ଉପରାଷ୍ଟ୍ରପତି ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ, ଖୁବଶୀଘ୍ର ଜାରିହେବ ବିଜ୍ଞପ୍ତି

କନକବ୍ୟୁରୋ : ଉପରାଷ୍ଟ୍ରପତି ନିର୍ବାଚନ ପାଇଁ ଖୁବଶୀଘ୍ର ଜାରି ହେବ ବିଜ୍ଞପ୍ତି । ଏନେଇ ନିର୍ବାଚନ କମିସ ନରଙ୍କ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି ।  ବିଜ୍ଞପ୍ତି ଜରିଆରେ ଖୁବ ଶୀଘ୍ର ତାରିଖ ଘୋଷଣା କରିପାରନ୍ତି ଭାରତୀୟ ନିର୍ବାଚନ ଆୟୋଗ । ନିକଟରେ ସ୍ବାସ୍ଥ୍ୟଗତ ସମସ୍ୟା କାରଣରୁ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଛନ୍ତି ଜଗଦୀପ ଧନଖଡ଼ ।

ପରବର୍ତ୍ତୀ ଉପରାଷ୍ଟ୍ରପତି କିଏ ହେବ ତାକୁ ନେଇ ଚର୍ଚ୍ଚା ଆରମ୍ଭ ହୋଇଥିବା ବେଳେ ଖୁବଶୀଘ୍ର ନିର୍ବାଚନ ନେଇ ବିଜ୍ଞପ୍ତି ପ୍ରକାଶ ପାଇବା ସହ ତାରିଖ ଘୋଷଣା କରାଯିବ। ସେପଟେ   ଉପରାଷ୍ଟ୍ରପତି ଜଗଦୀପ ଧନଖଡ ଇସ୍ତଫା ପରେ, ଏନଡିଏ ପଛୁଆ କିମ୍ବା ଅତ୍ୟନ୍ତ ପଛୁଆ ବର୍ଗର ପ୍ରାର୍ଥୀଙ୍କୁ ନୂଆ ଉପରାଷ୍ଟ୍ରପତି ପ୍ରାର୍ଥୀ ଭାବରେ ଠିଆ କରିବା ପାଇଁ ବିକଳ୍ପଗୁଡ଼ିକ ଉପରେ ବିଚାର କରୁଛି ।

ଅନେକ ଏନଡିଏ ସାଂସଦ, ନାମ ଗୋପନ ରଖି କହିଛନ୍ତି  ଶାସକ ମେଣ୍ଟ ପଛୁଆ ସମ୍ପ୍ରଦାୟର ପ୍ରାର୍ଥୀଙ୍କ ଆଡ଼କୁ ଢଳୁଛି । ଚର୍ଚ୍ଚା ହେଉଥିବା ନାମଗୁଡ଼ିକ ମଧ୍ୟରେ ସବୁଠୁ ଆଗରେ ଅଛନ୍ତି କେନ୍ଦ୍ର କୃଷି ମନ୍ତ୍ରୀ ରାମ ନାଥ ଠାକୁର । ରାମ ନାଥ ଠାକୁର ହେଉଛନ୍ତି ବିହାରର ପୂର୍ବତନ ମୁଖ୍ୟମନ୍ତ୍ରୀ ଏବଂ ଭାରତ ରତ୍ନ ପୁରସ୍କାରପ୍ରାପ୍ତ କରପୁରୀ ଠାକୁରଙ୍କ ପୁଅ । ରାମ ନାଥ ଠାକୁର ଅତି ପଛୁଆ ବର୍ଗ ଅଧୀନରେ ଆସୁଥିବା ନାଇ ସମ୍ପ୍ରଦାୟର ହୋଇଥିବାରୁ , ତାଙ୍କୁ ଏନଡିଏ ପ୍ରାର୍ଥୀ କରିବାର ଯଥେଷ୍ଟ ଆଶଙ୍କା ରହିଛି ।

ଏହାଛଡା ବିହାରରେ ବିଧାନସଭା ନିର୍ବାଚନ ହେବାକୁ ଥିବାରୁ ରାମ ନାଥ ଠାକୁରଙ୍କ ପ୍ରାର୍ଥୀ କରି ଏନଡିଏ ଭୋଟ ହାତେଇବାକୁ ଚେଷ୍ଟା କରିବ ।  ତେବେ ଉପରାଷ୍ଟ୍ରତି ରେସରେ ବିଜେପି ସଭାପତି ଜେ ପି ନଡ୍ଡା, ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜ , ବିହାର ରାଜ୍ୟପାଳ ମହମ୍ମଦ ଆରିଫ୍ ଖାନ , ପୂର୍ବତନ କେନ୍ଦ୍ର ମନ୍ତ୍ରୀ ମୁଖତାର ଆବାସ ନକଭି ଏବଂ ରାଜ୍ୟସଭା ଉପାଧ୍ୟକ୍ଷ ହରିବଂଶ ଅଛନ୍ତି ।

ଏଥିସହ  ଉପରାଷ୍ଟ୍ରପତି ପଦରୁ ଜଗଦୀପ ଧନଖଡଙ୍କ ଇସ୍ତଫାକୁ ନେଇ ଜାତୀୟ ରାଜନୀତି ସରଗରମ ହୋଇଛି । ତାଙ୍କ ଇସ୍ତଫା ପଛରେ ବିଭିନ୍ନ କାରଣ ଥିବା କୁହାଯାଉଛି  । ତେବେ ସ୍ବାସ୍ଥ୍ୟଗତ ସମସ୍ୟା କାରଣକୁ ସହଜରେ ଗ୍ରହଣ କରିପାରିନାହାନ୍ତି ବିରୋଧୀ  । ଜଗଦୀପ ଧନଖଡଙ୍କ ଇସ୍ତଫାକୁ ନେଇ ସରକାରଙ୍କୁ ଘେରିଛି କଂଗ୍ରେସ । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ କହିଛନ୍ତି, ଡାଲମେ କୁଛ କାଲା ହେ’  । ଏଥିସହ ସରକାରଙ୍କୁ ଏହା ଉପରେ ସ୍ପଷ୍ଟିକରଣ ଦେବାକୁ ଦାବି କରିଛନ୍ତି ଖଡଗେ । ଘଟଣାକୁ ନେଇ ପ୍ରଶ୍ନ କରିଛନ୍ତି କଂଗ୍ରେସ ନେତ୍ରୀ ସୁପ୍ରିୟା ସିନେଟ ।