ସୁରକ୍ଷିତ ଓ ସମୃଦ୍ଧ ଭାରତ ପାଇଁ ବିଶାଳ ଯୋଜନା, ପରମାଣୁ ଶକ୍ତି କ୍ଷମତାରେ ୧୦ ଗୁଣା ଆଗକୁ ବଢ଼ିବ ଭାରତ

କନକ ବ୍ୟୁରୋ : ସାରା ବିଶ୍ବ ଏବେ ଯୁଦ୍ଧ ମୁହାଁ । ଋଷ ସହ ୟୁକ୍ରେନର ଯୁଦ୍ଧ, ଇସ୍ରାଏଲ ସହ ଇରାନର ଯୁଦ୍ଧ ଓ କେବେ କେବେ ଭାରତ ସହ ପାକିସ୍ତାନର ଯୁଦ୍ଧ । ହେଲେ ଯୁଦ୍ଧର ତରିକା ବଦଳିଥିବାରୁ ଏବେ ଯୁଦ୍ଧରେ ପରମାଣୁ ଅସ୍ତ୍ରଶସ୍ତ୍ର ବ୍ୟବହାର କରିବା ନେଇ ଦେଶ ଦେଶ ମଧ୍ୟରେ ଧମକ ଚମକ ଦେବା ନେବା ଚାଲିଛି । ତେଣୁ ପ୍ରତିଟି ଦେଶ ଏବେ କିଭଳି ପରମାଣୁ ଶକ୍ତିରେ ଶକ୍ତିଶାଳୀ ହେବେ ତାହାକୁ ନେଇ ବିଚାର ବିମର୍ଷ କରୁଛନ୍ତି । ଏହାରି ଭିତରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଭାରତକୁ ଆହୁରି ପରମାଣୁ ଶକ୍ତିରେ ଶକ୍ତିଶାଳୀ କରିବାକୁ ବିଚାର କରୁଛନ୍ତି । ଏନେଇ ସ୍ବାଧୀନତା ଦିବସ ଅବସରରେ ସେ ଲାଲକିଲ୍ଲାରେ ଭାଷଣ ଦେବା ଅବସରରେ କହିଛନ୍ତି କି, ଆଗାମୀ ଦିନରେ ଭାରତ ପରମାଣୁ ଶକ୍ତିରେ ଆହୁରି ୧୦ ଗୁଣା ଶକ୍ତିଶାଳୀ ହେବାକୁ ଯାଉଛି । 

ଲାଲକିଲ୍ଲା ପ୍ରାଚୀରରୁ ସେ ନାଁ ନନେଇ ପାକିସ୍ତାନକୁ ସମାଲୋଚନା କରିଥିଲେ । ଅପରେସନ୍ ସିନ୍ଦୂରକୁ ନେଇ ସେ କହିଥିଲେ କି ଆତଙ୍କବାଦକୁ ପ୍ରୋତ୍ସାହନ ଦେଉଥିବା ଦେଶକୁ ଭାରତର ବୀର ଯବାନ ଆଶା ଠାରୁ ଅଧିକ ଦଣ୍ଡରେ ଦଣ୍ଡିତ କରିଛନ୍ତି । ଏହାସହ ବିଶ୍ବ ରାଜନୀତିକୁ ନେଇ ମୋଦୀ କହିଛନ୍ତି ଏବେ ରାଜନୀତିର ରୂପରେଖ ବଦଳୁଛି । ତେଣୁ ଆତ୍ମନିର୍ଭରଶୀଳ ହେବାକୁ ଆମକୁ ସଚେତନ ଓ ପ୍ରତିଶ୍ରୁତିବଦ୍ଧ ହେବାକୁ ପଡ଼ିବ । ଭାରତ ଏବେ ଆଣବିକ ଶକ୍ତି ଉପରେ ଅଧିକ ଧ୍ୟାନ କେନ୍ଦ୍ରିତ କରୁଛି । ଏବେ ଭାରତ ୧୦ଟି ନୂତନ ପରମାଣୁ ରିଆକ୍ଟର କାର୍ଯ୍ୟକ୍ଷମ କରିଛି । ଆମେ ସ୍ବାଧୀନତାର ୧୦୦ ତମ ବର୍ଷ ପାଳନ କରିବା ବେଳକୁ ପରମାଣୁ ଶକ୍ତି କ୍ଷମତାକୁ ଆହୁରି ୧୦ ଗୁଣା ବୃଦ୍ଧି କରିବାକୁ ଲକ୍ଷ୍ୟ ରଖିଛୁ  ।  

ଶତ୍ରୁ ଦେଶ ଉଦ୍ଦେଶ୍ୟରେ ପ୍ରଧାନମନ୍ତ୍ରୀ କହିଛନ୍ତି କି, ସେମାନେ ମେକ୍ ଇନ୍ ଇଣ୍ଡିଆର ସାମର୍ଥ୍ୟ ବାବଦରେ ଜାଣିନଥିଲେ । ଏହାସହ ଭାରତ ଏବେ ସ୍ବଦେଶୀ ବହୁସ୍ତରୀୟ ବାୟୁ ପ୍ରତିରକ୍ଷା ଢାଲ ନିର୍ମାଣ କରିବାକୁ ଲକ୍ଷ୍ୟ ରଖିଥିବା ପ୍ରଧାନମନ୍ତ୍ରୀ କହିଛନ୍ତି ।

କେବଳ ସେତିକି ନୁହେଁ ଗଗନଯାନ ଅଭିଯାନରେ ଭାରତ ସକ୍ରିୟ ଭାବେ କାର୍ଯ୍ୟ କରୁଛି ଓ ନିଜର ମହାକାଶ ଷ୍ଟେସନ ପାଇଁ ମଧ୍ୟ ଯୋଜନା କରାଯାଉଛି । ଅନୁପ୍ରବେଶ ସମ୍ପର୍କରେ ଚେତାବନୀ ଦେଇ ପ୍ରଧାନମନ୍ତ୍ରୀ କହିଛନ୍ତି ଅନୁପ୍ରବେଶକାରୀମାନେ ଆମ ଦେଶର ଯୁବପିଢ଼ିଙ୍କ ରୋଜଗାର ଛଡ଼ାଇନେଇଛନ୍ତି । ସେମାନେ ନିରିହ ଆଦିବାସୀମାନଙ୍କୁ ବୋକା ବନାଇ ସେମାନଙ୍କର ଜଙ୍ଗଲ ଜମି ଛଡ଼ାଇ ନେଉଛନ୍ତି । ଏହାକୁ ବରଦାସ୍ତ କରାଯିବନି ।