ଅଶୁଭ ସୋମବାର ! ଜଳିଗଲା ବସ୍, ନଦୀରେ ପଡ଼ିଲା କାର

କନକ ବ୍ୟୁରୋ : ବାଇକକୁ ଧକ୍କା ଦେଲା ବାଇକ, ଦୁଇ ମୃତ । ସୁବର୍ଣ୍ଣପୁର ଜିଲ୍ଲା ବିନିକା ଥାନା କଟାପାଲି ନିକଟରେ ଦୁର୍ଘଟଣା ଘଟିଛି । ଘଟଣା ସ୍ଥଳରେ ଜଣଙ୍କର ମୃତ୍ୟୁବରଣ କରିଥିବା ବେଳେ ବୁର୍ଲା ସ୍ଥାନାନ୍ତର ସମୟରେ ବାଟରେ ଅନ୍ୟ ଜଣଙ୍କ ଜୀବନ ଯାଇଛି । ମୃତକମାନେ ହେଲେ ଘଣ୍ଟୋପାଲି ଗାଁର ରାଜେନ୍ଦ୍ର ବାରିକ ଏବଂ ସଚ୍ଚିଦା ପଧାନ ବୋଲି ଜଣାପଡିଛି । ଘଟଣାସ୍ଥଳରେ ପୋଲିସ ପହଂଚି ଅଧିକ ତଦନ୍ତ ଚଳାଇଛି । ତଦନ୍ତ ପରେ ପ୍ରକୃତ ଘଟଣା ଜଣା ପଡ଼ିବ ।

ବାଇକକୁ ପିଟିଲା ଟ୍ରକ, ତିନି ଗୁରୁତର । କୋରାପୁଟ ଲକ୍ଷ୍ମୀପୁର-ରାୟଗଡ଼ା ଜାତୀୟ ରାଜପଥ ୩୨୬ରେ ଦୁର୍ଘଟଣା ଘଟିଛି । ଗେଲ ଇଣ୍ଡିଆ ନାମକ ଏକ କମ୍ପାନୀ ଟ୍ରକ୍ ଧକ୍କାରେ ବାଇକ ଚାଳକ ସମେତ ବାଇକରେ ବସିଥିବା ୨ ଜଣ ଯୁବକ ଗୁରୁତର ହୋଇଛନ୍ତି । ସେମାନଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ଡାକ୍ତରଖାନାରେ ଭର୍ତ୍ତି କରାଯାଇଛି । ଆଜି ସକାଳ ୬ ଟା ସମୟରେ ଦୁର୍ଘଟଣା ଘଟିଛି । ପରେ ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି ।

ଯାଜପୁର ଜିଲ୍ଲା ବଇରି ଥାନା ଛତିଆ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଜାତୀୟ ରାଜପଥ ୧୬ ନିକଟରେ ବାଇକ୍‌କୁ ଧକା ଦେଲା ବସ୍ । ହୁ ହୁ ହୋଇ ଜଳିଗଳା ଯାତ୍ରୀବାହୀ ବସ୍‌ । ବାରିପଦାରୁ ଭୁବନେଶ୍ୱର ଯାଉଥିବା ଘରୋଇ ବସ ଟି ଗୋଟିଏ ବାଇକକୁ ଧକ୍କା ଦେଇଥିଲା । ଘଟଣା ସ୍ଥଳରେ ବାଇକ୍ ଆରୋହିଙ୍କ ମୃତ୍ୟୁ ହୋଇଥିବାବେଳେ ୨ ଜଣ ଗୁରୁତର ହୋଇଛନ୍ତି । ତେବେ ଦୁର୍ଘଟଣା ଘଟାଇବା ପରେ ବସଟି ଯାନ୍ତ୍ରିକ ତ୍ରୁଟି ଯୋଗୁଁ ରାସ୍ତା ଉପରେ ଜଳି ଉଠିଥିଲା । ତେବେ ବସରେ ଥିବା ସମସ୍ତ ଯାତ୍ରୀ ସୁରକ୍ଷିତ ଥିବା ବଇରି ପୋଲିସ ଅଧିକାରୀ ସୂଚନା ଦେଇଛନ୍ତି । ମୃତ ଦେହକୁ ବଡ଼ଚଣା ମେଡିକାଲରେ ରଖାଯାଇଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି ।

ନିଦ ଲାଗିଯିବାରୁ ନୟନ ଯୋଡ଼ି କେନାଲରେ ଖସିପଡିଲା କାର । ବାଙ୍ଗିରିପୋଷି ଥାନା ଧଡାଙ୍ଗିରି ନିକଟ ନୟନ ଯୋଡ଼ିକୁ ଖସିପଡିଛି କାର । ପାଣି ଅଳ୍ପ ଥିବାରୁ ବଡ଼ ଅଘଟଣରୁ ବର୍ତ୍ତି ଯାଇଛି ପରିବାର । ପରିବାର ଲୋକେ ରାଇରଙ୍ଗପୁରରୁ ବାଲେଶ୍ୱର ନିଳଗିରି ଯାଉଥିଲେ । ନିଦ ଲାଗିଯିବାରୁ ଭାରସାମ୍ୟ ହରାଇ ବାଙ୍ଗିରିପୋଷି ଥାନା ଧଡାଙ୍ଗିରି ନିକଟସ୍ଥ ନୟନ ଯୋଡ଼ିରେ ଖସିପଡିଥିଲା । କାରରରେ ତିନି ଜଣ ମହିଳା, ଜଣେ ପୁରୁଷ ଓ ଜଣେ ନାବାଳକ ଥିଲେ । ସ୍ଥାନୀୟ ଜନସାଧାରଣ ଉଦ୍ଧାର କରି ସମସ୍ତଙ୍କୁ ବାରିପଦା ମୁଖ୍ୟ ଡାକ୍ତରଖାନାକୁ ପଠାଇଛନ୍ତି ।