ଲାଲୁ ସରକାରରେ ଚାରା ଦୁର୍ନୀତି ଠାରୁ ୭୦ ଗୁଣା ବଡ଼ ନୀତିଶ ସରକାରର ଦୁର୍ନୀତି । ୭୦ ହଜାର କୋଟି ଟଙ୍କାର ହିସାବ ଦେଉନି ବିହାର ସରକାର

କନକ ବ୍ୟୁରୋ : କଂଗ୍ରେସ ନେତା ପବନ ଖେଡା ବିହାର ସରକାରଙ୍କ ଉପରେ ୭୦ ହଜାର କୋଟି ଟଙ୍କାର ଦୁର୍ନୀତି ଅଭିଯୋଗ ଆଣିଛନ୍ତି । ସେ ୨୦୨୩-୨୪ ସିଏଜି ରିପୋର୍ଟକୁ ଆଧାର କରି କହିଛନ୍ତି କି, ନୀତିଶ ସରକାର ବିଭିନ୍ନ ବିଭାଗର ଖର୍ଚ୍ଚ ହିସାବ ଜମା କରୁନାହାଁନ୍ତି । ସେ କହିଛନ୍ତି ଏହି ଅର୍ଥ ବିହାର ସରକାରଙ୍କ ମୋଟ ବଜେଟର ୩ ଭାଗରୁ ୧ ଭାଗ । ଯଦି ଏହାକୁ ରୋକା ନଯାଏ ତେବେ ଆସନ୍ତା ଥରକୁ ଏହି ଦୁର୍ନୀତିର ପରିମାଣ ୭୦ ହଜାର କୋଟିରୁ ବଢି ୧ ଲକ୍ଷ ୪୦ ହଜାର କୋଟିରେ ପହଂଚିବ । ଲାଲୁଙ୍କ ସରକାର ସମୟରେ ହୋଇଥିବା ୯୦୩ କୋଟି ଟଙ୍କାର ଚାରା ଦୁର୍ନୀତି ଠାରୁ ୭୦ ଗୁଣା ଅଧିକ । 
କେବଳ ପବନ ଖେଡା ନୁହଁନ୍ତି ଏହା ପୂର୍ବରୁ ମଧ୍ୟ ଏହି ଦୁର୍ନୀତିକୁ ନେଇ ବିରୋଧୀଦଳ ନେତା ତେଜସ୍ୱୀ ଯାଦବ ସରକାରଙ୍କୁ ଘେରିଛନ୍ତି । ସେ କହିଥିଲେ କି ନୀତିଶ ସରକାର ସରକାରୀ ଅର୍ଥକୁ ଆତ୍ମସାତ କରିଛନ୍ତି । ଏହାକୁ ମଧ୍ୟ ବିଧାନସଭା ଅଧିବେଶନରେ ଉଭୟ କଂଗ୍ରେସ ଓ ଆରଜେଡି ଉଠାଇ ଏନଡିଏ ସରକାରକୁ ଘେରିଥିଲେ । ଏହି ଦୁର୍ନୀତି ଏବେ ବିହାର ବିଧାନସଭା ନିର୍ବାଚନରେ ଏନଡିଏ ପାଇଁ ଘାତକ ହୋଇପାରେ । 

ସିଏଜି ରିପୋର୍ଟ ଆଧାରରେ ବିହାର ସରକାର ୭୦,୮୭୭  କୋଟି ଟଙ୍କାର ହିସାବ ଦେବାକୁ ଅକ୍ଷମ ହୋଇଛନ୍ତି । ସରକାରଙ୍କ ଉପରେ ଅଭିଯୋଗ ରହିଛି କି ବିହାର ସରକାରଙ୍କୁ ଦିଆଯାଇଥିବା ରାଶିରୁ ବିହାର ସରକାର ୭୦,୮୭୭ କୋଟି ଟଙ୍କାର ହିସାବ ଦେଉନାହାଁନ୍ତି । ୧୮ ମାସ ମଧ୍ୟରେ ସରକାର ଏହାର ରିପୋର୍ଟ ଦାଖଲ କରିବାକୁ ଥିବା ବେଳେ ବିହାର ସରକାର ଏହି ରିପୋର୍ଟ ଦେଇନାହାଁନ୍ତି । ପବନ ଖେଡା କହିଛନ୍ତି କି, ଏହା ଫଳରେ ରାଜ୍ୟର ସ୍ୱାସ୍ଥ୍ୟ, ଶିକ୍ଷା ଓ ମୌଳିକ ଆବଶ୍ୟକତା ପାଇଁ ଖର୍ଚ୍ଚ କରିବା କଥା । ହେଲେ ଏହାକୁ ନୀତିଶ ସରକାର ଆତ୍ମସାତ କରିଥିବାରୁ ଏହାର ପ୍ରଭାବ ରାଜ୍ୟର ବିଭିନ୍ନ ଯୋଜନା ଉପରେ ଆଗାମୀ ଦିନରେ ପଡିବ । ଏବେ ଆସନ୍ତୁ ଜାଣିବା କେଉଁ ବିଭାଗର କେତେ ଟଙ୍କାର ହିସାବ ଦେଉନାହାଁନ୍ତି ନୀତିଶ ସରକାର

ପଞ୍ଚାୟତିରାଜ ବିଭାଗ- ୨୮,୧୫୪ କୋଟି 
ଶିକ୍ଷା ବିଭାଗ- ୧୨,୬୨୩ କୋଟି 
ସହରୀ ବିକାଶ ବିଭାଗ - ୧୧,୦୬୫ କୋଟି 
ଗ୍ରାମୀଣ ବିକାଶ ବିଭାଗ - ୭,୮୦୦ କୋଟି 
କୃଷି ବିଭାଗ - ୨,୧୦୭ କୋଟି 

ଏହାକୁ ନେଇ ବିରୋଧୀ ଅଭିଯୋଗ କରିଛନ୍ତି କି, ନୀତିଶ ସରକାର ଦୁର୍ନୀତିକୁ ଲୁଚାଉଛନ୍ତି ଓ ଜନତାଙ୍କ ଟଙ୍କାକୁ ଦୁରୋପଯୋଗ କରିଛନ୍ତି । ତେଜସ୍ୱୀ କହିଛନ୍ତି କି, ଏ ସରକାର ଦୁର୍ନୀତିକୁ ଲୁଚାଇବାକୁ ଯାଇ ଲୋକଙ୍କ ମାଛ, ମଟନ୍ ଓ ମୁସଲିମ୍ ନାମରେ ଫସାଇବାକୁ ଚେଷ୍ଟା କରୁଛନ୍ତି । ସେପଟେ ନୀତିଶ ସରକାର ଏହି ଦୁର୍ନୀତି ଅଭିଯୋଗକୁ ଖଣ୍ଡନ କରିଛନ୍ତି । ସରକାର କହିଛନ୍ତି କି, ଏହା ସାମାନ୍ୟ ପ୍ରକ୍ରିୟା. ସବୁ ରାଜ୍ୟରେ ଏଭଳି ହୋଇଥାଏ । ଅର୍ଥ ସଚିବ ଆନନ୍ଦ କିଶୋର କହିଛନ୍ତି କି, ଏହା ଦୁର୍ନୀତି ନୁହେଁ କି ଆର୍ଥିକ ହେରଫେର ନୁହେଁ ।