କନକ ବ୍ୟୁରୋ: ଆନ୍ଧ୍ରରେ ଚାଲିଛି ନିର୍ମାଣ, ଓଡ଼ିଶାରେ ନାରାବାଜି। ପୋଲାଭରମ ପ୍ରକଳ୍ପକୁ ନେଇ ଗୃହକୁ ଅଚଳ କଲେ ବିରୋଧୀ। ହଟ୍ଟଗୋଳ ଓ ନାରାବାଜି ପାଇଁ ଚାଲିପାରିଲାନି ପ୍ରଥମାର୍ଦ୍ଧର ପ୍ରଶ୍ନକାଳ ଓ ଶୂନ୍ୟକାଳ। ତେବେ କଥା ଉଠୁଛି, ଯଦି ପୋଲାଭରମ ବିବାଦରେ ଉଭୟ ଶାସକ ଓ ବିରୋଧୀ ପୂର୍ଣ୍ଣଚ୍ଛେଦ ଟାଣିବାକୁ ଚାହୁଁଛନ୍ତି, ତେବେ ଏକାଠି ଆଲୋଚନା କରିବାରେ ଅସୁବିଧା କେଉଁଠି?

  • ବିଧାନସଭାରେ ପୋଲାଭରମ ତାତି
  • ବଡଭାଇ ଭୂମିକାରେ କଂଗ୍ରେସ, ଲାଉ ହେଲା ବିଜେଡି 
Advertisment

ପୋଲାଭରମକୁ ନେଇ ବିଧାନସଭା ହୁଲୁସ୍ତୁଲୁ। ବିରୋଧୀଙ୍କ ହୋହଲ୍ଲା-ନାରାବାଜିରେ କମ୍ପିଲା ଗୃହ। ପୋଲାଭରମ ପ୍ରସଙ୍ଗରେ ପ୍ରଥମରୁ ବିରୋଧ ପାଇଁ ଜୁ ଜୁଟାଇ ପାରୁନଥିଲା ବିଜେଡି। କଂଗ୍ରେସ ଗୃହର ମଧ୍ୟଭାଗକୁ ଆସି ହଟ୍ଟଗୋଳ କରିବା ପରେ ପିଠିରେ ଲାଉ ହେବାକୁ ଧାଇଁ ଆସିଥିଲା ବିଜେଡି। ଜୋରଦାର ହଟ୍ଟଗୋଳ ଭିତରେ ସ୍ବାଭାବିକ ହୋଇପାରିଲାନି ଗୃହ,  ଧୋଇଗଲା ପ୍ରଥମାର୍ଦ୍ଧ। ଅଦାଲତରେ ଏହି ପ୍ରସଙ୍ଗ ବିଚାରଧୀନ ଥିବାରୁ କଂଗ୍ରେସର ମୁଲତବୀ ପ୍ରସ୍ତାବ ଅଗ୍ରାହ୍ୟ ପରେ ଗୃହରେ ଏଭଳି ସ୍ଥିତି ଦେଖିବାକୁ ମିଳିଛି।

ତେବେ ଗୃହ ଭିତରର ପୋଲାଭରମ ତାତି ବିଧାନସଭା ବାହାରେ ମଧ୍ୟ ଦେଖିବାକୁ ମିଳିଛି। ବିରୋଧୀ ଦଳ ନେତା ନବୀନ ପଟ୍ଟନାୟକ କହିଛନ୍ତି, ଓଡ଼ିଶାର ସ୍ବାର୍ଥ ପାଇଁ ବିଜେଡି ଲଢୁଥିଲା ଆଗକୁ ମଧ୍ୟ ଲଢିବ। ଆଉ ଏହାକୁ କାଉଣ୍ଟର କରି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି, ୨୪ ବର୍ଷ ହେବ କରୁଥିଲ କଣ? ପୁରୁଣା ଇତିହାସ ଖୋଲିଲେ କିଛି ଲୋକ ରାଜନୀତିରୁ ସନ୍ୟାସ ନେଇଯିବେ।

ପୋଲାଭରମ ପ୍ରକଳ୍ପକୁ ଜାତୀୟ ପ୍ରକଳ୍ପ ଘୋଷଣା ପରେ ଏହାର ନିର୍ମାଣ କାର୍ଯ୍ୟ ଜୋରସୋରରେ ଆଗେଇ ଚାଲିଛି। ଏହି ପ୍ରକଳ୍ପ ହେଲେ ମାଲକାନଗିରିର ଅନେକ ଗାଁ ଜଳମଗ୍ନ ହେବ ବୋଲି ଅଭିଯୋଗ କରି ଆସୁଛନ୍ତି ବିରୋଧୀ। ପୋଲାଭରମ ପ୍ରକଳ୍ପ ପାଇଁ ଓଡ଼ିଶାର ସ୍ବାଭିମାନ ବାଜିରେ ଲାଗିଛି। କିନ୍ତୁ ଏହାର ସମାଧାନ ହେବା ପରିବର୍ତ୍ତେ କେବଳ ରାଜନୈତିକ ଦଳର ନିର୍ବାଚନୀ ମୁର୍ଦ୍ଦାରେ ଅଟକି ରହିଛି।

ସୂଚନାଯୋଗ୍ୟ ଯେ, ଗୋଟିଏ ପଟେ ଓଡ଼ିଶାରେ ସରକାର ବଦଳିଛି, ଅନ୍ୟପଟେ ଆନ୍ଧ୍ରରେ ପୋଲାଭରମ ପ୍ରକଳ୍ପ ନିର୍ମାଣର ବେଗ ବଢିଛି। ଶାସନରେ ଥିବା ବେଳେ କେବଳ ଚିଠି ଲେଖି ଚୁପ୍ ବସୁଥିବା ବିଜେଡି ଏବେ ଦିଲ୍ଲୀରେ ପୋଲାଭରମ ପ୍ରସଙ୍ଗରେ ସ୍ବର ଶାଣିତ କରିଛି। କିନ୍ତୁ ପ୍ରଶ୍ନ ଉଠୁଛି, ଦୀର୍ଘ ବର୍ଷ ଧରି ସରକାରରେ ଥିବା ବେଳେ କାହିଁକି ଏଭଳି ଆଭିମୁଖ୍ୟ ଦେଖାଇନଥିଲା ବିଜେଡି? ପଲିଟିକାଲ ମାଇଲେଜ ନେବାକୁ ପୋଲାଭରମକୁ ଅସ୍ତ୍ର କରୁଛି କି ଦଳ?