ଟଙ୍କା ଦିଅ ମେମ୍ବର ହୁଅ: ପିସ୍ ବୋର୍ଡ ସଦସ୍ୟ ହେବାକୁ ଭାରତକୁ ଟ୍ରମ୍ପଙ୍କ ନିମନ୍ତ୍ରଣ

କନକବ୍ୟୁରୋ :  ନୋବେଲ ଶାନ୍ତି ପୁରସ୍କାର ପାଇବା ଲାଗି ପାଇଁ ଭିକ ମାଗୁଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗାଜା ପାଇଁ ନୂତନ ଶାନ୍ତି ବୋର୍ଡ ଗଠନ ସମ୍ପର୍କରେ ଘୋଷଣା କରିଛନ୍ତି ।  ବୋର୍ଡରେ ଯୋଗଦେବା ପାଇଁ ଆମେରିକା ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ନିମନ୍ତ୍ରଣ କରିଛି ।  ଭାରତରେ ଅବସ୍ଥାପିତ ଆମେରିକୀୟ ରାଷ୍ଟ୍ରଦୂତ ସର୍ଗିଓ ଗୋର୍‌ଙ୍କ ଅଫିସିଆଲ୍ ସୋସିଆଲ ମିଡିଆ ଏକ୍ସ ହ୍ୟାଣ୍ଡେଲ୍‌ରେ ଏହା ଘୋଷଣା କରାଯାଇଛି ।  ସେ ଲେଖିଛନ୍ତି ରାଷ୍ଟ୍ରପତି ଟ୍ରମ୍ପଙ୍କ ପକ୍ଷରୁ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀଙ୍କୁ ଗାଜା ଶାନ୍ତି ବୋର୍ଡରେ ଅଂଶଗ୍ରହଣ କରିବାକୁ ନିମନ୍ତ୍ରଣ କରିବା ମୋ ପାଇଁ ଏକ ବଡ଼ ସମ୍ମାନର ବିଷୟ । ସ୍ଥାୟୀ ଶାନ୍ତି, ସ୍ଥିରତା ଓ ସମୃଦ୍ଧି ପାଇଁ ବୋର୍ଡ ଗାଜାରେ ଏକ ପ୍ରଭାବଶାଳୀ ପ୍ରଶାସନକୁ ସମର୍ଥନ କରିବ । ପୂର୍ବରୁ, ୨୦୨୫ ଅକ୍ଟୋବରରେ ଇଜିପ୍ଟର ଶାର୍ମ ଏଲ୍-ଶେଖରେ ଗାଜାରେ ଶାନ୍ତି ପାଇଁ ଏକ ଅନ୍ତର୍ଜାତୀୟ ସମ୍ମିଳନୀ ଅନୁଷ୍ଠିତ ହୋଇଥିଲା। ପ୍ରାୟ ୨୦ ଦେଶର ନେତା ଓ ପ୍ରତିନିଧି ଏଥିରେ ଯୋଗ ଦେଇଥିଲେ ।

ଝାଡ଼ଖଣ୍ଡରେ ବଡ଼ ଧରଣର ଷଡ୍‌ଯନ୍ତ୍ର, କୋଡ଼ରମା ମରକଚୋ ଥାନା ବାହାଦୁରପୁର ଗାଁ ନିକଟ ଗୋଦାମରୁ ବିପୁଳ ପରିମାଣର ବିସ୍ଫୋରକ ଲୁଟ୍

ଏହି ସମ୍ମିଳନୀରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ନିମନ୍ତ୍ରଣ କରାଯାଇଥିଲା, ଯଦିଓ ସେ ଯୋଗ ଦେଇ ନଥିଲେ। ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହ ଭାରତକୁ ପ୍ରତିନିଧିତ୍ୱ କରିଥିଲେ। ଆମେରିକା ରାଷ୍ଟ୍ରପତି ଶାନ୍ତି ବୋର୍ଡର ଅଧ୍ୟକ୍ଷତା କରିବେ,ଯାହା ଗାଜାର ଅସ୍ଥାୟୀ ଶାସନ ଏବଂ ପୁନଃନିର୍ମାଣ ତଦାରଖ କରିବା ପାଇଁ ଦାୟିତ୍ୱରେ ଥିବା ବୈଷୟିକ ବିଶେଷଜ୍ଞଙ୍କ ଏକ କମିଟିର କାର୍ଯ୍ୟ ତଦାରଖ କରିବ। ଆମେରିକା ଦାବି କରୁଛି ଯେ, ଏହାର ପିସ୍ ବୋର୍ଡ ଏକ ନୂତନ ଅନ୍ତର୍ଜାତୀୟ ଶାନ୍ତି ସଂଗଠନ ଭାବରେ କାମ କରିବ । ନ୍ୟୁୟର୍କ ଟାଇମ୍ସର ଏକ ରିପୋର୍ଟରେ ଦାବି କରାଯାଇଛି, ଯଦି କୌଣସି ଦେଶ ଏହି ବୋର୍ଡର ସ୍ଥାୟୀ ସଦସ୍ୟତା ପାଇବାକୁ ଚାହାଁନ୍ତି,ତେବେ ତାଙ୍କୁ ବିପୁଳ ପରିମାଣର ଟଙ୍କା ଖର୍ଚ୍ଚ କରିବାକୁ ପଡିବ । 

ବୋର୍ଡ ଗଠନର ପ୍ରାରମ୍ଭିକ ତିନି ବର୍ଷ ପରେ ମଧ୍ୟ, ଯଦି କୌଣସି ଦେଶ ଏଥିରେ ରହିବାକୁ ଚାହାଁନ୍ତି ତେବେ ତାଙ୍କୁ ଏକ ବିଲିୟନ ଡଲାର ଅର୍ଥାତ୍ ପ୍ରାୟ ନଅ ହଜାର କୋଟି ଟଙ୍କା ଖର୍ଚ୍ଚ କରିବାକୁ ପଡିବ। ନ୍ୟୁୟର୍କ ଟାଇମ୍ସ ଅନୁଯାୟୀ, ଏହି ବୋର୍ଡ ଡୋନାଲ୍ଡ ଟ୍ରମ୍ପଙ୍କ ଗାଜା ଶାନ୍ତି ଯୋଜନାର ଏକ ଅଂଶ, କିନ୍ତୁ ବୋର୍ଡର ଚାର୍ଟରରେ ଗାଜା ବିଷୟରେ କୌଣସି ଉଲ୍ଲେଖ ନାହିଁ। ହ୍ୱାଇଟ୍ ହାଉସ୍ କହିଛି, କାର୍ଯ୍ୟନିର୍ବାହୀ ବୋର୍ଡର ପ୍ରତ୍ୟେକ ସଦସ୍ୟ ଏକ ବିଭାଗର ଦାୟିତ୍ୱରେ ରହିବେ ଯାହା ଗାଜାକୁ ସ୍ଥିର କରିବା ପାଇଁ ଗୁରୁତ୍ୱପୂର୍ଣ୍ଣ। ତଥାପି, କେଉଁ ପ୍ରାଥମିକତା ପାଇଁ କିଏ ଦାୟୀ ରହିବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହି ଶୀର୍ଷ ସ୍ତରରେ ଏପର୍ଯ୍ୟନ୍ତ କୌଣସି ମହିଳା କିମ୍ବା ପାଲେଷ୍ଟାଇନଙ୍କ ନାମ ଘୋଷଣା କରାଯାଇ ନାହିଁ। ହ୍ୱାଇଟ୍ ହାଉସ୍ କହିଛି, ଆଗାମୀ ସପ୍ତାହଗୁଡ଼ିକରେ ଅଧିକ ସଦସ୍ୟଙ୍କ ନାମ ଘୋଷଣା କରାଯିବ ।