‘ଅପରେସନ ସିନ୍ଦୂର’ ଗୋଟିଏ ନାଁ ନୁହେଁ,  ନ୍ୟାୟର ଅଖଣ୍ଡ ପ୍ରତିଜ୍ଞା

କନକ ବ୍ୟୁରୋ: ଅପରେସନ ସିନ୍ଦୂର ପରେ ପ୍ରଥମ ଥର ପାଇଁ ଦେଶବାସୀଙ୍କୁ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପହଲଗାମ କାଣ୍ଡ ପରେ ପ୍ରଥମ ପ୍ରତିକ୍ରିୟା ଦେଇ ପାକିସ୍ତାନକୁ କଡ଼ା ସନ୍ଦେଶ ଦେଇଛନ୍ତି । କହିଛନ୍ତି ଅପରେସନ ସିନ୍ଦୂର କେବଳ ଗୋଟିଏ ନାଁ ନୁହେଁ, ଏହା ନ୍ୟାୟର ଅଖଣ୍ଡ ପ୍ରତିଜ୍ଞା । 

ଦେଶବାସୀଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, “ମୁଁ ପ୍ରଥମେ ସଶସ୍ତ୍ର ବାହିନୀଙ୍କୁ ସାଲ୍ୟୁଟ୍‌ କରୁଛି ବୀର ଯବାନମାନେ ଅପରେସନ ସିନ୍ଦୂର ଲକ୍ଷ୍ୟ ପ୍ରାପ୍ତି ପାଇଁ ଅସୀମ ଶୌର୍ଯ୍ୟ ପ୍ରଦର୍ଶନ କରିଛନ୍ତି । ମୁଁ ସେମାନଙ୍କ ବୀରତା ସାହସକୁ ଦେଶର ପ୍ରତ୍ୟେକ ମାଆ ଓ ଝିଅକୁ ସମର୍ପଣ କରୁଛି । ଏପ୍ରିଲ ୨୨ରେ ପହଲଗାମରେ ଆତଙ୍କୀମାନେ ଯେଉଁ ବର୍ବରତା ଦେଖାଇଥିଲେ, ତାହା ବିଶ୍ୱକୁ ଦୋହଲାଇ ଦେଇଥିଲା । ନିର୍ଦ୍ଦୋଷଙ୍କୁ ଧର୍ମ ପଚାରି ହତ୍ୟା କରିଥିଲେ ଆତଙ୍କୀ । ଏହି ହତ୍ୟାକାଣ୍ଡ ଆତଙ୍କବାଦର ବୀଭତ୍ସ ଚେହେରା ଥିଲା । ଦେଶ ଭାଙ୍ଗିବାକୁ ଚେଷ୍ଟା କରିଥିଲେ ଆତଙ୍କବାଦୀ । ମୋ ପାଇଁ ଏହା ଅତ୍ୟନ୍ତ ପୀଡ଼ାଦାୟକ ଥିଲା । ଏହି ଆତଙ୍କବାଦୀ ଆକ୍ରମଣ ପରେ ସାରା ଦେଶବାସୀ, ପ୍ରତ୍ୟେକ ବର୍ଗ ଓ ରାଜନୈତିକ ଦଳ ଏକସ୍ୱରରେ ଆତଙ୍କବାଦ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଠିଆ ହୋଇଛନ୍ତି । ଆମେ ଆତଙ୍କୀଙ୍କୁ ମାଟିରେ ମିଶାଇବାକୁ ଭାରତୀୟ ସେନାର ହାତ ଖୋଲି ଦେଇଛୁ । ଆଜି ପ୍ରତ୍ୟେକ  ଆତଙ୍କୀ ସଂଗଠନ ଜାଣିଲା, ଆମ ଝିଅଙ୍କ ମଥାରୁ ସିନ୍ଦୂର ପୋଛିବାର ପରିଣାମ କଣ । ‘ଅପରେସନ ସିନ୍ଦୂର’ କେବଳ ଗୋଟିଏ ନାଁ ନୁହେଁ, ଏହା କୋଟିକୋଟି ଦେଶବାସୀଙ୍କ ଭାବନାର ପ୍ରତିବିମ୍ବ । ଏହା ନ୍ୟାୟର ଅଖଣ୍ଡ ପ୍ରତିଜ୍ଞା । ମେ ୬ ତାରିଖ ରାତି ଓ ମେ ୭ ସକାଳୁ ଏହି ପ୍ରତିଜ୍ଞା ପରିମାଣର ରୂପ ନେଉଥିବା ଦେଖିଥିଲା ସାରା ବିଶ୍ୱ । ଯବାନମାନେ ଆତୀଙ୍କ ଟ୍ରେନିଂ ସେଣ୍ଟର ଉପରେ ପ୍ରହାର କରିଥିଲେ । ଭାରତ ଏତେ ବଡ଼ ନିଷ୍ପତ୍ତି ନେଇପାରେ ବୋଲି ଆତଙ୍କୀମାନେ ସ୍ୱପ୍ନରେ ବି ଭାବିନଥିଲେ । କିନ୍ତୁ ଯେତେବେଳେ ରାଷ୍ଟ୍ର ସର୍ବୋପରି ହୋଇଥାଏ, ସେତେବେଳେ ପରିଣାମ ଦେଖାଇବାକୁ ପଡ଼େ ।“ 

ପ୍ରଧାନମନ୍ତ୍ରୀ ଆହୁରି କହିଛନ୍ତି, “ଯେତେବେଳେ ପାକିସ୍ତାନର ଆତଙ୍କୀ ଆଡ୍ଡାରେ ଭାରତର ମିସାଇଲ ଓ ଡ୍ରୋନ୍‌ ହମ୍‌ଲା କରିଥିଲା, ସେତେବେଳେ ସେମାନଙ୍କ ଧୈର୍ଯ୍ୟ ବି ଥରହର ହୋଇ ଉଠିଥିଲା । ବହାବଲପୁର ଓ ମୁରିଦିକେ ଆତଙ୍କୀଙ୍କ ଗ୍ଲୋବାଲ ୟୁନିଭର୍ସିଟି । ଦଶକଦଶକ ଧରି ଆତଙ୍କୀ ସମ୍ପର୍କ ଏହି ଠିକଣା ସହ ଯୋଡ଼ି ହୋଇ ରହିଥିଲା । ଆତଙ୍କୀମାନେ ଆମ ଭଉଣୀମାନଙ୍କ ସିନ୍ଦୂର ଉଜାଡ଼ି ଦେଇଥିଲେ । ଏବେ ୧୦୦ରୁ ଅଧିକ ଆତଙ୍କବାଦୀଙ୍କୁ ମୃତ୍ୟୁ ମିଳିଛି । ଆତଙ୍କୀ ଆକା ଦୁଇ ଦଶକ ହେଲା ଏଠାରେ ଖୁଲମଖୁଲା ବୁଲୁଥିଲେ । ଗୋଟିଏ ଝଟକାରେ ସବୁ ଶେଷ କରିଦେଲେ ଭାରତୀୟ ଯବାନ । ପାକିସ୍ତାନର ଡ୍ରୋନ୍‌ ଓ ମିସାଇଲକୁ ଆକାଶରେ ନଷ୍ଟ କଲା ଭାରତର ଏୟାର ଡିଫେନ୍ସ ସିଷ୍ଟମ । ପାକିସ୍ତାନର ପ୍ରସ୍ତୁତି ସୀମାରେ ଆଟାକ୍‌ କରିବାର ଥିଲା । କିନ୍ତୁ ଭାରତର ମିସାଇଲ ପାକିସ୍ତାନ ଛାତି ଉପରେ ମାଡ଼ କରିଛି । ପାକିସ୍ତାନର ଏୟାରବେସ୍‌ ନଷ୍ଟ କରିଛି ଭାରତ । ଏହା କେବେ ଚିନ୍ତା କରିନଥିଲା ପାକିସ୍ତାନ । ଭାରତର ଆକ୍ରାମକ କାର୍ଯ୍ୟାନୁଷ୍ଠାନ ପରେ ପାକିସ୍ତାନ ବଞ୍ଚିବା ରାସ୍ତା ଖୋଜିବାରେ ଲାଗିଥିଲା । ସାରା ବିଶ୍ୱ ଆଗରେ ନେହୁରା ହେବାରେ ଲାଗିଥିଲା । ମେ ୧୦ରେ ଆମ ଡିଜିଏମ୍‌ଓ ସହ କଥା ହୋଇଥିଲେ ପାକିସ୍ତାନ ଡିଜିଏମ୍‌ଓ । ପାକିସ୍ତାନ ଗୁହାରି କରିଥିଲା ଯେ, ତାଙ୍କ ପଟୁ ଆଗକୁ କୌଣସି ଆତଙ୍କୀ ଗତିବିଧି କିମ୍ବା ସୈନ୍ୟ ଦୁଃସାହାସ କରାଯିବ ନାହିଁ । ଏହାପରେ ଯୁଦ୍ଧ ବିରତି ହୋଇଥିଲା । କିନ୍ତୁ ଏବେ କେବଳ ଅପରେସନ ସିନ୍ଦୂରକୁ ସ୍ଥଗିତ କରାଯାଇଛି ।“

ଆଗାମୀ ଦିନରେ ପାକିସ୍ତାନ ଏଭଳି କୌଣସି କାଣ୍ଡ ଘଟାଇଲେ ପରିଣାମ ଭୋଗିବ । ଭାରତୀୟ ସେନା ଲଗାତାର ଆଲର୍ଟରେ ଅଛନ୍ତି । ସର୍ଜିକାଲ ଷ୍ଟ୍ରାଇକ୍ ଓ ଏୟାର ଷ୍ଟ୍ରାଇକ୍‌ ପରେ ଅପରେସନ ସିନ୍ଦୂର ହିଁ ଭାରତର ନୀତି । ଆତଙ୍କୀଙ୍କ ବିରୋଧରେ ଭାରତ ଏକ ନୂଆ ଲକ୍ଷ୍ମଣ ରେଖା ଟାଣିଛି । ଆତଙ୍କୀ ହମ୍‌ଲା ହେଲେ ମୁହଁତୋଡ଼ ଜବାବ ମିଳିବ । ନିଜ ସର୍ତ୍ତରେ ଜବାବ ଦିଆଯିବ, ଯେଉଁଠି ଆତଙ୍କୀଙ୍କ ଜଡ଼ ରହିଛି ସେଇଠି ଆକ୍ରମଣ ହେବ । ନ୍ୟୁକ୍ଲିୟର ଧମକ ଭାରତ ସହିବନି । ଭାରତ ବି ସଠିକ ଓ ନିର୍ଣ୍ଣାୟକ ପ୍ରହାର କରିବ । ଆତଙ୍କୀ ସରକାର ଓ ଆତଙ୍କୀ ନେତାଙ୍କୁ ଅଲଗା ଅଲଗା ଦେଖାଯିବ ନାହିଁ । ପାକିସ୍ତାନ ଘୃଣ୍ୟ ସତ୍ୟ ସାରା ବିଶ୍ୱ ଦେଖିଛି । ଆତଙ୍କୀଙ୍କ ଶେଷକୃତ୍ୟ ବେଳେ ପାକିସ୍ତାନ ସେନା ଅଫିସର ଯୋଗ ଦେଇଥିଲେ । ପାହାଡ଼ ଉପରେ ପରାକ୍ରମ ଦେଖାଇଛନ୍ତି ଆମ ଯବାନ । ଏହି ଅପରେସନ ପରେ ଆମର ମେଡ୍ ଇନ୍‌ ଇଣ୍ଡିଆ ଅସ୍ତ୍ରର ପରାକ୍ରମ ଦେଖିଲା ସାରା ବିଶ୍ୱ । ସବୁ ପ୍ରକାର ଆତଙ୍କବାଦୀ କାର୍ଯ୍ୟାକଳାପ ବିରୋଧରେ ଆମର ଏକତା ହେବା ହିଁ ଆମର ଶକ୍ତି ।  

ଏହି ଯୁଗ ଯୁଦ୍ଧର ନୁହେଁ, ହେଲେ ଏହି ଯୁଗ ଆତଙ୍କବାଦର ବି ନୁହେଁ । ଆତଙ୍କୀ ବିରୋଧରେ ଜିରୋ ଟଲେରାନ୍ସ ନୀତି ରହିବ । ପାକିସ୍ତାନକୁ ବଞ୍ଚିବାକୁ ହେଲେ, ନିଜ ଆତଙ୍କୀ ଭିତ୍ତିଭୂମି ହଟାଇବାକୁ ହେବ । ଟେରର୍‌ ଓ ଟକ୍‌ ଏକା ସାଥିରେ ହୋଇପାରିବନି । ଟେରର୍‌ ଓ ବ୍ୟବସାୟ ହୋଇପାରିବନି । ପାଣି ଓ ରକ୍ତ ବି ଏକା ସାଥିରେ ବହିପାରିବ ନାହିଁ । ମୁଁ ଆଜି ବିଶ୍ୱ ସମୁଦାୟକୁ ବି କହୁଛି, ପାକିସ୍ତାନ ସହ ଆଲୋଚନା ହେଲେ ଆତଙ୍କୀ ଉପରେ ହିଁ ହେବ । ପାକ୍‌ ଅଧିକୃତ କାଶ୍ମୀର ଉପରେ ହିଁ ଆଲୋଚନା ହେବ । 

ଶାନ୍ତିର ମାର୍ଗ ବି ଶକ୍ତିରୁ ଆରମ୍ଭ ହୁଏ । ପ୍ରତିଟି ଭାରତୀୟ ଶାନ୍ତିରେ ବଞ୍ଚିବେ, ବିକଶିତ ଭାରତ ପାଇଁ ଏହି ଶକ୍ତିର ଆବଶ୍ୟକତା ରହିଛି । ବିଗତ ଦିନରେ ଭାରତ ତାହା ହିଁ କରିଛି । ଭାରତୀୟ ସେନାକୁ ସାଲ୍ୟୁଟ୍ କରୁଛି ଦେଶ । ପ୍ରତ୍ୟେକ ଭାରତବାସୀଙ୍କ ସଂକଳ୍ପକୁ ମୁଁ ପ୍ରଣାମ କରୁଛି ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।