/kanak/media/agency_attachments/2024-07-23t061209958z-vpn68eiq1eknckql8r0y.jpg)
/kanak/media/member_avatars/2025/02/11/2025-02-11t080152817z.jpg)
/kanak/media/media_files/2025/07/29/27-2025-07-29-13-20-15.jpg)
କନକ ବ୍ୟୁରୋ : ଗଞ୍ଜାମ ଜିଲ୍ଲାର ଗୋପାଳପୁର ଏକ ନୂଆ ଶିଳ୍ପାୟନର ଇତିହାସ ଲେଖିବାକୁ ଯାଉଛି । ରାଷ୍ଟ୍ରାୟତ୍ତ କମ୍ପାନି ପେଟ୍ରୋନେଟ୍ ଏଲ୍ଏନ୍ଜି ପକ୍ଷରୁ ଏଠାରେ ଏକ ବିଶାଳ ତରଳୀକୃତ ପ୍ରାକୃତିକ ଗ୍ୟାସ ଟର୍ମିନାଲ୍ ସ୍ଥାପନ ପାଇଁ ରାସ୍ତା ପରିଷ୍କାର ହୋଇଛି । କମ୍ପାନିର ବୋର୍ଡ ଏହି ପ୍ରକଳ୍ପକୁ ଅନୁମୋଦନ ଦେଇଥିବା ବେଳେ ଏଥିରେ ମୋଟ ୬,୩୫୪.୮୦ କୋଟି ଟଙ୍କା ନିବେଶ କରାଯିବ ବୋଲି ଜଣାପଡିଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ଏଲ୍ଏନ୍ଜି ଟର୍ମିନାଲ୍ ପ୍ରକଳ୍ପ ଆସନ୍ତା ତିନି ବର୍ଷ ମଧ୍ୟରେ ସମ୍ପୂର୍ଣ୍ଣ ହେବ ବୋଲି କମ୍ପାନି ପକ୍ଷରୁ କୁହାଯାଇଛି ।
ଗୋପାଳପୁରରେ କମ୍ପାନି ୪ ଏମ୍ଏମ୍ଟିପିଏ କ୍ଷମତାର ଏକ ଭାସମାନ ସଂରକ୍ଷଣ ଓ ରିଗ୍ୟାସିଫିକେସନ୍ ୟୁନିଟ୍ ବସାଇବାକୁ ଚାହୁଥିଲା । ସେଥିପାଇଁ ବୋର୍ଡର ଅନୁମୋଦନ ମଧ୍ୟ ମିଳିଥିଲା । କିନ୍ତୁ ତାହା ସମ୍ଭବ ହେଉନଥିବାରୁ କମ୍ପାନି ୫ ଏମ୍ଏମ୍ଟିପିଏର ଜମି ଭିତ୍ତିକ ଏଲ୍ଏନ୍ଜି ଟର୍ମିନାଲ୍ କରିବାକୁ ଚାହୁଛି । ପରିବର୍ତ୍ତିତ ପ୍ରକଳ୍ପ ଲାଗି ନିବେଶ ରାଶିକୁ କମ୍ପାନି ଉଭୟ ଋଣ ଓ ଇକ୍ବିଟି ଜରିଆରେ ସଂଗ୍ରହ କରିବ । ଚଳିତ ବର୍ଷ ଏପ୍ରିଲ୍ରେ ଦିଲ୍ଲୀରେ ଅନୁଷ୍ଠିତ ନିବେଶକ ସମ୍ମିଳନୀରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ପେଟ୍ରୋନେଟ୍ ଏଲ୍ଏନ୍ଜି ପକ୍ଷରୁ ରାଜ୍ୟ ସରକାରଙ୍କ ସହ ବୁଝାମଣାପତ୍ର (ଏମ୍ଓୟୁ) ସ୍ବାକ୍ଷର କରାଯାଇଛି । ପେଟ୍ରୋନେଟ୍ ଏଲ୍ଏନ୍ଜିର ଏମ୍ଡି ଓ ସିଇଓ ଅକ୍ଷୟ କୁମାର ସିଂହ ଓ ଇପିକଲ୍ ଓ ଇଡ୍କୋ ଏମ୍ଡି ଭୂପେନ୍ଦ୍ର ସିଂହ ପୁନିଆ ବୁଝାମଣାପତ୍ରରେ ସ୍ବାକ୍ଷର କରିଥିଲେ ।
ଦୀର୍ଘଦିନରୁ ପେଟ୍ରୋନେଟ୍ ଏଲ୍ଏନ୍ଜି ଓଡ଼ିଶାରେ ଏକ ଏଲ୍ଏନ୍ଜି ଟର୍ମିନାଲ୍ ନିର୍ମାଣ କରିବାକୁ ଉଦ୍ୟମ କରୁଛି । ଦଶନ୍ଧି ପୂର୍ବେ ଏହା ପାରାଦୀପ, ଗୋପାଳପୁର ଓ ଧାମରା ମଧ୍ୟରୁ ଯେକୌଣସି ଗୋଟିଏ ସ୍ଥାନ ଚୟନ କରିବାକୁ ଚାହୁଥିଲା । ଏହା ତିନି ବନ୍ଦର କର୍ତ୍ତୃପକ୍ଷଙ୍କ ସହ ଆଲୋଚନା ମଧ୍ୟ କରିଥିଲା । ଶେଷରେ ଗୋପାଳପୁରକୁ କମ୍ପାନି ନିଜର ପ୍ରକଳ୍ପ ସ୍ଥାନ ଭାବେ ଚୟନ କରିଥିଲା ।
ଦେଶର ଏଲ୍ଏନ୍ଜି ଆମଦାନି ଆବଶ୍ୟକତା ପୂରଣ କରିବା ଲାଗି ଚାରିଟି ତୈଳ କମ୍ପାନି ଓଏନ୍ଜିସି, ଆଇଓସିଏଲ୍, ଗେଲ୍ ଓ ବିପିସିଏଲ୍ର ମିଳିତ ସହଯୋଗରେ ୧୯୯୮ରେ ପେଟ୍ରୋନେଟ୍ ଏଲ୍ଏନ୍ଜି ସ୍ଥାପନ କରାଯାଇଥିଲା । ଏହାର ଦୁଇଟି ଏଲ୍ଏନ୍ଜି ଟର୍ମିନାଲ୍ ପଶ୍ଚିମ ଭାଗରେ ଗୁଜରାଟର ଦହେଜ ଏବଂ ଦକ୍ଷିଣ ଭାଗରେ କେରଳର କୋଚିରେ ରହିଛି । ଗୋପାଳପୁର ପ୍ରକଳ୍ପ କାର୍ଯ୍ୟକ୍ଷମ ହେବାପରେ କମ୍ପାନି ପୂର୍ବ ଭାରତରେ ଏହାର ଉପସ୍ଥିତି ଜାହିର କରିପାରିବ ।