୧୫ତମ ଭାରତ-ଜାପାନ ଶିଖର ସମ୍ମିଳନୀରେ ଟୋକିଓରେ ପହଞ୍ଚିଲେ ପ୍ରଧାନମନ୍ତ୍ରୀ : ଏସସିଓ ବାର୍ଷିକ ଶିଖର ସମ୍ମିଳନୀରେ ହେବେ ସାମିଲ

କନକବ୍ୟୁରୋ : ଜାପାନ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।  ଇଣ୍ଡୋ-ଜାପାନ ଶିଖର ସମ୍ମିଳନୀରେ ଯୋଗଦେବା ପାଇଁ ଟୋକିଓରେ ପହଞ୍ଚିଛନ୍ତି। ବିମାନ ବନ୍ଦରରେ ପ୍ରବାସୀ ଭାରତୀୟ ତାଙ୍କୁ ଭବ୍ୟ ସ୍ବାଗତ ସମ୍ବର୍ଦ୍ଧନା ଦେଇଛନ୍ତି ।  ଆଜି ଓ ଆସନ୍ତାକାଲି ଦୁଇଦିନ ଧରି ଜାପାନରେ ରହିବେ ମୋଦୀ। ଏହାପରେ ଅଗଷ୍ଟ ୩୧ ଓ ସେପ୍ଟେମ୍ବର ୧ ତାରିଖରେ ଚୀନ ଗସ୍ତରେ ଯିବେ ।  ଯେଉଁଠାରେ ତିଆନଜିନ୍ ସହରରେ ହେବାକୁଥିବା ଏସ୍‌ସିଓ ବାର୍ଷିକ ଶିଖର ସମ୍ମିଳନୀରେ ସାମିଲ ହେବେ। ଏହି ଦୁଇଟି ଦେଶ ଗସ୍ତ ପ୍ରଧାନମନ୍ତ୍ରୀଙ୍କ ପାଇଁ ବେଶ୍ ଗୁରୁତ୍ବପୂର୍ଣ୍ଣ । 

ଏହି ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତ ପାଇଁ ଆଗାମୀ ୧୦ ବର୍ଷ ମଧ୍ୟରେ ୧୦ ଟ୍ରିଲିୟନ ୟେନ ଘରୋଇ ନିବେଶ ପାଇଁ ଘୋଷଣା କରିପାରେ। ଜାପାନ ହେଉଛି ମେକ୍ ଇନ୍ ଇଣ୍ଡିଆ ଏବଂ ଆତ୍ମନିର୍ଭର ଭାରତର ବଡ଼ ସମର୍ଥକ ।  ଏବଂ ମାରୁତି ସୁଜୁକି ଏବେ ଭାରତରୁ ଇଲେକ୍ଟ୍ରିକ୍ ଯାନ ରପ୍ତାନୀ ମଧ୍ୟ କରୁଛି। ଅହମ୍ମଦାବାଦ-ମୁମ୍ବାଇ ବୁଲେଟ୍ ଟ୍ରେନ୍ ପ୍ରକଳ୍ପ ଦୁଇ ଦେଶ ମଧ୍ୟରେ ଭାଗିଦାରୀର ଏକ ଉଦାହରଣ ।  ଏହାବ୍ୟତୀତ ଭାରତ ଓ ଜାପାନ ସେମିକଣ୍ଡକ୍ଟର, ବିରଳ ଖଣିଜ ପଦାର୍ଥ ଏବଂ ସ୍ୱଚ୍ଛ ଶକ୍ତି ଯୋଗାଣ ପାଇଁ ଏକ ନୂଆ ଆର୍ଥିକ ସୁରକ୍ଷା ଢାଞ୍ଚା ପ୍ରସ୍ତୁତ କରିବା ପାଇଁ ରାଜି ହୋଇପାରନ୍ତି, ଯାହାଦ୍ୱାରା ଚୀନ ଉପରେ ଭାରତର ନିର୍ଭରଶୀଳତା ହ୍ରାସ ପାଇବ ।