କନକ ବ୍ୟୁରୋ : ରାଜ୍ୟରେ ଶିକ୍ଷକ ବଦଳି ପ୍ରକ୍ରିୟାରେ ସାଂସଦ ଓ ବିଧାୟକମାନଙ୍କ ହସ୍ତକ୍ଷେପ ଏବଂ ସୁପାରିସ ଉପରେ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି ଓଡ଼ିଶା ହାଇକୋର୍ଟ । ଜନପ୍ରତିନିଧିମାନଙ୍କ ସୁପାରିସକୁ ଆଧାର କରି ଶିକ୍ଷକ ବଦଳି କରିବା କ୍ଷମତା ଉପରେ ଉଚ୍ଚ ନ୍ୟାୟାଳୟ ରୋକ ଲଗାଇଛନ୍ତି । ଏହି ଗୁରୁତ୍ୱପୂର୍ଣ୍ଣ ରାୟ ପରେ ଶିକ୍ଷା ବ୍ୟବସ୍ଥାରେ ରାଜନୈତିକ ହସ୍ତକ୍ଷେପ କମିବ ବୋଲି ଆଶା କରାଯାଉଛି ।

Advertisment

ରାଜନୈତିକ ଚାପ ଏବଂ ଜନପ୍ରତିନିଧିଙ୍କ ସୁପାରିସ ଯୋଗୁଁ ବଦଳି ପ୍ରକ୍ରିୟା କିପରି ପ୍ରଭାବିତ ହେଉଛି, ସେନେଇ କୋର୍ଟଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ଅଭିଯୋଗ ହୋଇଥିଲା ଯେ ବଦଳି ପାଇଁ ଥିବା ନିର୍ଦ୍ଦିଷ୍ଟ ନିୟମାବଳୀକୁ ଅଣଦେଖା କରାଯାଇ କେବଳ ରାଜନୈତିକ ସୁପାରିସକୁ ଗୁରୁତ୍ୱ ଦିଆଯାଉଛି । ଯାହାଦ୍ୱାରା ଯୋଗ୍ୟ ଶିକ୍ଷକମାନେ ଅସୁବିଧାର ସମ୍ମୁଖୀନ ହେଉଛନ୍ତି ।

ହାଇକୋର୍ଟ ଏହି ପ୍ରସଙ୍ଗକୁ ଗମ୍ଭୀରତାର ସହ ନେଇ ସ୍ପଷ୍ଟ କରିଛନ୍ତି ଯେ ଶିକ୍ଷକ ବଦଳି ଏକ ପ୍ରାଶାସନିକ ପ୍ରକ୍ରିୟା ଏବଂ ଏହା ସରକାରୀ ନିୟମ ଓ ଆବଶ୍ୟକତା ଅନୁସାରେ ହେବା ଉଚିତ୍ । ଏଥିରେ କୌଣସି ଜନପ୍ରତିନିଧିଙ୍କ ସୁପାରିସ କିମ୍ବା ଚିଠିକୁ ଗ୍ରହଣ କରାଯିବା ଅନୁଚିତ୍ । କୋର୍ଟ କହିଛନ୍ତି ଯେ ଏଭଳି ହସ୍ତକ୍ଷେପ କେବଳ ଶିକ୍ଷା ବ୍ୟବସ୍ଥାର ମାନକୁ କ୍ଷୁର୍ଣ୍ଣ କରେ ନାହିଁ ବରଂ ଶିକ୍ଷକମାନଙ୍କ ମନୋବଳକୁ ମଧ୍ୟ ଦୁର୍ବଳ କରିଥାଏ ।

ଏହି ରାୟ ପରେ, ବିଦ୍ୟାଳୟ ଓ ଗଣଶିକ୍ଷା ବିଭାଗକୁ ନିର୍ଦ୍ଦେଶ ଦିଆଯାଇଛି ଯେ, ଭବିଷ୍ୟତରେ କୌଣସି ଶିକ୍ଷକ ବଦଳି କେବଳ ପ୍ରଶାସନିକ ଆବଶ୍ୟକତା, ଛାତ୍ରଛାତ୍ରୀଙ୍କ ସ୍ୱାର୍ଥ ଏବଂ ବଦଳି ନିୟମାବଳୀକୁ ଆଧାର କରି କରାଯିବ। କୌଣସି ସାଂସଦ ବା ବିଧାୟକଙ୍କ ସୁପାରିସକୁ ଏଥିପାଇଁ ବିଚାରକୁ ନିଆଯିବ ନାହିଁ ।
ହାଇକୋର୍ଟଙ୍କ ଏହି ପଦକ୍ଷେପକୁ ଶିକ୍ଷାବିତ୍ ଏବଂ ବୁଦ୍ଧିଜୀବୀ ମହଲରେ ବ୍ୟାପକ ସ୍ୱାଗତ କରାଯାଇଛି। ଏହାଦ୍ୱାରା ଶିକ୍ଷକ ବଦଳି ପ୍ରକ୍ରିୟାରେ ସ୍ୱଚ୍ଛତା ଆସିବା ସହ ରାଜନୈତିକ ପ୍ରଭାବରୁ ଶିକ୍ଷା ବ୍ୟବସ୍ଥା ମୁକ୍ତ ହୋଇପାରିବ ବୋଲି ମତ ପ୍ରକାଶ ପାଇଛି ।