ରାଜ୍ୟସଭାରେ ପ୍ରଧାନମନ୍ତ୍ରୀଙ୍କୁ ଟିଏମସି ସାଂସଦଙ୍କ କଟାକ୍ଷ । କହିଲେ ରକ୍ତରେ ସିନ୍ଦୂର ନୁହେଁ ବହୁଛି ରାଜନୀତି

କନକ ବ୍ୟୁରୋ : ଅପରେସନ ସିନ୍ଦୂରକୁ ନେଇ ରାଜ୍ୟସଭାରେ ବି ଜୋରଦାର ଚର୍ଚ୍ଚା ହୋଇଛି । ମଙ୍ଗଳବାର ଦିନ ରାଜ୍ୟସଭାରେ ଏହି ଆଲୋଚନା ଚାଲିଥିବା ବେଳେ ଟିଏମସି ସାଂସଦ ସାଗରିକା ଘୋଷ କେନ୍ଦ୍ର ସରକାର ଓ ପ୍ରଧାନମନ୍ତ୍ରୀଙ୍କୁ କଟାକ୍ଷ କରିଛନ୍ତି । ସେ କହିଛନ୍ତି କି, ପ୍ରଧାନମନ୍ତ୍ରୀଙ୍କ ଧମନୀରେ ନା ରକ୍ତ ବହୁଛି ନା ସିନ୍ଦୂର, କେବଳ ରାଜନୀତି ଅନବରତ ବହି ଚାଲିଛି । ଯଦି ପ୍ରଧାନମନ୍ତ୍ରୀଙ୍କ ଧମନୀରେ ସିନ୍ଦୂର ବହୁଥାନ୍ତା  ତେବେ ପହଲଗାମ ଭଳି ଘଟଣା ଘଟିନଥାନ୍ତା ।

ସାଗରିକା ଘୋଷ ପ୍ରଶ୍ନ ଉଠାଇ କହିଥିଷଲ କି ସୀମା ସୁରକ୍ଷାରେ ତ୍ରୁଟି କାରଣରୁ ଆତଙ୍କବାଦୀ ୨୦୦ କିଲୋମିଟର ପାର କରି ପହଲଗାମରେ ପ୍ରବେଶ କରିବାକୁ ସକ୍ଷମ ହୋଇଥିଲେ । ଏହାକୁ ନେଇ କେହି ଉତ୍ତରଦାୟୀ ହେବାକୁ ରାଜି ହେଉନାହାଁନ୍ତି । ଏହାସହ ସେ କହିଛନ୍ତି ପ୍ରଧାନମନ୍ତ୍ରୀ ବାରମ୍ବାର ବିଦେଶ ଗସ୍ତ କରୁଛନ୍ତି, ହେଲେ ସୀମାରେ ଯେଭଳି ଭାବେ ଆକ୍ରମଣ ହେଲା ଓ ଏଥିରେ ଅନେକ ଲୋକଙ୍କ ମୃତାହତ ହେଲା, ହେଲେ ପ୍ରଧାନମନ୍ତ୍ରୀ ସେମାନଙ୍କ ପରିବାରକୁ ଭେଟିବାକୁ ଗଲେ ନାହିଁ । ଏହାସହ ସେ ଭାରତ-ପାକିସ୍ତାନ କ୍ରିକେଟ ମ୍ୟାଚକୁ ନେଇ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେତେବେଳେ ପ୍ରଧାନମନ୍ତ୍ରୀ କହୁଛନ୍ତି ପାକିସ୍ତାନକୁ ଶିକ୍ଷା ଦିଆଯିବ ପୁଣି କ'ଣ ପାଇଁ ଏସିଆ କପରେ ଭାରତ ପାକିସ୍ତାନ କ୍ରିକେଟ୍ ମ୍ୟାଚ ଖେଳୁଛନ୍ତି । 

ସାଂସଦ ଘୋଷ କହିଛନ୍ତି ସରକାର ସହାନୁଭୁତି ନୁହେଁ ବରଂ ପ୍ରଚାରରେ ବ୍ୟସ୍ତ ଅଛନ୍ତି । ପ୍ରଧାନମନ୍ତ୍ରୀ ସେନା ପୋଷାକରେ ପୋଷ୍ଟର ଛାପୁଛନ୍ତି, ହେଲେ ଯେଉଁଠି ପାକିସ୍ତାନ ଆକ୍ରମଣ କଲା ସେହି ଗାଁର ପୀଡିତ ଲୋକଙ୍କୁ ଭେଟିବାକୁ ଯିବା ତ ଦୂରର କଥା କେନ୍ଦ୍ର ସରକାର କୌଣସି ସହାୟତା ଯୋଗାଉନାହାଁନ୍ତି ।