ସଫଳତା ପରିଶ୍ରମରେ ମିଳେ , ପରୀକ୍ଷାର ମାର୍କରେ ନୁହେଁ ; CJI ବି ଆର୍‌ ଗଭଇ

କନକ ବ୍ୟୁରୋ : ପ୍ରଧାନ ବିଚାରପତି ବି ଆର୍ ଗଭଇ ଶନିବାର ଦିନ କହିଛନ୍ତି ଯେ ପେସାଦାର ଜୀବନରେ ସଫଳତାର ସ୍ତର ପରୀକ୍ଷା ଫଳାଫଳ ଦ୍ୱାରା ନୁହେଁ, ବରଂ ଦୃଢ଼ ସଂକଳ୍ପ, କଠିନ ପରିଶ୍ରମ, ସମର୍ପଣ ଏବଂ କାର୍ଯ୍ୟ ପ୍ରତି ପ୍ରତିବଦ୍ଧତା ଦ୍ୱାରା ନିର୍ଦ୍ଧାରିତ ହୋଇଥାଏ । ପ୍ରଧାନ ବିଚାରପତି ପାଣାଜୀ ନିକଟସ୍ଥ ମୀରାମାରରେ ଥିବା ଭି.ଏମ୍. ସାଲଗାଓଁକର ଆଇନ ମହାବିଦ୍ୟାଳୟର ସ୍ୱର୍ଣ୍ଣ ଜୟନ୍ତୀ ସମାରୋହରେ କହିଛନ୍ତି ଯେ ଆଇନ ଶିକ୍ଷା ବ୍ୟବସ୍ଥାରେ ଆମୂଳଚୂଳ ପରିବର୍ତ୍ତନ ଆସିଛି ।

ବି ଆର୍ ଗଭଇ ଆଇନ ମହାବିଦ୍ୟାଳୟର ଛାତ୍ରଛାତ୍ରୀଙ୍କୁ ସମ୍ବୋଧିତ କରି କହିଛନ୍ତି , 'ପରୀକ୍ଷାରେ ନିଜର ରାଙ୍କକୁ ଦେଖନ୍ତୁ ନାହିଁ, କାରଣ ଏହି ଫଳାଫଳ ଆପଣ କେଉଁ ସ୍ତରର ସଫଳତା ପାଇବେ ତାହା ନିର୍ଦ୍ଧାରଣ କରେ ନାହିଁ । ଆପଣଙ୍କର ଦୃଢ଼ ସଂକଳ୍ପ, କଠିନ ପରିଶ୍ରମ, ସମର୍ପଣ ଏବଂ ପେସା ପ୍ରତି ପ୍ରତିବଦ୍ଧତା ହିଁ ଗୁରୁତ୍ୱପୂର୍ଣ୍ଣ ।' ପ୍ରଧାନ ବିଚାରପତି ଗଭଇ କହିଛନ୍ତି ଯେ ସେ ଜଣେ ଭଲ ଛାତ୍ର ଥିଲେ, କିନ୍ତୁ ପ୍ରାୟତଃ କ୍ଲାସ୍ ଛାଡି ଦେଉଥିଲେ । ଗଭଇ ମନେ ପକାଇଥିଲେ ଯେ ଯେତେବେଳେ ସେ ମୁମ୍ବାଇର ସରକାରୀ ଆଇନ ମହାବିଦ୍ୟାଳୟରେ ପଢ଼ୁଥିଲେ । ସେତେବେଳେ ସେ କ୍ଲାସ୍ ଛାଡ଼ି କଲେଜର ପାଚେରି ଉପରେ ବସୁଥିଲେ ଏବଂ କ୍ଲାସରେ ତାଙ୍କର ଉପସ୍ଥାନ ତାଙ୍କ ସାଙ୍ଗମାନେ ପକାଇ ଦେଉଥିଲେ । ସେ ଏହା ମଧ୍ୟ କହିଛନ୍ତି , ମୋତେ ଅନୁକରଣ କରନାହିଁ । 

ସିଜେଆଇ ଗଭଇଙ୍କ ପିତା ଦିବଙ୍ଗତ ଆର୍ ଏସ୍ ଗଭଇ ରିପବ୍ଲିକାନ୍ ପାର୍ଟି ଅଫ୍ ଇଣ୍ଡିଆ (ଗଭଇ)ର ପ୍ରତିଷ୍ଠାତା ଥିଲେ। ସେ ୧୯୭୮ରୁ ୧୯୮୨ ପର୍ଯ୍ୟନ୍ତ ମହାରାଷ୍ଟ୍ର ବିଧାନ ପରିଷଦର ସଭାପତି ଥିଲେ । ପରେ ସେ ବିହାର, ସିକ୍କିମ ଏବଂ କେରଳର ରାଜ୍ୟପାଳ ହୋଇଥିଲେ । ପ୍ରଧାନ ବିଚାରପତି କହିଛନ୍ତି ଯେ ଫଳାଫଳରେ ପ୍ରଥମ ସ୍ଥାନ ପାଇଥିବା ଛାତ୍ର ଜଣେ ଆପରାଧିକ ମାମଲାର ଓକିଲ ହେଲେ, ଯେତେବେଳେ କି ଦ୍ୱିତୀୟ ସ୍ଥାନରେ ଥିବା ଛାତ୍ର ଜଣେ ହାଇକୋର୍ଟର ବିଚାରପତି ହେଲେ । ସେ କହିଥିଲେ, 'ଆଉ ତୃତୀୟରେ ଥିଲି ମୁଁ, ଯିଏ ଏବେ ଭାରତର ପ୍ରଧାନ ବିଚାରପତି ଅଛି ।'

ସେ କହିଛନ୍ତି ଯେ ସେ କଲେଜ ନ ଯାଇ ମଧ୍ୟ ମେରିଟ୍ ତାଲିକାରେ ତୃତୀୟ ସ୍ଥାନରେ ରହିଥିଲେ, କିନ୍ତୁ ସେ ବହି ପଢ଼ୁଥିଲେ ଏବଂ ପାଞ୍ଚ ବର୍ଷର ପରୀକ୍ଷା ପ୍ରଶ୍ନପତ୍ର ସମାଧାନ କରୁଥିଲେ । ପ୍ରଧାନ ବିଚାରପତି ଛାତ୍ରଛାତ୍ରୀଙ୍କୁ କହିଥିଲେ, 'ଏବେ ଆପଣମାନେ ଭାଗ୍ୟବାନ ଯେ ପାଞ୍ଚ ବର୍ଷିଆ ପାଠ୍ୟକ୍ରମ ଆସିବା ସହିତ ଆଇନ ଶିକ୍ଷା ବ୍ୟବସ୍ଥାରେ ଆମୂଳଚୂଳ ପରିବର୍ତ୍ତନ ଆସିଛି ।' ଯେତେବେଳେ ମୁଁ ବମ୍ବେ ହାଇକୋର୍ଟର ବିଚାରପତି ଭାବେ 'ମୁଟ୍ କୋର୍ଟ'ର ଅଧ୍ୟକ୍ଷତା କରୁଥିଲି ଏବଂ ଛାତ୍ରଛାତ୍ରୀଙ୍କ ଯୁକ୍ତି ଶୁଣୁଥିଲି, ମୋତେ ବେଳେବେଳେ ଲାଗୁଥିଲା ଯେ ହାଇକୋର୍ଟର ଓକିଲମାନେ 'ମୁଟ୍ କୋର୍ଟ'ରେ ଉପସ୍ଥିତ ହେବା ଉଚିତ ଏବଂ ଯୁବ ଓକିଲମାନଙ୍କଠାରୁ କୋର୍ଟରେ ଯୁକ୍ତି କରିବା ଶିଖିବା ଉଚିତ ।'

ପ୍ରଧାନ ବିଚାରପତିଙ୍କ ଅନୁଯାୟୀ, ଆଜିକାଲି ଦିଆଯାଉଥିବା ବ୍ୟାବହାରିକ ପ୍ରଶିକ୍ଷଣ ଛାତ୍ରଛାତ୍ରୀଙ୍କୁ ଓକିଲ ଭାବରେ ନିଜର କ୍ୟାରିୟର ଗଢ଼ିବାରେ ସାହାଯ୍ୟ କରୁଛି । ସେ କହିଛନ୍ତି, 'ଆମ ପାଖକୁ ବହୁତ ଇଣ୍ଟର୍ନ ଆସନ୍ତି ଏବଂ ସେମାନଙ୍କ ପାଖରେ ଥିବା ଗଭୀର ଜ୍ଞାନକୁ ଅନୁକରଣ କରିବାକୁ ଚେଷ୍ଟା କରିବା ଉଚିତ ।' କନିଷ୍ଠ ଓକିଲମାନଙ୍କ ସମସ୍ୟା ବିଷୟରେ ସେ କହିଛନ୍ତି ଯେ କିଛି କନିଷ୍ଠ ଓକିଲଙ୍କୁ ବରିଷ୍ଠ ଓକିଲମାନଙ୍କ ଦ୍ୱାରା ଦିଆଯାଉଥିବା ପାରିଶ୍ରମିକ ବହୁତ କମ୍, ଯେଉଁଥିପାଇଁ ସେମାନଙ୍କ ପାଇଁ ଜୀବନଯାପନ କରିବା କଷ୍ଟକର ହୋଇଯାଏ ।