କେଉଁଠୁ ନିର୍ବାଚନ ଲଢିବେ ପ୍ରଶାନ୍ତ କିଶୋର? ଦେଇ ଦେଲେ ବଡ଼ ଇସାରା

କନକ ବ୍ୟୁରୋ: ବିହାରରେ ବିଧାନସଭା ନିର୍ବାଚନକୁ ନେଇ ସରଗରମ ପଲିଟିକ୍ସ। ସବୁ ଦଳ ଏବେ ଜୋରସୋରରେ ଭୋଟରଙ୍କୁ ନିଜ ସପକ୍ଷରେ ଆଣିବାକୁ ଚେଷ୍ଟା ଚଳାଇଥିବାବେଳେ, ଏହାରି ଭିତରେ ଜନସୂରାଜ ପାର୍ଟିର ମୁଖ୍ୟ ପ୍ରଶାନ୍ତ କିଶୋର କେଉଁଠୁ ନିର୍ବାଚନ ଲଢିବେ ସେନେଇ ଇସାରା ଦେଇଛନ୍ତି । ସଫା ସଫା ପ୍ରଶାନ୍ତ କିଶୋର କହିଛନ୍ତି, ଯଦି ମୁଖ୍ୟମନ୍ତ୍ରୀ ନୀତିଶ କୁମାର ନିର୍ବାଚନ ଲଢନ୍ତି, ତେବେ ସେ ମଧ୍ୟ ନିର୍ବାଚନ ଲଢିବେ । ତେବେ ନିଜର ଜନ୍ମଭୂମି, ନଚେତ୍ କର୍ମଭୂମିରୁ ନିର୍ବାଚନ ଲଢ଼ିବା ନେଇ କିଞ୍ଚିତ ଇସାରା ଦେଇଛନ୍ତି ପ୍ରଶାନ୍ତ ।

ରାଜନୈତିକ ରଣନୀତିକାର ପ୍ରଶାନ୍ତ କିଶୋର ବିହାର ସମସ୍ତ ୨୪୩ ଆସନରେ ନିର୍ବାଚନ ଲଢ଼ିବାକୁ ଘୋଷଣା କରିଛନ୍ତି । ହେଲେ ସେ ନିଜେ କିନ୍ତୁ କେଉଁ ଆସନରୁ ଲଢିବେ, ସେ ନେଇ କୌଣସି ବି ଘୋଷଣା କରିନାହାଁନ୍ତି । ଅନେକ ସମୟରେ ଚର୍ଚ୍ଚା ହେଉଛି ଯେ, ପ୍ରଶାନ୍ତ କିଶୋର କେଉଁ ଆସନରୁ ନିର୍ବାଚନ ଲଢିବେ ନା ବିଲକୁଲ୍ ନିର୍ବାଚନ ଲଢ଼ିବେନି?

ତେବେ ଏନେଇ ଯେତେବେଳେ ତାଙ୍କୁ ପ୍ରଶ୍ନ କରାଯାଇଥିଲା, ସେତେବେଳେ ସେ ନୀତିଶ କୁମାରଙ୍କ କୋର୍ଟଙ୍କୁ ବଲ୍ ଫିଙ୍ଗିଥିଲେ । ଯଦି ମୁଖ୍ୟମନ୍ତ୍ରୀ ନୀତିଶ କୁମାର ନିର୍ବାଚନ ଲଢନ୍ତି, ତେବେ ସେ ମଧ୍ୟ ନିର୍ବାଚନ ଲଢିବେ ବୋଲି କହିଥିଲେ ପ୍ରଶାନ୍ତ । ଯାହା ପରେ ଏହି କଥାକୁ ନେଇ ଏବେ ଚିନ୍ତା ବଢିଛି ।