ସହର ସାରା ପଲିଥିନ୍ ପାହାଡ଼ ; ବ୍ୟାନ୍‌ ସତ୍ତ୍ବେ ଆସୁଛି କୁଆଡ଼ୁ ?

କନକ ବ୍ୟୁରୋ :  ବିଷ ବଳୟରେ ବ୍ରହ୍ମପୁର, ସହର ସାରା ପଲିଥିନର ପାହାଡ଼ । କେଉଁଠୁ ଆସୁଛି ଏତେ ପରିମାଣର ସିଙ୍ଗଲ ୟୁଜ୍ ପ୍ଲାଷ୍ଟିକ୍ , କାହା ପାଖେ ନାହିଁ ଉତ୍ତର । ଲୋକେ ବି ସଚେତନ ହେବା ପରିବର୍ତ୍ତେ ପଲିଥିନ୍ ବ୍ୟବହାର କରିଚାଲିଛନ୍ତି । ଯାହା ଖାଲି ପରିବେଶ ପ୍ରଦୂଷିତ କରୁନି ବରଂ ସାଧାରଣ ଜୀବନଶୈଳୀକୁ ବି ପ୍ରଭାବିତ କରୁଛି । ସକାଳ ଜଳଖିଆ ହେଉ କି ପନିପରିବା, ସଉଦା ଠୁ ନେଇ ଫୁଲ ଦୋକାନ ଯାଏଁ , ଯାହା କିଣିଲେ ଦରକାର ପଡୁଛି ପଲିଥିନ୍‌ । ଆଉ ପଲିଥିନ୍ ବ୍ୟବହାର ପରେ ତାର ଅସଲ ସ୍ଥିତି କିଛି ଅଲଗା  । ରାସ୍ତାଘାଟ, ନାଳ ନର୍ଦ୍ଦମା, ସହର ସାରା ଯୁଆଡ଼େ ଚାହିଁବ ପଲିଥିନର ପାହାଡ଼ । ପ୍ରତିଦିନ ସଫେଇ ହେଉଛି, ତଥାପି ପରଦିନକୁ ଗଦା ହୋଇଯାଉଛି କୁଢ଼ କୁଢ଼ ଅଦରକାରୀ ପ୍ଲାଷ୍ଟିକ୍ ସାମଗ୍ରୀ ।

୨୦୧୬ ସେପ୍ଟେମ୍ବରରେ ବ୍ରହ୍ମପୁର ମହାନଗର ନିଗମ ପକ୍ଷରୁ ପଲିଥିନ ବ୍ୟାନ୍‌ ନେଇ କାଉନସିଲ ବୈଠକରେ ପ୍ରସ୍ତାବ ପାରିତ ହୋଇଥିଲା । ପରେ ୨୦୧୭ ପହିଲାରୁ ସାରା ଗଞ୍ଜାମ ଜିଲ୍ଲାରେ ପଲିଥିନ୍‌ ବ୍ୟବହାର ଉପରେ କଟକଣା ଲଗାଇଥିଲା ପ୍ରଶାସନ । ହେଲେ ଅଧିକାରୀ ବଦଳିବା ପରେ ନିୟମ ବଦଳିବା ଭଳି, କେହି ଆଉ ଏଥିପ୍ରତି ନଜର ଦେଉନାହାନ୍ତି । ମଝିରେ ମଝିରେ ଚଢ଼ାଉ ହେଉଥିଲେ ବି ଫଳ ଶୂନ ।