍ୟୁରୋ : ଦିଲ୍ଲୀ ବିଧାନସଭା ନିର୍ବାଚନରେ ଆମ ଆଦମୀ ପାର୍ଟିର ଶୋଚନୀୟ ପରାଜୟ ପରେ ଅରବିନ୍ଦ କେଜ୍ରିୱାଲ ପଞ୍ଜାବ ବିଧାୟକ ଏବଂ ମନ୍ତ୍ରୀମାନଙ୍କ ସହିତ ଏକ ଗୁରୁତ୍ୱପୂର୍ଣ୍ଣ ବୈଠକ କରୁଛନ୍ତି । ଏହି ବୈଠକରେ ଯୋଗଦେବା ପାଇଁ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ସମେତ ୭୦ ଜଣ ବିଧାୟକ କପୁରଥଲା ହାଉସରେ ପହଞ୍ଚିଛନ୍ତି । ଏହି ବୈଠକ ଖୁବ୍‌ଶୀଘ୍ର ଆରମ୍ଭ ହେବ । ଏଥିରେ ଆଗାମୀ ଋଣନୀତି ଉପରେ ଆଲୋଚନା କରାଯିବ । ଦିଲ୍ଲୀ ନିର୍ବାଚନରେ ପରାଜୟ ଦଳକୁ ଏକ ବଡ଼ ଆଘାତ ଦେଇଥିବାରୁ ଦଳର ପରିସ୍ଥିତି ଉପରେ ଆଲୋଚନା କରିବା ପାଇଁ ବିଶେଷ ଭାବରେ ଏହି ବୈଠକ ଡକାଯାଇଛି । 

'ପଞ୍ଜାବର ମୁଖ୍ୟମନ୍ତ୍ରୀ ହେବା ପାଇଁ ଉପାୟ ଖୋଜୁଛନ୍ତି କେଜ୍ରିୱାଲ୍'

ରାଜୌରୀ ଗାର୍ଡେନ ବିଧାନସଭା ଆସନରୁ ବିଜେପିର ବିଜୟୀ ପ୍ରାର୍ଥୀ ମନଜିନ୍ଦର ସିଂହ ସିରସା କହିଛନ୍ତି,ଅରବିନ୍ଦ କେଜ୍ରିୱାଲ୍ ଏବେ ପଞ୍ଜାବର ମୁଖ୍ୟମନ୍ତ୍ରୀ ହେବାର ଉପାୟ ଖୋଜୁଛନ୍ତି । ସେ ଦିଲ୍ଲୀରେ ହାରିଯାଇଛନ୍ତି କିନ୍ତୁ ପଞ୍ଜାବ ବିଧାୟକମାନଙ୍କର ଏକ ବୈଠକ ଡାକିଛନ୍ତି । ସେ ଦେଖାଇବାକୁ ଚାହୁଁଛନ୍ତି ଯେ ଭଗବନ୍ତ ମାନ ବିଫଳ ହୋଇଛନ୍ତି । ସେଠାରେ ଦୁର୍ନୀତି ଚାଲିଛି,ସେ ସେଠାକାର ମହିଳାମାନଙ୍କୁ ୧୦୦୦ ଟଙ୍କା ଦେଇ ପାରୁନାହାଁନ୍ତି । ଏହି ସମସ୍ତ ଦୋଷ ଭଗବନ୍ତ ମାନଙ୍କୁ ଦେଇ ବିଧାୟକମାନଙ୍କୁ କହିବେ ଯେ ପଞ୍ଜାବର ପରିସ୍ଥିତି ବହୁତ ଖରାପ ତୁମେ ପଞ୍ଜାବକୁ ବଞ୍ଚାଅ । ଏହି ସବୁ ନାଟକ କରିବାକୁ କେଜ୍ରିୱାଲ ପ୍ରସ୍ତୁତ କରୁଛନ୍ତି । କ୍ଷମତାର ନିଶାରେ ଜଣେ ବ୍ୟକ୍ତି କ'ଣ କରିପାରେ ଏହା ଶୀଶମହଲ ମାଧ୍ୟମରେ ଲୋକଙ୍କୁ ଦେଖାଇବା ଉଚିତ ।

'ଆପ ସରକାରର ପତନ ହୋଇପାରେ': ବିଜେପି

ଏହି ବୈଠକକୁ ନେଇ ବିଜେପି ସାଂସଦ ଯୋଗେନ୍ଦ୍ର ଚନ୍ଦୋଲିଆ କହିଛନ୍ତି,"ଦିଲ୍ଲୀର ଲୋକମାନେ ଅରବିନ୍ଦ କେଜରିୱାଲଙ୍କ ଗର୍ବକୁ ଭାଙ୍ଗି ଦେଇଛନ୍ତି । ସେ ରିମୋଟରେ ପଞ୍ଜାବ ସରକାର ଚଳାଉଥିଲେ କିନ୍ତୁ ବର୍ତ୍ତମାନର ପରିସ୍ଥିତିରେ ଭଗବନ୍ତ ମାନ ମୁଖ୍ୟମନ୍ତ୍ରୀ ରହିବା ଏବଂ ଆମ ଆଦମୀ ପାର୍ଟି ସରକାର ସହ ରହିବା ବହୁତ କଷ୍ଟକର । 

ବିଜେପି ସାଂସଦ ସଞ୍ଜୟ ଜୟସୱାଲ କହିଛନ୍ତି,ଆମ ଆଦମୀ ପାର୍ଟି ଏକ ସମ୍ପୂର୍ଣ୍ଣ ଅରାଜକତାବାଦୀ ଦଳ । ସେମାନେ ଦେଶ ବିରୋଧୀ ଗୋଷ୍ଠୀଙ୍କ ଠାରୁ ସାହାଯ୍ୟ ନିଅନ୍ତି । ଦିଲ୍ଲୀ ପରି ପଞ୍ଜାବରେ ସେମାନେ ସତ୍ତା ନ ହରାନ୍ତୁ ସେହି ଚେଷ୍ଟାରେ ଅଛି ଆପ୍ ଦଳ  । ଅରବିନ୍ଦ କେଜରିୱାଲ ଦିଲ୍ଲୀରେ ବେରୋଜଗାର ହୋଇଯାଇଛନ୍ତି । ସେଥିପାଇଁ ପଞ୍ଜାବର ବିଧାୟକମାନଙ୍କୁ ଡାକି ସେ ଦେଖାଇ ଦେଉଛନ୍ତି ଯେ ତାଙ୍କର ଏବେ ବି ଆମ ଆଦମୀ ପାର୍ଟି ଉପରେ ନିୟନ୍ତ୍ରଣ ଅଛି ।