କନକ ବ୍ୟୁରୋ: ବଡ଼ ମେଡ଼ିକାଲରେ ବଡ଼ ଅବ୍ୟବସ୍ଥା, ରୁଗଣ ଅବସ୍ଥାରେ ଦକ୍ଷିଣ ଓଡ଼ିଶାର ପ୍ରତିଷ୍ଠିତ ଏମକେସିଜି ଡାକ୍ତରଖାନା । ସରକାର ବଦଳିଲେ, ପ୍ରଶାସନିକ ଅଧିକାରୀ ବଦଳିଲେ, କର୍ତ୍ତୃପକ୍ଷ ବି ବଦଳିଲେ ହେଲେ ଏପର୍ଯ୍ୟନ୍ତ ଏଠାରେ ବଦଳିନି ସ୍ବାସ୍ଥ୍ୟ ବ୍ୟବସ୍ଥା । ଫଳରେ ରୋଗୀ ମାନଙ୍କୁ ନାହିଁ ନଥିବା ଅସୁବିଧାର ସମ୍ମୁଖୀନ ହେବାକୁ ପଡୁଛି । ଏହି ଅବ୍ୟବସ୍ଥାର ଚିତ୍ର ସବୁ କନକ ନ୍ୟୁଜ କ୍ୟାମେରାରେ କଏଦ ହୋଇଛି । ଶିଶୁ ରୋଗ ବିଭାଗରୁ ଟୀକା ଦେବାକୁ ଯାଉଥିବା ଶିଶୁ ରୋଗୀଙ୍କ ଦେହରେ ଲାଗିଥିବା ଅକ୍ସିଜେନ ସହ ସିଲିଣ୍ଡର୍ ନେଇ ଯାଉଛନ୍ତି ପରିବାର ଲୋକେ । ସହରରେ ଗଢି ଉଠିଥିବା ମାଳମାଳ ଘରୋଇ କ୍ଲିନିକ୍ ଗୁଡ଼ିକୁ ମାଲାମାଲ କରିବା ଚକ୍ରାନ୍ତରେ ଏମକେସିଜିର ଏଭଳି ସମସ୍ୟା ପ୍ରତି ଜାଣିଶୁଣି ଅବହେଳା କରାଯାଉଥିବା ଅଭିଯୋଗ ହୋଇଛି । କୋଟି କୋଟି ଟଙ୍କା ଖର୍ଚ୍ଚ ହେଉଛି ତଥାପି ରକ୍ଷଣାବେକ୍ଷଣ ଅଭାବରୁ ସ୍ବାସ୍ଥ୍ୟ ସେବା ଭଳି ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ସାଧାରଣ ଲୋକେ । କାହିଁକି ଏତେ ହତାଦର, କେବେ ସମସ୍ୟା ମୁକ୍ତ ହେବ ଏମ୍ କେ ସି ଜି ତାହା ଏବେ ସାଧାରଣରେ ପ୍ରଶ୍ନ ସୃଷ୍ଟି କରୁଛି ।