ଜେରା ବେଳେ କ’ଣ କହିଥିଲା ପୁଞ୍ଜିଲାଲ?

କନକ ବ୍ୟୁରୋ: ବହୁଚର୍ଚ୍ଚିତ ପାଟଣାଗଡ଼ ପାର୍ସଲବୋମା ବିସ୍ଫୋରଣ ଘଟଣା ଆପଣଙ୍କ ମନେଥିବ । ଆସନ୍ତା ୨୮ ତାରିଖରେ ଏ ଘଟଣାର ରାୟ ପ୍ରକାଶ ପାଇବ । ମୁଖ୍ୟ ଅଭିଯୁକ୍ତ ପୁଞ୍ଜିଲାଲ୍‌ ମେହେର ଏବେ ବି ଜେଲରେ । ତେଣୁ ଅଦାଲତ କ’ଣ ଦଣ୍ଡବିଧାନ କରିବେ ତା ଉପରେ ସମସ୍ତଙ୍କର ନଜର ରହିଛି । ତେବେ ତା ପୂର୍ବରୁ କନକ ନ୍ୟୁଜ୍‌ ହାତରେ ଲାଗିଛି ଚାଞ୍ଚଲ୍ୟକର ତଥ୍ୟ । ପୁଞ୍ଜିଲାଲକୁ ପୁଲିସ ଜେରା କରୁଥିବା ବେଳର ଏକ୍ସକ୍ଲ୍ୟୁସିଭ୍ ଖବର ଆମ ପାଖରେ ପହଞ୍ଚିଛି । ଯେଉଁଥିରେ ସବୁ ସତ ମାନିଛି ପୁଞ୍ଜିଲାଲ୍‌ । ଖାଲି ମାନିନାହିଁ ବରଂ କେମିତି ତିଆରି କରିଥିଲା ପାର୍ସଲବୋମା, ତାହାର ଡେମୋ ବି ଦେଖାଇଛି ଅଭିଯୁକ୍ତ ପୁଞ୍ଜିଲାଲ୍‌ । ତେବେ ଏହି ଭିଡିଓ ସର୍ବସାଧାରଣକୁ କେମିତି ଆସିଲା ତାହା ଆମକୁ ଜଣାନାହିଁ । ଏହି ଭିଡିଓର ସତ୍ୟାସତ୍ୟ ମଧ୍ୟ ଆମେ ଅନୁସନ୍ଧାନ କରିନାହୁଁ । ଭିଡିଓରୁ ଜଣାପଡୁଛି ଯେ, ପାଟଣାଗଡ ପାର୍ସଲ ବୋମା ମାମଲାର ଅଭିଯୁକ୍ତ ପୁଞ୍ଜିଲାଲ ମେହେର ଏକ ଘରେ ବସିଛି ଏବଂ ତଦନ୍ତକାରୀ ଅଧିକାରୀଙ୍କ ଆଗରେ ପୂରା ଘଟଣା ସମ୍ପର୍କରେ ଗୋଟି ଗୋଟି କରି କହୁଛି । ତେଣୁ ଏହି ଭିଡିଓ ଏବଂ ଏଥିରେ ଥିବା ଅଡିଓକୁ ମଧ୍ୟ ଯାଞ୍ଚ କରି ଏହାର ସତ୍ୟାସତ୍ୟ ଯାଞ୍ଚ କରିବାର ଆବଶ୍ୟକତା ରହିଛି ।

Advertisment

ତଦନ୍ତ ଅଧିକାରୀ ଏବଂ ପୁଞ୍ଜିଲାଲ ଭିତରେ କଣ ହୋଇଛି କଥାବାର୍ତ୍ତା?

ତଦନ୍ତ ଅଧିକାରୀ-ଲୋକ ଖରାପ ନାହିଁ
ପୁଞ୍ଜିଲାଲ-କାମ ଖରାପ ତ..
ତଦନ୍ତ ଅଧିକାରୀ-ବିଶେଷ କରି ସେ ପିଲାର କ’ଣ ଦୋଷ ଥିଲା?
ପୁଞ୍ଜିଲାଲ-ମୁଁ ଜାଣୁଛି ସାର୍‌
ତଦନ୍ତ ଅଧିକାରୀ-ସେ ବୁଢ଼ୀ ଲୋକଟିର କ’ଣ ଦୋଷ ଥିଲା? ତା'ର ତ ବାପା କହୁଥିଲେ ମୋତେ, ସାର ମୋ ସ୍ତ୍ରୀ ସାଙ୍ଗରେ ଝଗଡ଼ା ଥିଲା । ମୋ ସ୍ତ୍ରୀକୁ ମାରିଦେଇଥାନ୍ତା । ମୋ ପୁଅ ନାଁରେ କାହିଁକି ପାର୍ସଲ ପଠାଉଥିଲା? ଏଇଟା ବି ଗୋଟେ କଥା କୁହ, ତମେ ତା ପୁଅ ନାଁରେ କାହିଁକି ପାର୍ସଲ ପଠାଉଥିଲ? ତା ମା’ ନାଁରେ ପଠାଇଲନି । ସେ ଖୋଲିକି ଦେଖିଥାନ୍ତା...
ପୁଞ୍ଜିଲାଲ-ମୁଁ ସାର୍ ଲେଖୁଲେଖୁ କ’ଣ ଲେଖିଦେଇଛି, ମୁଁ ଆଜ୍ଞା ଜାଣିନି
ତଦନ୍ତ ଅଧିକାରୀ-ସେଇଟା କାଇଁ କହୁଛ? ତମେ ଏତେ ବୁଦ୍ଧିମାନ ଲୋକ । ଏ କି କଥା ୟୁ ଟେଲ୍ ମି ।
ପୁଞ୍ଜିଲାଲ-ମୁଁ ଲେଖିଛି ସାର୍...
ତଦନ୍ତ ଅଧିକାରୀ-ୟୁ ଟେଲ୍ ମି । ଇଫ୍ ଇଓର ଟାର୍ଗେଟ ଇଜ୍ ଦ୍ୟାଟ୍ ଲେଡି, ହ୍ବାଏ ୟୁ ?
ପୁଞ୍ଜିଲାଲ-ମୁଁ ଟାର୍ଗେଟ କରିନଥିଲି ସାର୍
ତଦନ୍ତ ଅଧିକାରୀ-ତମେ ସେ ସ୍ତ୍ରୀ ଲୋକକୁ ଟାର୍ଗେଟ କରିଥାନ୍ତ

ପାଟଣାଗଡ ପାର୍ସଲ ବୋମା ବିସ୍ଫୋରଣର ଘଟଣାକ୍ରମ

୨୦୧୮ ଫେବ୍ରୁଆରି ୨୩ର ଘଟଣା
ରିସେପ୍ସନ୍ ମଣ୍ଡପରେ ଫୁଟିଥିଲା ପାର୍ସଲ ବୋମା
ବିସ୍ଫୋରଣରେ ୨ ଜଣଙ୍କ ମୃତ୍ୟୁ ହୋଇଥିଲା
ନବ ବିବାହିତ ସୌମ୍ୟଶେଖର ସାହୁ ଓ ଜେଜେ ମା’ ଟଳି ପଡ଼ିଥିଲେ
ସୌମ୍ୟଙ୍କ ସ୍ତ୍ରୀ ରୀମାରାଣୀ ଏଥିରେ ଗୁରୁତର ହୋଇଥିଲେ
ପାଟଣାଗଡ଼ ପୁଲିସ ମାମଲାର ତଦନ୍ତ ଆରମ୍ଭ କରିଥିଲା
ପରେ କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେଇଥିଲେ ସରକାର
୨୦୧୮ ଏପ୍ରିଲ ୨୫ ତାରିଖରେ ପୁଞ୍ଜିଲାଲ୍‌ ମେହେର ଗିରଫ
ଭଇଁଷା କଲେଜ ଅଧ୍ୟାପକ ପୁଞ୍ଜିଲାଲ୍‌ ଏହା ପଠାଇଥିଲା
ସେ ମୁଖ୍ୟ ଓ ଏକମାତ୍ର ଅଭିଯୁକ୍ତ ବୋଲି ଦର୍ଶାଯାଇଥିଲା
ପାଟଣାଗଡ଼ ଅତିରିକ୍ତ ଦୌରାଜଜ୍ କୋର୍ଟରେ ମାମଲା
ଆସନ୍ତା ୨୮ରେ ଆସିବ ଚୂଡ଼ାନ୍ତ ରାୟ