ବଢ଼ିଆ ଲାଭ ଦେଉଛି ରୁଟି ବ୍ୟବସାୟ ; ବିବାହ, ବ୍ରତ ଭଳି ଭୋଜିଭାତ ପାଇଁ ମିଳୁଛି ଅର୍ଡର

କନକ ବ୍ୟୁରୋ : ପୁଅର ଉଜ୍ଜ୍ବଳ ଭବିଷ୍ୟତ ପାଇଁ ବାପା ଆରମ୍ଭ କଲେ ରୁଟି ଫ୍ୟାକ୍ଟ୍ରି । ବ୍ୟବସାୟରେ ପ୍ରଥମେ ବିଫଳ ହେବା ପରେ ନିଷ୍ଠା ଓ ଚେଷ୍ଟା ବଳରେ ଏବେ ଚାଖୁଛନ୍ତି ସଫଳତାର ସ୍ୱାଦ । ୫ରୁ ୭ଜଣଙ୍କୁ ଦେଇପାରିଛନ୍ତି ନିଯୁକ୍ତି । ଗୋଟିଏ ମାସରେ ବିକ୍ରି କରୁଛନ୍ତି ଏକ ଲକ୍ଷରୁ ଅଧିକ ଟଙ୍କାର ରୁଟି । ଚଣ୍ଡିଖୋଲ ନିକଟ ସୁଙ୍ଗୁଡ଼ା ଗାଁର ରାଜକିଶୋର ସାହୁ ଟେଣ୍ଟ୍‌ ବ୍ୟବସାୟୀ ଥିଲେ । ଧୀରେ ଧୀରେ ବ୍ୟବସାୟରେ ପ୍ରତିଯୋଗିତା ଓ ଅଧିକ ପରିଶ୍ରମ ପଡ଼ିବାରୁ କିଛି ନୂଆ କରିବାକୁ ଚିନ୍ତା କଲେ । ପଢୁଆ ପୁଅକୁ କିପରି ନିଯୁକ୍ତି ଦେଇ ସ୍ୱାବଲମ୍ବୀ କରିବେ ସେନେଇ ବର୍ଷେ ତଳେ ଆରମ୍ଭ କରିଥିଲେ ରୁଟି ଫ୍ୟାକ୍ଟ୍ରି । ପୁରୀ ଜିଲ୍ଲା ପିପିଲି ଅଞ୍ଚଳରୁ ୮ ଲକ୍ଷ ଟଙ୍କା ଦେଇ ରୁଟି ତିଆରି ମେସିନ୍‌ କିଣିଥିଲେ । ମାତ୍ର ଦୁଇମାସ ପରେ ତାହା ଅଚଳ ହୋଇଯିବାରୁ ରାଜକିଶୋର ହତାଶ ନହୋଇ ଭୁବନେଶ୍ୱରରୁ ଆଉ ଦୁଇଟି ମେସିନ ଆଣିଥିଲେ । ଏବେ ସ୍ଥିତିରେ ସୁଧାର ଆସିବା ସହ ତାଙ୍କୁ ବ୍ୟାବସାୟିକ ସଫଳତା ମିଳିଛି । ଏହି ରୁଟି ୟୁନିଟ୍‌ରେ ସେ ପୁଅ ସହ ଅନ୍ୟମାନଙ୍କୁ ବି ନିଯୁକ୍ତି ଦେଇଛନ୍ତି ।

ରାଜକିଶୋର ଏବେ ତିନୋଟି ଅତ୍ୟାଧୁନିକ ମେସିନରେ ରୁଟି ତିଆରି କରୁଛନ୍ତି । ପାଞ୍ଚରୁ ସାତ ଜଣଙ୍କୁ ମାସକୁ ଚାରିରୁ ପାଞ୍ଚ ହଜାର ଟଙ୍କା ଦେଇ ଆତ୍ମନିର୍ଭରଶୀଳ କରାଇଛନ୍ତି । ବିବାହ, ବ୍ରତଘର, ଅନ୍ୟ ଉତ୍ସବ ସବୁଆଡ଼ୁ ରାଜକିଶୋରଙ୍କୁ ମିଳୁଛି ଅର୍ଡର । ଏହି ୟୁନିଟ୍‌ରେ ପ୍ରତିଦିନ ପାଖାପାଖି ପଚାଶ କେଜି ଅଟାର ରୁଟି କରାଯାଉଛି । ଅତ୍ୟନ୍ତ ପରିଷ୍କାର ପରିଚ୍ଛନ୍ନ ପରିବେଶରେ ରୁଟି ତିଆରି ହେଉଛି । ଜରିରେ ଗରମ ଗରମ ରୁଟିକୁ ମେସିନରେ ପ୍ୟାକିଂ କରି ଗ୍ରାହକଙ୍କୁ ଯୋଗାଇ ଦିଆଯାଉଛି । କେନ୍ଦ୍ରାପଡ଼ା, ଜାରକା, ଛତିଆ, ବାଲିଚନ୍ଦ୍ରପୁର, କୁଆଖିଆ, ଟାଙ୍ଗୀ ଆଦି ଅଞ୍ଚଳକୁ ବସ୍ ଯୋଗେ ରୁଟି ଯାଉଛି । ପରିଣତ ବୟସରେ ରାଜ କିଶୋରଙ୍କ ଏହି ବ୍ୟାବସାୟିକ ସଫଳତା ଅନ୍ୟମାନଙ୍କ ପାଇଁ ପାଲଟିଛି ଉଦାହରଣ ।