ଆରପାରିରେ ‘ପବିତ୍ର ରିସ୍ତା’ ଧାରାବାହିକର ଏହି ଅଭିନେତ୍ରୀ : ୩୮ ବର୍ଷ ବୟସରେ ବୁଜିଲେ ଆଖି

କନକ ବ୍ୟୁରୋ : ଚଳିତବର୍ଷ ହିନ୍ଦୀ ଟେଲି ଇଣ୍ଡଷ୍ଟ୍ରି ପାଇଁ ଏକ ଅଶୁଭ ବର୍ଷ ସାବ୍ୟସ୍ତ ହୋଇଛି କହିଲେ କିଛି ଭୁଲ୍ ହେବନି । କାରଣ ଚଳିତ ବର୍ଷ ଅନେକ ଟେଲି ତାରକାଙ୍କ ଜୀବନ ଅକାଳରେ ଚାଲିଗଲାଣି । ବର୍ତ୍ତମାନ ପୁଣି ଜଣେ ଅଭିନେତ୍ରୀଙ୍କୁ ହରାଇ ଦୁଃଖରେ ମ୍ରିୟମାଣ ହୋଇପଡ଼ିଛି ଟେଲି ଇଣ୍ଡଷ୍ଟ୍ରି । ହିନ୍ଦୀ ଓ ମରାଠୀ ଇଣ୍ଡଷ୍ଟ୍ରିର ଜଣାଶୁଣା ଅଭିନେତ୍ରୀ ପ୍ରିୟା ମରାଠେଙ୍କର ଦେହାନ୍ତ ହୋଇଛି । ପ୍ରିୟା ମାତ୍ର ୩୮ ବର୍ଷ ବୟସରେ ଦୁନିଆକୁ ଅଲବିଦା କହିଛନ୍ତି । 'ପବିତ୍ର ରିସ୍ତା' ଟିଭି ଶୋ'ରୁ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ପ୍ରିୟା ମରାଠେଙ୍କ ଦେହାନ୍ତରେ କେବଳ ତାଙ୍କ ପରିବାର ନୁହେଁ ବରଂ ତାଙ୍କ ଫ୍ୟାନ୍ସମାନେ ମଧ୍ୟ ସ୍ତବ୍ଧ ହୋଇଯାଇଛନ୍ତି ।

ପ୍ରିୟା ମରାଠେଙ୍କ ଦେହାନ୍ତ ମୁମ୍ବାଇର ମୀରା ରୋଡ଼ରେ ଥିବା ତାଙ୍କ ଘରେ ହୋଇଛି । ପ୍ରିୟାଙ୍କୁ କିଛି ବର୍ଷ ପୂର୍ବରୁ କ୍ୟାନ୍ସର ହୋଇଥିଲା । ଯଦିଓ, ସେ କ୍ୟାନ୍ସରରୁ ସୁସ୍ଥ ମଧ୍ୟ ହେଉଥିଲେ । କିନ୍ତୁ ପୁଣିଥରେ କ୍ୟାନ୍ସରର ଶିକାର ହେବାକୁ ଲାଗିଲେ । ତାଙ୍କ ଶରୀରରେ ପୁଣି ଥରେ କ୍ୟାନ୍ସର ବ୍ୟାପିବାକୁ ଲାଗିଲା ଏବଂ ଶରୀର ଟ୍ରିଟମେଣ୍ଟକୁ ଗ୍ରହଣ କରିପାରିଲା ନାହିଁ । ସେପଟେ ପ୍ରିୟା ଶେଷରେ କ୍ୟାନ୍ସର ଆଗରେ ହାର ମାନିଗଲେ ଏବଂ ଶନିବାର ଅଭିନେତ୍ରୀ ଜଣକ ଶେଷ ନିଶ୍ୱାସ ତ୍ୟାଗ କଲେ । ପ୍ରିୟା ମରାଠେ ଅନେକ ଟିଭି ଶୋ ଏବଂ ୱେବ୍ ଶୋ'ରେ କାମ କରିଛନ୍ତି । ଜିଟିଭିର ଲୋକପ୍ରିୟ ଶୋ’ 'ପବିତ୍ର ରିସ୍ତା'ରେ ସେ ବର୍ଷା ଦେଶପାଣ୍ଡେ ଭୂମିକାରେ ନଜର ଆସିଥିଲେ । ଏହାଛଡ଼ା ସେ କସମ ସେ, କମେଡି ସର୍କସ କେ ସୁପରଷ୍ଟାର୍ସ, ଉତରନ, ବଡ଼େ ଅଚ୍ଛେ ଲଗତେ ହୈ, ଭାରତ କା ବୀର ପୁତ୍ର-ମହାରାଣା ପ୍ରତାପ, ସାବଧାନ ଇଣ୍ଡିଆ, ଭାଗେରେ ମନ, ସାଥ ନିଭାନା ସାଥିଆ ଭଳି ଅନେକ ଶୋ' କରିଛନ୍ତି ।