କନକ ବ୍ୟୁରୋ : ଡାକ୍ତରଙ୍କ ୨ ଘଣ୍ଟା ଓପିଡି ବନ୍ଦ ଯୋଗୁ ହନ୍ତସନ୍ତ ଲୋକେ । ୧୦ ଦଫା ଦାବି ନେଇ ରାଜ୍ୟର ସବୁ ମେଡିକାଲରେ ସକାଳ ୯ରୁ ୧୧ ପର୍ଯ୍ୟନ୍ତ ଓପିଡି ବନ୍ଦ । ରୋଗୀ ସେବା ଗୁରୁତର ପ୍ରଭାବିତ। ପୂର୍ବରୁ ଘଣ୍ଟିକିଆ ବନ୍ଦ ରଖିଥିଲେ ଓପିଡି । ଗତକାଲି ଠୁ ଦୁଇ ଘଣ୍ଟା ଓପିଡି ବନ୍ଦ ନେଇ ଡାକ୍ତର ସଂଘର ନିଷ୍ପତ୍ତି ।  ଡାକ୍ତରଙ୍କ ଦାବି ପୂରଣ ପାଇଁ ସରକାରଙ୍କ ପକ୍ଷରୁ କୌଣସି ନିଷ୍ପତ୍ତି ନିଆଯାଇନାହିଁ । ତେଣୁ ଆନ୍ଦୋଳନ ଅବଧି ବଢ଼ାଇବା ପାଇଁ ଡାକ୍ତର ସଂଘ ବାଧ୍ୟ ହୋଇଥିବା କୁହାଯାଇଛି ।

Advertisment

ସକାକୁ ସକାଳୁ ଦୁର୍ଘଟଣା : ୬ରୁ ଅଧିକ ଆହତ

ଏଥିପାଇଁ ଆସନ୍ତା ୧୪ ତାରିଖ ପର୍ଯ୍ୟନ୍ତ ରାଜ୍ୟର ସମସ୍ତ ଓପିଡିରେ ସକାଳେ ୧ ଘଣ୍ଟା ବଦଳରେ ୨ ଘଣ୍ଟା ରୋଗୀ ଦେଖିବେନି ଡାକ୍ତର । ସକାଳ ୯ଟାରୁ ଦିନ ୧୧ଟା ପର୍ଯ୍ୟନ୍ତ ଓପିଡି ସେବା ବନ୍ଦ ରଖିବାକୁ ନିଷ୍ପତ୍ତି ନେଇଛନ୍ତି ଡାକ୍ତର । ଏହି ସମୟରେ କେବଳ ଜରୁରୀକାଳୀନ ସେବା ଜାରି ରହିବ ।  ଏହାପରେ ଆସନ୍ତା ୨୭ ତାରିଖରୁ ଓପିଡି ସମ୍ପୂର୍ଣ୍ଣ ବନ୍ଦ ରଖିବାକୁ ନିଷ୍ପତ୍ତି ନେଇଛି ଓମ୍‌ସା । ଏହାଛଡ଼ା ୨୬ ତାରିଖରୁ ଏନ୍‌ଏଚ୍‌ଏମ୍ ଯୋଜନାରେ ଅସହଯୋଗ ଜାରି ରହିବ ବୋଲି ଓମ୍‌ସା ପକ୍ଷରୁ କୁହାଯାଇଛି । 

ଓମ୍‌ସାର ୧୦ ମୁଖ୍ୟ ଦାବି
୧.ପଦୋନ୍ନତି: ଅନ୍ୟ ରାଜ୍ୟ ଭଳି ଓଡ଼ିଶାର ଡାକ୍ତରମାନଙ୍କୁ ସମୟାନୁସାରେ ପଦୋନ୍ନତି ପ୍ରଦାନ କରିବା
୨.କାର୍ଯ୍ୟକ୍ଷେତ୍ରରେ ସୁରକ୍ଷା: ସ୍ୱାସ୍ଥ୍ୟକର୍ମୀଙ୍କ ଉପରେ ହେଉଥିବା ଆକ୍ରମଣ ରୋକିବାକୁ କଡ଼ା ନିୟମ ପ୍ରଣୟନ ଏବଂ ସୁରକ୍ଷା ବାହିନୀ ନିୟୋଜନ
୩.ମୂଳ ଦରମା ବୃଦ୍ଧି: ଡାକ୍ତରମାନଙ୍କର ପ୍ରାରମ୍ଭିକ ମୂଳ ଦରମା ଏବଂ ଭତ୍ତାକୁ ସଂଶୋଧନ କରି ଅନ୍ୟାନ୍ୟ କ୍ୟାଡର ସହ ସମାନ କରିବା
୪.ସ୍ୱଚ୍ଛ ବଦଳି ନୀତି: ଡାକ୍ତରଙ୍କ ବଦଳି ପ୍ରକ୍ରିୟାରେ ସ୍ୱଚ୍ଛତା ଆଣିବା ଏବଂ ପତି-ପତ୍ନୀ ଆଧାରରେ ବଦଳିକୁ ଅଧିକ ପ୍ରାଧାନ୍ୟ ଦେବା
୫.ପଦବୀ ପୂରଣ: ରାଜ୍ୟର ବିଭିନ୍ନ ଡାକ୍ତରଖାନାରେ ଖାଲି ପଡ଼ିଥିବା ହଜାର ହଜାର ଡାକ୍ତର ପଦବୀକୁ ତୁରନ୍ତ ପୂରଣ କରିବା
୬.କ୍ୟାଡର ପୁନର୍ଗଠନ: ଓଡ଼ିଶା ମେଡିକାଲ ସେବା (OMS) କ୍ୟାଡରର ପୁନର୍ଗଠନ କରି ପଦୋନ୍ନତିର ସୁଯୋଗ ବୃଦ୍ଧି କରିବା
୭.କର୍ପସ ଫଣ୍ଡ: କାର୍ଯ୍ୟରତ ଡାକ୍ତରଙ୍କ ମୃତ୍ୟୁ ହେଲେ ସେମାନଙ୍କ ପରିବାରକୁ ଆର୍ଥିକ ସହାୟତା ପାଇଁ ଏକ ସ୍ୱତନ୍ତ୍ର ପାଣ୍ଠି ଗଠନ କରିବା
୮.ଏନ୍‌ପିଏ: ଡାକ୍ତରମାନଙ୍କୁ ଦିଆଯାଉଥିବା ‘ଅଣ-ଘରୋଇ ଚିକିତ୍ସା ଭତ୍ତା’କୁ କେନ୍ଦ୍ରୀୟ ହାରରେ ବୃଦ୍ଧି କରିବା
୯.ଉତ୍ତମ ଭିତ୍ତିଭୂମି: ପ୍ରାଥମିକ ଓ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକରେ ଡାକ୍ତରଙ୍କ ରହିବା ପାଇଁ ଉନ୍ନତ ଆବାସିକ ବ୍ୟବସ୍ଥା ଯୋଗାଇବା
୧୦.ଅତିରିକ୍ତ କାର୍ଯ୍ୟଭାର ହ୍ରାସ: ଡାକ୍ତରଙ୍କୁ କେବଳ ଚିକିତ୍ସା କାର୍ଯ୍ୟରେ ନିୟୋଜିତ କରି ସେମାନଙ୍କ ଉପରୁ ଅଣ-ଚିକିତ୍ସା କିମ୍ବା କିରାଣି କାମର ଚାପ କମାଇବା


---