କନକ ବ୍ୟୁରୋ: ଅହମ୍ମଦାବାଦ ବିମାନ ଦୁର୍ଘଟଣାରେ ମୃତ୍ୟୁସଂଖ୍ୟା ଧୀରେଧୀରେ ବୃଦ୍ଧି ପାଇବାରେ ଲାଗିଛି । ଉଡ଼ାଣ ଭରିବାର ମାତ୍ର କେଇ ମିନିଟ୍‌ ମଧ୍ୟରେ ଏୟାର ଇଣ୍ଡିଆର ବିମାନ ସ୍ଥାନୀୟ ଏକ ଡାକ୍ତରୀ ଛାତ୍ରଙ୍କ ହଷ୍ଟେଲ୍‌ ଉପରେ ଦୁର୍ଘଟଣାଗ୍ରସ୍ତ ହୋଇଥିଲା । ସୂଚନା ପାଇବା କ୍ଷଣି ଘଟଣାସ୍ଥଳରେ ପହଞ୍ଚିଥିଲେ ଉଦ୍ଧାରକାରୀ ଦଳ । ସେତେବେଳେ ଆକାଶରେ କେବଳ କଳା ଧୂଆଁର ବାଦଲ ଦେଖିବାକୁ ମିଳିଥିଲା । ଏବେବି ଉଦ୍ଧାର କାର୍ଯ୍ୟ ଜାରି ରହିଛି । ମୃତକଙ୍କ ଚିହ୍ନଟ କରିବା ମୁସ୍କିଲ ହେଉଥିବା ନେଇ ସୂଚନା ମିଳୁଛି । ଏଣୁ ଯେଉଁମାନଙ୍କ ସମ୍ପର୍କୀୟ ବିମାନରେ ଯାତ୍ରା କରୁଥିଲେ ସେମାନଙ୍କ ସମ୍ପର୍କୀୟଙ୍କୁ ଡିଏନ୍‌ଏ ନମୁନା ଦେବାକୁ କୁହାଯାଇଛି । ସେପଟେ ଏହି ଘଟଣାକୁ ଶୋକ ପ୍ରକାଶ କରିଛନ୍ତି ରାଷ୍ଟ୍ରପତି, ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ।

Advertisment

ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋସିଆଲ ମିଡିଆ ଏକ୍ସରେ ଅହମ୍ମଦାବାଦ ଦୁର୍ଘଟଣାକୁ ନେଇ ଶୋକ ପ୍ରକାଶ କରିଛନ୍ତି । ସେ କହିଛନ୍ତି, "ଅହମ୍ମଦାବାଦରେ ଦୁଃଖଦ ବିମାନ ଦୁର୍ଘଟଣା ବିଷୟରେ ଜାଣିବା ପରେ ମୁଁ ଗଭୀର ଭାବରେ ମର୍ମାହତ । ଏହା ଏକ ହୃଦୟ ବିଦାରକ ଘଟଣା । ଏହି ଦୁଃଖର ମୁହୂର୍ତ୍ତରେ ମୁଁ ଦେଶବାସୀଙ୍କ ସହ ଛିଡ଼ା ହୋଇଛି ।"

ସେପଟେ ବିମାନ ଦୁର୍ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପ୍ରଧାନମନ୍ତ୍ରୀ ଲେଖିଛନ୍ତି, " ଅହମଦାବାଦ ବିମାନ ଦୁର୍ଘଟଣା ଖବର ଶୁଣି ମୁଁ ସ୍ତବ୍ଧ ଏବଂ ଦୁଃଖିତ । ଏହା ଏକ ହୃଦୟ ବିଦାରକ ଘଟଣା । ଦୁର୍ଘଟଣାରେ ମୃତାହତ ହୋଇଥିବା ବ୍ୟକ୍ତିଙ୍କୁ ଓ ସେମାନଙ୍କ ପରିବାର ପ୍ରତି ମୋର ସମବେଦନା ଜଣାଉଛି ।"

ଅହମ୍ମଦାବାଦ ଅଘଟଣକୁ ନେଇ ଶୋକ ପ୍ରକାଶ କରିଛନ୍ତି ସୁପ୍ରିମକୋର୍ଟ । ଏହି ଦୁର୍ଘଟଣାରେ କ୍ଷୟକ୍ଷତିର ଶିକାର ହୋଇଥିବା ବ୍ୟକ୍ତି ଓ ସେମାନଙ୍କ ପରିବାରବର୍ଗଙ୍କ ପ୍ରତି ସମବେଦନା ଜଣାଇଛନ୍ତି । ଏହା ସହିତ ବିଜେ ମେଡିକାଲ କଲେଜ ଛାତ୍ରଛାତ୍ରୀ ଓ ସିଭିଲ ହସ୍ପିଟାଲରେ ଥିବା ଛାତ୍ରଛାତ୍ରୀଙ୍କ ପାଇଁ ମଧ୍ୟ ସମବେଦନା ଜଣାଇଛନ୍ତି ସୁପ୍ରିମକୋର୍ଟ । ପ୍ରଧାନ ବିଚାରପତି କହିଛନ୍ତି, "ଏଭଳି ଏକ କଠିନ ସମୟରେ ନିଜ ପ୍ରିୟଜନଙ୍କୁ ହରାଇଥିବା ପରିବାରବର୍ଗଙ୍କ ପ୍ରତି ଆମେ ସମବେଦନା ଜଣାଉଛୁ । ଏଭଳି ସମୟର ମୁକାବିଲା କରିବା ପାଇଁ ସେମାନଙ୍କ ଶକ୍ତି ମିଳୁ ।

SC Press Release

ସେପଟେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ଅହମ୍ମଦାବାଦ ଦୁର୍ଘଟଣାକୁ ନେଇ ଶୋକ ପ୍ରକାଶ କରିଛନ୍ତି । ସେ ଏକ୍ସ ହ୍ୟାଣ୍ଡେଲ୍‌ରେ ଲେଖିଛନ୍ତି, " ଏୟାର ଇଣ୍ଡିଆର ଅହମ୍ମଦାବାଦ-ଲଣ୍ଡନ ବିମାନ ଦୁର୍ଘଟଣା ଖବର ଶୁଣି ମୁଁ ଗଭୀର ଭାବେ ଦୁଃଖିତ । ଏହି କଠିନ ସମୟରେ ସମସ୍ତ ଯାତ୍ରୀ, କ୍ର୍ୟୁ ସଦସ୍ୟ ଏବଂ ସେମାନଙ୍କ ପରିବାର ପ୍ରତି ମୋର ସମବେଦନା ଜଣାଉଛି । ଆହତମାନଙ୍କ ଆଶୁ ଆରୋଗ୍ୟ ପାଇଁ ମୁଁ ଜଗନ୍ନାଥଙ୍କ ନିକଟରେ ପ୍ରାର୍ଥନା କରୁଛି ।"