କନକ ବ୍ୟୁରୋ: ଜାପାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଦୁଇଦିନିଆ ଜାପାନ ଗସ୍ତର ପ୍ରଥମ ଦିନରେ ମୋଦୀ ଭାରତ- ଜାପାନ ଅର୍ଥନୈତିକ ଫୋରମକୁ ସମ୍ୱେୋଧନ କରି ଭାରତରେ ପୁଞ୍ଜିନିବେଶ ପାଇଁ ଆମନ୍ତ୍ରଣ କରିଛନ୍ତି । ଭାରତ-ଜାପାନ ବାର୍ଷିକ ସମ୍ମିଳନୀରେ ମଧ୍ୟ ମୋଦୀ ଯୋଗଦେଇଥିଲେ । ଜାପାନରୁ ମୋଦୀ ଦୁଇଦିନିଆ ଚୀନ ଗସ୍ତରେ ଯିବେ । ଭାରତ ଉପରେ ଆମେରିକା ୫୦ ପ୍ରତିଶତ ଟାରିଫ୍ ଲଗାଇଥିବା ବେଳେ ମୋଦୀଙ୍କ  ଦୁଇଦେଶ ଗସ୍ତ ଉପରେ ବିଶ୍ୱର ନଜର ରହିଛି। 

Advertisment

ଜାପାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭବ୍ୟ ସ୍ୱାଗତ । ଟୋକିଓରେ ପହଞ୍ଚିବା ପରେ ପ୍ରବାସୀ ଭାରତୀୟଙ୍କ ମୋଦୀ-ମୋଦୀ ନାରାରେ କମ୍ପି ଉଠିଥିଲା ପରିବେଶ । ଜାପାନର ନାଗରିକମାନେ ପାରମ୍ପାରିକ ଭାରତୀୟ ବେଶଭୂଷା,  ଗାୟତ୍ରୀ ମନ୍ତ୍ର ଜପ କରି ମୋଦୀଙ୍କୁ ସ୍ୱାଗତ କରିଥିଲେ । ଗାର୍ଡ ଅଫ୍ ଅନର ଦିଆଯିବା ସହ ଜାପାନର ପରାମ୍ପରିକ ଦାରୁମା ପ୍ରତିକୃତି ମୋଦୀଙ୍କୁ ଉପହାର ଦିଆଯାଇଥିଲା।  ପରେପରେ ଚାଲିଥିଲା ମୋଦୀଙ୍କ ମାରାଥନ କାର୍ଯ୍ୟକ୍ରମ । ମୋଦୀ ଭାରତ- ଜାପାନ ଅର୍ଥନୈତିକ ଫୋରମକୁ ସମ୍ୱୋଧନ କରିଥିଲେ। କହିଥିଲେ, ଦ୍ରୁତ ଅର୍ଥନୀତି ଆଡ଼କୁ ଅଗ୍ରସର ହେଉଛି ଭାରତ । ଭାରତରେ ରାଜନୈତିକ ଓ ଅର୍ଥନୈତିକ ସ୍ଥିରତା ଆସିଛି । ଭାରତରେ ଅସୀମ ସୁଯୋଗ ଥିବା ଦର୍ଶାଇ ଶିଳ୍ପ ଓ ବାଣିଜ୍ୟ ବିକାଶ ପାଇଁ ପୁଞ୍ଜିନିବେଶ ଉପରେ ଗୁରୁତ୍ୱାରୋପ କରିଛନ୍ତି ମୋଦୀ ।…

ଜାପାନ ପ୍ରଧାନମନ୍ତ୍ରୀ ଶିଗେରୁ ଇଶିବା ଏବଂ ମୋଦୀଙ୍କ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇଛି। ପଞ୍ଚଦଶ ଭାରତ-ଜାପାନ ବାର୍ଷିକ ସମ୍ମିଳନୀରେ ଯୋଗଦେଇଥିଲେ ମୋଦୀ।  ବିଭିନ୍ନ କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ବୃଦ୍ଧି ଓ ବିଶ୍ୱ ଆହ୍ୱାନର ମିଳିତ ମୁକାବିଲା ପାଇଁ ଦୁଇଦେଶ ରାଜି ହୋଇଛନ୍ତି। ମୋଦୀ ଚଳିତ ଗସ୍ତକାଳରେ ଜାପାନ ଓ ଭାରତ ମଧ୍ୟରେ ବୁହୁ  ବୁଝାମଣାପତ୍ର ସ୍ୱାକ୍ଷର ହେବାର ସମ୍ଭାବନା ଅଛି। …

ଦୁଇଦିନିଆ ଜାପାନ ଗସ୍ତ ପରେ ମୋଦୀ ଅଗଷ୍ଟ ୩୧ରେ ଚୀନ ଯିବେ। ଚୀନରେ ମଧ୍ୟ ଦୁଇଦିନିଆ କାର୍ଯ୍ୟକ୍ରମ ରହିଛି। ସାଂଘାଇ କୋ-ଅପରେସନ ଅର୍ଗାନାଇଜେସନ -ଏସ୍‌ସିଓ ସମ୍ମିଳନୀରେ ସାମିଲ ହେବେ ମୋଦୀ । ଆମେରିକାର ଟାରିଫ୍ ଯୁଦ୍ଧର ମୁକାବିଲା ପାଇଁ ଦୃଢ଼ ରଣନୀତି ସ୍ଥିର କରାଯିବାର ସମ୍ଭାବନା ଅଛି। ପୂର୍ବରୁ ଚୀନ ଏଥିପାଇଁ ସହଯୋଗର ହାତ ବଢ଼ାଇଛି।