ପ୍ରଶ୍ନରେ ପୁଲିସର ପାରିବାପଣିଆ : ବାଲେଶ୍ବର , ବଳଙ୍ଗା , ପଟ୍ଟାମୁଣ୍ଡାଇ ଆଉ  ବରଗଡ଼ ..

କନକ ବ୍ୟୁରୋ : ଏଫ୍‌ଏମ୍‌ ଛାତ୍ରୀ ଆତ୍ମଦାହ, ବଳଙ୍ଗା ନାବାଳିକା ଜଳିଯିବା, ପଟ୍ଟାମୁଣ୍ଡାଇ ଛାତ୍ରୀ ପୋଡ଼ି ମରିବା ଘଟଣାକୁ ନେଇ ସାରା ରାଜ୍ୟରେ ଚହଳ ପଡ଼ିଛି । ଏତିକିବେଳେ ବରଗଡ଼ ପଦ୍ମପୁରରେ ଆଉ ଜଣେ ଯୁବତୀ ପୋଡ଼ି ହୋଇ ଆଖି ବୁଝିବା ସମସ୍ତଙ୍କ ସ୍ତବ୍ଧ କରିଦେଇଛି । କିନ୍ତୁ ବିଡ଼ମ୍ବନାର ବିଷୟ ଏଫ୍‌ଏମ୍‌ ଛାତ୍ରୀ ଆତ୍ମଦାହ ମାମଲାକୁ ମାସେ ପୂରିବାକୁ ଯାଉଥିଲେ ବି ପୂରା ରହସ୍ୟ ଉପରୁ ପରଦା ହଟିନି । ବଳଙ୍ଗା ପୀଡ଼ିତାଙ୍କ ମୃତ୍ୟୁ ମାମଲାରେ ସୋସିଆଲ ମିଡିଆରେ ପୋଷ୍ଟ କରି ହାତ ଟେକି ଦେଇଛି ପୁଲିସ। କ୍ରାଇମବ୍ରାଞ୍ଚ ତଦନ୍ତ ବି କେତେବାଟ ଗଲା ତାହା ଜଣାପଡୁନି । ପଟ୍ଟାମୁଣ୍ଡାଇ ଛାତ୍ରୀ ଜଣଙ୍କ ପୁରୁଷ ବନ୍ଧୁଙ୍କ ବ୍ଲାକମେଲରେ ଅସହାୟ ହୋଇ ଆତ୍ମହତ୍ୟା କଲେ ନାଁ ମୃତ୍ୟୁ ପଛରେ ଆଉ କିଛି ରହସ୍ୟ ରହିଛି ନେଇ ସସପେନ୍ସ ଲାଗି ରହିଛି । ପୁଲିସର ଏଭଳି ତଦନ୍ତକୁ ନେଇ ସାଧାରଣରେ ଅସନ୍ତୋଷ ବଢ଼ିବାରେ ଲାଗିଛି । 

ଝିଅ ପୋଡ଼ି ମରିବାରେ ବ୍ରେକ୍ ଲାଗୁନଥିବା ବେଳେ ଜୋର ହୋଇଛି ରାଜନୀତିକ ବୟାନବାଜି । ସରକାରଙ୍କୁ ଘେରିଛନ୍ତି ବିରୋଧୀ । ଜବାବରେ ଆଇନମନ୍ତ୍ରୀ କହିଛନ୍ତି ଏଭଳି ଘଟଣାର କେମିତି ନିରାକରଣ ହେବ ସେଦିଗରେ କାର୍ଯ୍ୟ କରୁଛନ୍ତି ସରକାର। ମହିଳା ନିର୍ଯାତନା ଓ ମୃତ୍ୟୁକୁ ନେଇ ରାଜ୍ୟ ହୁଲସ୍ତୁଲ ହେଉଥିବାବେଳେ ଦାୟିତ୍ବ ଗ୍ରହଣ କରିଛନ୍ତି ରାଜ୍ୟ ମହିଳା କମିଶନ ଅଧ୍ୟକ୍ଷା ସୋଭନା ମହାନ୍ତି । ଦାୟିତ୍ବ ନେବା ପରେ ସେ କହିଛନ୍ତି ବାଲେଶ୍ୱର, ବଳଙ୍ଗା ଓ ପଟ୍ଟାମୁଣ୍ଡାଇ ଘଟଣାରେ ତ୍ୱରିତ ପଦକ୍ଷେପ ନିଆଯାଇଛି । ଆଗକୁ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ । ଗୋଟିଏ ପଟେ ତଦନ୍ତ ନସରିବା ଆଉ ଗୋଟିଏ ପଟେ ପ୍ରତି ସପ୍ତାହରେ ଜଣେ ଜଣେ ଝିଅ ପୋଡ଼ି ହୋଇ ମରିବା ସମସ୍ତଙ୍କୁ ଚିନ୍ତାରେ ପକାଇଛି । ପ୍ରଶ୍ନ ଉଠୁଛି, କେବେ ଝିଅ ଜଳିବାରେ ଲାଗିବ ବ୍ରେକ୍? ଝିଅମାନଙ୍କ ଭରସା ଜିତିବାକୁ ପଦକ୍ଷେପ ନେବେ କି ପରିବାର ଓ ସରକାର?