ୱାୟନାଡରୁ ନାମାଙ୍କନ ଭରିଲେ ପ୍ରିୟଙ୍କା ଗାନ୍ଧୀ ; ଉପନିର୍ବାଚନ ପାଇଁ ପ୍ରାର୍ଥୀପତ୍ରରେ କଲେ ଦସ୍ତଖତ

କନକ ବ୍ୟୁରୋ: କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ବୁଧବାର ଦିନ କେରଳର ୱାୟନାଡରେ ହେବାକୁ ଥିବା ଲୋକସଭା ଉପନିର୍ବାଚନ ପାଇଁ ତାଙ୍କ ନାମାଙ୍କନପତ୍ରରେ ଦସ୍ତଖତ କରି ନିଜର ନିର୍ବାଚନୀ ଡେବ୍ୟୁ କରିଛନ୍ତି । ସେଠାରୁ ଲୋକସଭା ନିର୍ବାଚନରେ ଜିତିଥିବା ରାହୁଲ ଗାନ୍ଧୀ ସେହି ଆସନକୁ ଛାଡ଼ିବାକୁ ନିଷ୍ପତ୍ତି ନେବା ପରେ ୱାୟାନାଡ ଲୋକସଭା ଆସନ ପାଇଁ ଉପ-ନିର୍ବାଚନ ଜରୁରୀ ହୋଇପଡ଼ିଥିଲା। ପ୍ରିୟଙ୍କା ଗାନ୍ଧୀ ତାଙ୍କ ଭାଇ ରାହୁଲ ଗାନ୍ଧୀଙ୍କ ସହ ଆଜି ୱାୟାନାଡ ଉପ-ନିର୍ବାଚନ ପାଇଁ ନାମାଙ୍କନ ଦାଖଲ କରିବା ପୂର୍ବରୁ ଏକ ରୋଡ୍ ସୋ କରିବେ।

ନାମାଙ୍କନପତ୍ର ଦାଖଲ ସମୟରେ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖର୍ଗେ, କଂଗ୍ରେସ ସଂସଦୀୟ ଦଳର ଅଧ୍ୟକ୍ଷ ସୋନିଆ ଗାନ୍ଧୀ ଏବଂ ଦଳର ବରିଷ୍ଠ ନେତାମାନେ ଉପସ୍ଥିତ ରହିବେ। ଏହାପୂର୍ବରୁ ଅକ୍ଟୋବର ୨୨ ତାରିଖ ମଙ୍ଗଳବାର ଦିନ ପ୍ରିୟଙ୍କା ଗାନ୍ଧୀ ସୋନିଆ ଗାନ୍ଧୀଙ୍କ ସହ ପାହାଡିଆ ଜିଲ୍ଲାରେ ପହଞ୍ଚି ସ୍ଥାନୀୟ ଦଳର ନେତାମାନଙ୍କୁ ଭେଟିଥିଲେ। ମଲ୍ଲିକାର୍ଜୁନ ଖାର୍ଗେ ଏବଂ ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ପରେ ସେହି ଜିଲ୍ଲାରେ ପହଞ୍ଚିଥିଲେ।

ପ୍ରିୟଙ୍କାଙ୍କ ପ୍ରାର୍ଥୀପତ୍ର ସମ୍ପର୍କରେ ରାହୁଲ ଗାନ୍ଧୀ କହିଛନ୍ତି, "ୱାୟାନାଡର ଲୋକମାନେ ମୋ ହୃଦୟରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛନ୍ତି ଏବଂ ମୁଁ ମୋ ଭଉଣୀ ପ୍ରିୟଙ୍କା ଗାନ୍ଧୀଙ୍କ ଅପେକ୍ଷା ସେମାନଙ୍କ ପାଇଁ ଏକ ଭଲ ପ୍ରତିନିଧୀ କଳ୍ପନା କରିପାରିବି ନାହିଁ। ମୁଁ ନିଶ୍ଚିତ ଯେ ସେ ଜଣେ ଉତ୍ସାହୀ ଚାମ୍ପିଅନ୍ ହେବେ। ୱାୟାନାଡର ଆବଶ୍ୟକତାକୁ ନେଇ ସଂସଦରେ ଏକ ଶକ୍ତିଶାଳୀ ସ୍ୱର ପାଲଟିବେ ସେ।’’ ୱାୟାନାଡ୍ ଉପ-ନିର୍ବାଚନ ପାଇଁ ଭୋଟ୍ ନଭେମ୍ବର ୧୩ ତାରିଖରେ ହେବ ଏବଂ ନଭେମ୍ବର ୨୩ ତାରିଖରେ ଭୋଟ୍ ଗଣନା କରାଯିବ।