ସଚେତନତା ବାଣ୍ଟୁଛି ଯିଏ, ପରିବେଶ ପ୍ରଦୂଷଣ କରୁଛି ସିଏ । ଜୟପୁର ପୌର ପରିଷଦ ବିରୋଧରେ ସାଙ୍ଘିତିକ ଅଭିଯୋଗ

କନକ ବ୍ୟୁରୋ : ଦୀପତଳ ଅନ୍ଧାର ଭଳି ଜୟପୁର ପୌରପାଳିକା । ସହର ସଫା ରଖିବା ପାଇଁ ସଚେତନ ବାଢୁଛି। ଅନ୍ୟପଟେ ରାସ୍ତା କଡ଼ରେ ଅଳିଆ ଅବର୍ଜନା ଗଦା କରି କୃତ୍ରିମ ପାହାଡ଼ ସୃଷ୍ଟି କରୁଛି । ଦିନେ କି ଦୁଇ ଦିନ ନୁହେଁ ବର୍ଷବର୍ଷ ଧରି ଜୟପୁର ପୌରପାଳିକା ଦାୟିତ୍ୱ ହିନତା ସମସ୍ତଙ୍କ ପାଇଁ ମୁଣ୍ଡ ବ୍ୟଥାର କାରଣ ହୋଇଛି ।

ଚାରିପଟେ ଘର, ସରକାରୀ ବିଦ୍ୟାଳୟ । ମଝିରେ ଆବର୍ଜନା ପାହାଡ଼ । ସରକାରୀ ଆବାସିକ ବିଦ୍ୟାଳୟରେ ୨ଶହ ଛାତ୍ରଛାତ୍ରୀ ରହୁଛନ୍ତି । ସ୍ଥାନ ଅନୁକୁଳ ନଥିଲେ ମଧ୍ୟ ଛାତ୍ରଛାତ୍ରୀ ବାଧ୍ୟରେ ରହୁଛନ୍ତି । ଏଭଳି ସ୍ଥାନରେ ବର୍ଷବର୍ଷ ଧରି ଗଦା ହେଉଛି ଆବର୍ଜନା । ଦୁର୍ଗନ୍ଧରେ ନାକ ଫାଟି ପଡୁଛି । ପିଲାଙ୍କ ଖାଇବା ଥାଳିରେ ମାଛି ଭଣଭଣ ହେଉଛନ୍ତି । ସବୁ ସମସ୍ୟା ସମ୍ପର୍କରେ ଅବଗତ କରାଇବା ପରେ ମଧ୍ୟ କୌଣସି କାର୍ଯ୍ୟନଷ୍ଠାନ ହେଉନଥିବା ସ୍କୁଲ କର୍ତ୍ତୃପକ୍ଷ କହିଛନ୍ତି ।

ମକାପୁଟରେ ୧୫ ଏକର ପରିଧିରେ ରହିଛି ଆବର୍ଜନା ପାହାଡ଼ । ୩୦ ବର୍ଷରୁ ଅଧିକ ହେଲାଣି ଅନବରତ ଅଳିଆ ପଡୁଛି । ଖୋଲା ମେଲାରେ ପଡ଼ି ରହିଥିବା ଅବର୍ଜନା ପାହାଡ଼ ମଧ୍ୟ ଭାଗରେ ତିଆରି ହେଉଛି ଜୟପୁର ବାଇପାସ । ନା ପାଚେରୀ ନା କୌଣସି ସୁରକ୍ଷା ବ୍ୟବସ୍ଥା । ବର୍ତ୍ତମାନ ତାର ସ୍ଥାୟୀ ସମାଧାନ ପାଇଁ ଜୟପୁର ପୌରପାଳିକା ଚିନ୍ତା କରିଛି । ଅଳିଆ ଆବର୍ଜନାରୁ ଖତ ତିଆରି ପାଇଁ ପ୍ରସ୍ତୁତି ଚାଲିଛି । କିନ୍ତୁ ବର୍ତ୍ତମାନର ସ୍ଥିତି ଦେଖି ସ୍ଥାନୀୟ ବାସିନ୍ଦା କହୁଛନ୍ତି, ପୌରପାଳିକା ସମସ୍ତଙ୍କୁ ସଫା ରହିବାକୁ କହୁଛି କିନ୍ତୁ ନିଜେ ଦୁର୍ଗନ୍ଧ କରୁଛି ।

ପରିବେଶ ସଫା ସୁତରା ରଖିବା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି କିନ୍ତୁ ଏଠାରେ ସଚେତନା ବାର୍ତା ବାଂଟୁଥିବା ଅନୁଷ୍ଠାନ ନିଜେ ପ୍ରଦୁଷଣ ବଢ଼ାଉଛି । ଲାଗୁଛି ସେମିତି ଫସଲ ଜଗୁଥିବା ବାଡ଼ ନିଜେ ଫସଲ ନଷ୍ଟ କରୁଛି ।