ଚୋଳ ସମ୍ରାଟଙ୍କ ଜୟନ୍ତୀରେ ପ୍ରଧାନମନ୍ତ୍ରୀ ମୋଦୀ ; କହିଲେ , 'ଓଁ ନମଃ ଶିବାୟ' ଶୁଣିଲେ ଲୋମ ଟାଙ୍କୁରି ଉଠେ

କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତାମିଲନାଡୁର ଗଙ୍ଗଇକୋଣ୍ଡା ଚୋଳପୁରମ୍ ଠାରେ ମହାନ ଚୋଳ ସମ୍ରାଟ ରାଜେନ୍ଦ୍ର ଚୋଳ ପ୍ରଥମଙ୍କ ୧୦୫୦ତମ ସ୍ୱାତୀ ଜୟନ୍ତିରେ ଯୋଗ ଦେଇଥିଲେ । ମୋଦୀ ସେଠାରେ ଭାରତର ଗୌରବମୟ ଇତିହାସ ଏବଂ ସଂସ୍କୃତିକୁ ମନେ ପକାଇଛନ୍ତି । ପାରମ୍ପରିକ ତାମିଲ ପୋଷାକ 'ଭେସ୍ତି' ପରିଧାନ କରି ପ୍ରଧାନମନ୍ତ୍ରୀ, ଭଗବାନ ଶିବଙ୍କ ପ୍ରତି ନିଜର ଗଭୀର ଆସ୍ଥା ଥିବା କହିବା ସହ ଚୋଳ ସାମ୍ରାଜ୍ୟର ଭୂୟସୀ ପ୍ରଶଂସା କରିଥିଲେ ।

ଉପସ୍ଥିତ ଜନତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, "ଯେତେବେଳେ ମୁଁ 'ଓଁ ନମଃ ଶିବାୟ' ମନ୍ତ୍ର ଶୁଣେ, ମୋର ଲୋମ ଟାଙ୍କୁରି ଉଠେ । ଭଗବାନ ଶିବଙ୍କ ସହିତ ଚୋଳ ସାମ୍ରାଜ୍ୟର ସମ୍ପର୍କ ଅତ୍ୟନ୍ତ ନିବିଡ଼ । ରାଜେନ୍ଦ୍ର ଚୋଳ କେବଳ ଜଣେ ମହାନ ଯୋଦ୍ଧା ନଥିଲେ ବରଂ ସେ କଳା, ସ୍ଥାପତ୍ୟ ଏବଂ ସଂସ୍କୃତିର ମଧ୍ୟ ଜଣେ ବଡ଼ ସଂରକ୍ଷକ ଥିଲେ ।"

ପ୍ରଧାନମନ୍ତ୍ରୀ ମୋଦୀ ଚୋଳ ଶାସକମାନଙ୍କର ପ୍ରଶାସନିକ ଦକ୍ଷତା ଏବଂ ସାମୁଦ୍ରିକ ଶକ୍ତିକୁ ବିଶେଷ ଭାବରେ ଉଲ୍ଲେଖ କରିଥିଲେ । ସେ କହିଥିଲେ, "ଚୋଳମାନଙ୍କ ପାଖରେ ସେହି ସମୟର ସବୁଠାରୁ ଶକ୍ତିଶାଳୀ ନୌସେନା ଥିଲା, ଯାହା ସାହାଯ୍ୟରେ ସେମାନେ ନିଜ ସାମ୍ରାଜ୍ୟକୁ ଦକ୍ଷିଣ-ପୂର୍ବ ଏସିଆ ପର୍ଯ୍ୟନ୍ତ ବିସ୍ତାର କରିପାରିଥିଲେ । ସେମାନଙ୍କର ଶାସନ ବ୍ୟବସ୍ଥା, ବିଶେଷକରି ଗ୍ରାମ ସଭା ଏବଂ ନିର୍ବାଚନ ପାଇଁ 'କୁଡାଭୋଲାଇ' ପ୍ରଣାଳୀ, ସେମାନଙ୍କର ଗଣତାନ୍ତ୍ରିକ ମୂଲ୍ୟବୋଧର ପରିଚୟ ଦିଏ ।"

ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରି କହିଥିଲେ ଯେ, ପୂର୍ବରୁ ଆମ ଦେଶର ଏହିପରି ଗୌରବମୟ ଇତିହାସକୁ ପାଠ୍ୟପୁସ୍ତକରେ ଉପଯୁକ୍ତ ସ୍ଥାନ ଦିଆଯାଇ ନଥିଲା ଏବଂ ଯୁବପିଢ଼ିଙ୍କୁ ଏହା ବିଷୟରେ ଜାଣିବାରୁ ବଞ୍ଚିତ କରାଯାଇଥିଲା । ତାଙ୍କ ସରକାର ଦେଶର ପ୍ରକୃତ ଇତିହାସ ଏବଂ ଐତିହ୍ୟକୁ ଲୋକଲୋଚନକୁ ଆଣିବା ପାଇଁ ପ୍ରତିବଦ୍ଧ ବୋଲି ସେ କହିଥିଲେ । ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ବୃହଦୀଶ୍ୱର ମନ୍ଦିରରେ ପୂଜାର୍ଚ୍ଚନା କରିବା ସହ ରାଜେନ୍ଦ୍ର ଚୋଳଙ୍କ ଉପରେ ଏକ ଡାକ ଟିକଟ ଏବଂ ମୁଦ୍ରା ମଧ୍ୟ ଉନ୍ମୋଚନ କରିଛନ୍ତି ।