ସ୍ୱାସ୍ଥ୍ୟକେନ୍ଦ୍ରର ହାଲ ବେହାଲ: ଚାରିଆଡ଼େ ପଡ଼ିଛି କୁଢ଼କୁଢ଼ ଅଳିଆ, ରୋଗୀଙ୍କ କାମରେ ଆସୁନି ୧୪ ଲକ୍ଷର କ୍ୟାବିନ୍

କନକ ବ୍ୟୁରୋ: କାମାକ୍ଷାନଗର ଉପଖଣ୍ଡ ସ୍ୱାସ୍ଥ୍ୟକେନ୍ଦ୍ରର ସ୍ୱାସ୍ଥ୍ୟ ଖରାପ। ପରିତ୍ୟକ୍ତ ଅବସ୍ଥାରେ ପଡିରହିଛି ଡାକ୍ତରଖାନା କ୍ୟାବିନ। ଚାରିଆଡ଼େ କୁଢ଼କୁଢ଼ ଅଳିଆ। ୨୦୦୬ରେ ଦ୍ୱାଦଶ ଅର୍ଥ କମିଶନ ଜରିଆରେ ୧୪ ଲକ୍ଷରେ ୬ଟି କ୍ୟାବିନ ନିର୍ମାଣ ହୋଇଛି। ଏବେ କ୍ୟାବିନ ଗୁଡ଼ିକରେ ତାଲା ପଡ଼ିଛି । ପାରିପାର୍ଶ୍ବିକ ସ୍ଥିତି କହିଲେ ନସରେ। ଘର ଚାରିପଟେ ଅସ୍ୱାସ୍ଥ୍ୟକର ପରିବେଶ। ଏସି ଓ ଅନ୍ୟାନ୍ୟ ସୁବିଧା ସବୁ ଜରାଜୀର୍ଣ୍ଣ ।

ଡାକ୍ତରଖାନା ଅଳିଆ ଗଦା ପାଲଟିଛି। ପ୍ଲାଷ୍ଟିକ୍ ଏବଂ ଅନାବନା ସାମଗ୍ରୀ ପଡ଼ି ରହିଛି। ସେଗୁଡିକ ଗାଈଗୋରୁ ଖାଉଥିବା ଦେଖିବାକୁ ମିଳିଛି। ରୋଗୀ ଓ ରୋଗୀ ସଂପର୍କୀୟଙ୍କ ପାଇଁ ତିଆରି ହୋଇଥିବା କ୍ୟାବିନ୍ କାମରେ ଆସୁନାହିଁ। ସରକାରୀ ଅର୍ଥ ଅଯଥାରେ ନଷ୍ଟ ହେଉଥିବା ଅଭିଯୋଗ ହୋଇଛି। ସେପଟେ ଜିଲ୍ଲାପାଳ ଓ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ ସହ ଆଲୋଚନା କରି ଏହାକୁ ପୁନଃକାର୍ୟ୍ୟକ୍ଷମ କରାଯିବ ବୋଲି କାମାକ୍ଷାନଗର ଉପଜିଲ୍ଲାପାଳ କହିଛନ୍ତି ।

ତୁରନ୍ତ ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗ କାମାକ୍ଷାନଗର ଉପଖଣ୍ଡ ସ୍ୱାସ୍ଥ୍ୟକେନ୍ଦ୍ରର ଅବସ୍ଥାରେ ସୁଧାର ଆଣିବା ପାଇଁ ଦାବି କରିଛନ୍ତି ସ୍ଥାନୀୟ ଜନତା।