କନକ ବ୍ୟୁରୋ : ଜାପାନ ଏବଂ ଚୀନ୍ ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ମୋଦୀ । ପ୍ରଥମେ ଜାପାନରେ ପାଦ ପକାଇ ଏବେ ଚୀନରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ମୋଦୀ । ଜାପାନ ଗସ୍ତ ସମୟରେ ମୋଦୀଙ୍କ ସାକ୍ଷାତ ଜାପାନ ପ୍ରଧାନମନ୍ତ୍ରୀ ସିଗେରୁ ଇସିବାଙ୍କ ସହ ହୋଇଥିଲା । ସାକ୍ଷାତ ସମୟରେ ଜାପାନ ପ୍ରଧାନମନ୍ତ୍ରୀ ଏବଂ ତାଙ୍କ ଧର୍ମପତ୍ନୀଙ୍କୁ ଭେଟି କିଛି ଖାସ୍ ଉପହାର ଦେଇଛନ୍ତି ମୋଦୀ । ସିଗେରୁ ଏବଂ ତାଙ୍କ ପତ୍ନୀଙ୍କୁ ପ୍ରଧାନମନ୍ତ୍ରୀ ମୋଦୀ ଦାମୀ ପଥରରେ ତିଆରି ରେମନ୍ ବାଉଲ୍ ଏବଂ ରୁପାରେ ତିଆରି ଚପଷ୍ଟିକ୍ ଉପହାର ଦେଇଛନ୍ତି । ଏହାସହ ଜାପାନର ପ୍ରଧାନମନ୍ତ୍ରୀଙ୍କ ଧର୍ମପତ୍ନୀଙ୍କୁ ମୋଦୀ କାଶ୍ମୀର ପ୍ରସିଦ୍ଧ ପଶ୍ମିନା ସଲ୍ ମଧ୍ୟ ଉପହାର ସ୍ବରୂପ ଦେଇଛନ୍ତି । 

Advertisment

ସୂଚନା ଅନୁସାରେ ପ୍ରଧାନମନ୍ତ୍ରୀ ମୋଦୀ ଯେଉଁ ଉପହାର ଦେଇଛନ୍ତି ତାହା ଭାରତୀୟ କାରିଗର ଏବଂ ଜାପାନ ପରମ୍ପରାର ଏକ ଅନନ୍ୟ ଯୁଗଳବନ୍ଦୀ । ଉପହାରରେ ହାଲକା ମାଟିଆ ରଙ୍ଗର ବଡ଼ ମୁନଷ୍ଟୋନ୍ ବାଉଲ୍ ଏବଂ ୪ ଛୋଟ ଛୋଟ ବାଉଲ୍ ରହିଛି । ଏହାସହ ୨ ଟି ଚାନ୍ଦିର ଚପଷ୍ଟିକ୍ ମଧ୍ୟ ଉପହାର ପେଟିରେ ଦେଇଛନ୍ତି ପ୍ରଧାନମନ୍ତ୍ରୀ । ମୋଦୀଙ୍କ ଏହି ଗିଫ୍ଟ ଜାପାନର ଡୋନବୁରୀ ଏବଂ ସୋବା ପରମ୍ପରାର ନିଆରା ଝଲକକୁ ଦର୍ଶାଏ । ଅନ୍ୟପକ୍ଷରେ ମୁନଷ୍ଟୋନ୍ ପଥର ଆନ୍ଧ୍ରପ୍ରଦେଶରେ ଦେଖିବାକୁ ମିଳେ , ଯାହାକୁ ପ୍ରେମ ଏବଂ ସୁରକ୍ଷାର ପ୍ରତୀକ ବୋଲି କୁହାଯାଏ । ବଡ଼ ବାଉଲଟି ମକରାନର ପଥରରେ ତିଆରି ହୋଇଥିବାବେଳେ ଏଥିରେ ରାଜସ୍ଥାନର ପ୍ରାଚୀନ କୀର୍ତ୍ତିରାଜିର ଶୈଳୀ ଦେଖିବାକୁ ମିଳେ । ପଶ୍ମିନା ସଲ୍ ଯାହାକୁ ଉନି ସଲ୍ ମଧ୍ୟ କୁହାଯାଏ ଏହା ଲଦାଖର ଚାଙ୍ଗଥାଗି ଛେଳୀର ଚୁଟିରେ ତିଆରି କରାଯାଏ । ହାଲୁକା ଓଜନ , ନରମ ଏବଂ ଦେହକୁ ଗରମ ଦେବାରେ ଏହି ସଲ୍ ପ୍ରସିଦ୍ଧ ।